റിയാദ്: ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ് (ഒഐസിസി) വനിതാ വിഭാഗം റിയാദ് ഒരുക്കിയ 'കിഡ്‌സ് ഫാഷന്‍ നൈറ്റ് 2025' മന്‍സൂരയിലെ ഗ്രാന്‍ഡ് ഹൈപ്പറില്‍ നടന്നു. രണ്ട് വയസ്സ് മുതല്‍ പത്ത് വയസ്സ് വരെയുള്ള കുട്ടികള്‍ക്കായിരുന്നു മത്സരം. കുഞ്ഞുങ്ങളുടെ ആവേശഭരിതമായ പ്രകടനങ്ങള്‍ ആകര്‍ഷണമായി.
പരിപാടി കെ.പി.സി.സി ജനറല്‍ സെക്രട്ടറി അഡ്വ. പഴിക്കുളം മധു ഉദ്ഘാടനം ചെയ്തു. കുട്ടികളുടെ കഴിവുകളെ വളര്‍ത്തിപ്പിടിക്കുന്നതിലും, സാമൂഹിക സാംസ്‌കാരിക പരിപാടികളിലൂടെ ആത്മവിശ്വാസം വളര്‍ത്തുന്നതിലും ഇത്തരം വേദികള്‍ മുതല്‍ക്കൂട്ടാകുമെന്ന് അദ്ദേഹം പറഞ്ഞു.
വനിതാ വിഭാഗം പ്രസിഡന്റ് മൃദുല വിനീഷ് അധ്യക്ഷത വഹിച്ചു. സെന്‍ട്രല്‍ കമ്മിറ്റി പ്രസിഡന്റ് സലിം കളക്കര, മജീദ് ചിങ്ങോലി, റഹ്‌മാന്‍ മീനമ്പത്ത്, ഫൈസല്‍ ബാഹസന്‍, സുരേഷ് ഷങ്കര്, സനിന്‍ വാസിം, സമീര്‍ ബാബു എന്നിവര്‍ പ്രസംഗിച്ചു. വിജയികള്‍ക്കും മത്സരത്തില്‍ പങ്കെടുത്തവര്‍ക്കും ഉപഹാരങ്ങള്‍ സമ്മാനിച്ചു. ഇതിനുപുറമെ പങ്കെടുത്ത കുട്ടികള്‍ക്കു 'ടോക്കണ്‍ ഓഫ് ലവ്' പ്രത്യേക പുരസ്‌കാരവും സമ്മാനിച്ചു.
വനിതാ വിഭാഗം ജനറല്‍ സെക്രട്ടറി ജാന്‍സി പ്രെഡിന്‍, ട്രഷറര്‍ സെയ്ഫുന്നിസ സിദ്ധീഖ് എക്‌സിക്യൂട്ടീവ് അംഗങ്ങള്‍ ആയ ഷംല റഷീദ്, രശ്മിത ഫൈസല്‍ തുടങ്ങിയവര്‍ പരിപാടികള്‍ക്ക് നേത്യത്വം നല്‍കി.
Related News
