ലോകത്തിലെ ഏറ്റവും സുരക്ഷിത രാജ്യങ്ങളില്‍ ആദ്യ പത്തില്‍ അഞ്ചും ഗള്‍ഫ് രാജ്യങ്ങളാണ്. ഗാലപ് 2025 ഗ്ലോബല്‍ സേഫ്റ്റി റിപ്പോര്‍ട്ട് പ്രകാരമാണിത്. 144 രാജ്യങ്ങളിലായി നടത്തിയ സര്‍വേയില്‍ ഒമാന്‍ 94% റേറ്റിംഗോടെ നാലാം സ്ഥാനത്ത് എത്തി ഗള്‍ഫ് രാജ്യങ്ങളില്‍ മുന്നിലാണ്. ഒമാന്‍ കഴിഞ്ഞാല്‍ അഞ്ചാം സ്ഥാനത്ത് സൗദി അറേബ്യയും (93) ഏഴാം സ്ഥാനത്ത് കുവൈത്തും (91) ഒന്‍പതാം സ്ഥാനത്ത് ബഹ്‌റൈനും (91) പത്താം സ്ഥാനത്ത് യുഎഇയുമാണ് (91). ഈ രാജ്യങ്ങള്‍ പോയിന്റില്‍ തുല്യതയാണെങ്കിലും മറ്റു ചില ഘടങ്ങള്‍ കൂടി വിലയിരുത്തിയാണ് റാങ്കിംഗ് നിശ്ചയിക്കുന്നത്.

ശക്തമായ സര്‍ക്കാര്‍ സ്ഥാപനങ്ങള്‍, മികച്ച അടിസ്ഥാന സൗകര്യങ്ങള്‍, ഐക്യമുള്ള സമൂഹം എന്നിവയാണ് ഒമാനിലെ ഉയര്‍ന്ന സുരക്ഷാബോധത്തിന് അടിത്തറയെന്ന് റിപ്പോര്‍ട്ട് എടുത്തുപറയുന്നു.

98% റേറ്റിംഗോടെ പട്ടികയില്‍ ഒന്നാം സ്ഥാനം സിംഗപ്പൂര്‍ നിലനിര്‍ത്തി. താജിക്കിസ്ഥാന്‍ 95% റേറ്റിംഗോടെ രണ്ടാം സ്ഥാനത്തും ചൈന 94% റേറ്റിംഗോടെ മൂന്നാം സ്ഥാനത്തും എത്തി. നോര്‍വെ മാത്രമാണ് ആദ്യ പത്തില്‍ ഇടം നേടിയ ഏക യൂറോപ്യന്‍ രാജ്യം. എട്ടാം സ്ഥാനമാണ് നോര്‍വേക്ക്. ആറാം സ്ഥാനത്ത് ഹോങ്കോംഗ് ആണ്,

ഏറ്റവും കുറഞ്ഞ സുരക്ഷാബോധം രേഖപ്പെടുത്തിയ രാജ്യം ദക്ഷിണാഫ്രിക്ക ആണ്. ഇവിടെ 33% ആളുകള്‍ക്ക് മാത്രമാണ് രാത്രിയില്‍ തനിച്ച് നടക്കുന്നതില്‍ സുരക്ഷിതത്വം അനുഭവപ്പെട്ടത്. ഏറ്റവും കുറഞ്ഞ സുരക്ഷാബോധം രേഖപ്പെടുത്തിയ മറ്റ് രാജ്യങ്ങളില്‍ ചിലത്: ചാഡ് , മ്യാന്‍മര്‍ , ഇസ്വാറ്റിനി , സിംബാബ്വെ എന്നിവയാണ്. ലാറ്റിന്‍ അമേരിക്കന്‍ രാജ്യങ്ങളായ ചിലി, ഇക്വഡോര്‍ എന്നിവയും ഏറ്റവും കുറഞ്ഞ സുരക്ഷാബോധം രേഖപ്പെടുത്തിയ രാജ്യങ്ങളില്‍ ഉള്‍പ്പെടുന്നു.

ലോകമെമ്പാടും 67% സ്ത്രീകള്‍ക്ക് മാത്രമാണ് രാത്രിയില്‍ തനിച്ച് നടക്കുന്നതില്‍ സുരക്ഷിതത്വം അനുഭവപ്പെടുന്നത്, എന്നാല്‍ 78% പുരുഷന്മാര്‍ക്ക് സുരക്ഷിതത്വം തോന്നുന്നു. യുഎസ്, ഓസ്‌ട്രേലിയ തുടങ്ങിയ ചില വികസിത രാജ്യങ്ങളില്‍ പോലും ഈ ലിംഗപരമായ വിടവ് 25 ശതമാനം പോയിന്റിലധികം കൂടുതലാണ്.

ഗാലപ് റിപ്പോര്‍ട്ട് പ്രധാനമായും നാല് ചോദ്യങ്ങളെ അടിസ്ഥാനമാക്കിയുള്ളതാണ്: 1.നിങ്ങള്‍ താമസിക്കുന്ന പ്രദേശത്ത് രാത്രിയില്‍ തനിച്ച് നടക്കുമ്പോള്‍ സുരക്ഷിതത്വം തോന്നാറുണ്ടോ? 2. നിങ്ങളുടെ പ്രാദേശിക പോലീസിലുള്ള വിശ്വാസം എത്രത്തോളമുണ്ട്? 3. കഴിഞ്ഞ 12 മാസത്തിനുള്ളില്‍ നിങ്ങളുടെ പണമോ വസ്തുവകകളോ മോഷ്ടിക്കപ്പെട്ടിട്ടുണ്ടോ? കഴിഞ്ഞ 12 മാസത്തിനുള്ളില്‍ നിങ്ങള്‍ ആക്രമണത്തിനോ കവര്‍ച്ചയ്ക്കോ ഇരയായിട്ടുണ്ടോ?