റിയാദ്: സൗദിയില്‍ സ്വകാര്യ ടാക്‌സി ഓടിച്ച് ഉപജീവനം നടത്തിയിരുന്ന പ്രവാസികള്‍ സൂക്ഷിക്കുക. എത്ര രഹസ്യമായി നടത്തിയാലും നിങ്ങള്‍ ഏതു സമയവും പിടികൂടാം. എല്ലായിടത്തും പരിശോധന അതിശക്തമാണ്. അനുമതിയില്ലാതെ സ്വകാര്യ വാഹനങ്ങളില്‍ യാത്രക്കാരെ കൊണ്ടുപോയതിന് 741 പേരെയാണ് ജനറല്‍ ട്രാന്‍സ്പോര്‍ട്ട് അതോറിറ്റി (ജി.ടി.എ) ഒരാഴ്ചക്കിടെ പിടികൂടിയത്. സൗദിയുടെ പല ഭാഗങ്ങളിലായി നടത്തിയ പരിശോധനയിലാണ് ഇത്രയും പേര്‍ പിടിയിലായത്. ലൈസന്‍സില്ലാതെ യാത്രക്കാരെ വിളിച്ചുകയറ്റാന്‍ ശ്രമിച്ച 534 പേരും, നിയമം തെറ്റിച്ച് യാത്രക്കാരെ വാഹനത്തില്‍ കൊണ്ടുപോയ 207 പേരും ഇവരില്‍ ഉള്‍പ്പെടും.

പിടിയിലായവര്‍ക്കെതിരെ വാഹനം പിടിച്ചെടുക്കല്‍, കനത്ത പിഴ ചുമത്തല്‍ തുടങ്ങിയ നിയമനടപടികള്‍ സ്വീകരിച്ചു. ഗതാഗത രംഗത്തെ നിയമലംഘനങ്ങള്‍ കുറയ്ക്കുന്നതിനും യാത്രാ സുരക്ഷ വര്‍ധിപ്പിക്കുന്നതിനും വേണ്ടിയാണ് പരിശോധനകളെന്ന് അതോറിറ്റി വ്യക്തമാക്കി. യാത്രക്കാരെ വിളിച്ചുകയറ്റി ആവര്‍ത്തിച്ച് നിയമം തെറ്റിക്കുന്നവര്‍ക്ക് 11,000 റിയാല്‍ വരെ പിഴയും 25 ദിവസത്തേക്ക് വാഹനം പിടിച്ചെടുക്കലുമാണ് ശിക്ഷ. നിയമവിരുദ്ധമായി യാത്രക്കാരെ കൊണ്ടുപോയാല്‍ 20,000 റിയാല്‍ വരെ പിഴയും 60 ദിവസം വരെ വാഹനം കണ്ടുകെട്ടലും ലഭിക്കാം. നിയമം ലംഘിച്ച വാഹനം ലേലം ചെയ്ത് വില്‍ക്കാനും സാധ്യതയുണ്ട്. കൂടാതെ പ്രവാസികള്‍ക്കെതിരെ നാടുകടത്തുന്നതുള്‍പ്പെടെയുള്ള കടുത്ത ശിക്ഷാനടപടികള്‍ സ്വീകരിക്കുമെന്നും അതോറിറ്റി മുന്നറിയിപ്പ് നല്‍കി.