അല്‍ബേനിയയുടെ ആദ്യത്തെ AIനിര്‍മ്മിത സര്‍ക്കാര്‍ മന്ത്രിയെ പ്രഖ്യാപിച്ച് മാസങ്ങള്‍ക്കുശേഷം, പ്രധാനമന്ത്രി എഡി രാമ അവര്‍ 'ഗര്‍ഭിണിയാണ്' എന്ന ഒരു പ്രഖ്യാപനം നടത്തിയിരിക്കുന്നു. എ.ഐ. മന്ത്രിയായ ഡിയേല 83 എ.ഐ. 'കുട്ടികള്‍ക്ക്' 'ജന്മം നല്‍കാന്‍' ഒരുങ്ങുകയാണ്. ജര്‍മ്മനിയിലെ ബെര്‍ലിനില്‍ നടന്ന ഗ്ലോബല്‍ ഡയലോഗില്‍ (BGD) സംസാരിക്കവേയാണ് രാമ ഈ കാര്യം പ്രഖ്യാപിച്ചത്: 'ഇന്ന് ഡിയേലയോടൊപ്പം ഞങ്ങള്‍ ഒരു വലിയ സാഹസം ചെയ്തു, അത് വളരെ നന്നായി. അതിനാല്‍ ആദ്യമായി ഡിയേല ഗര്‍ഭിണിയാണ്, 83 കുട്ടികളോടൊപ്പം, അദ്ദേഹം പറഞ്ഞു. ഈ 'കുട്ടികള്‍,' അഥവാ സഹായികള്‍, പാര്‍ലമെന്റില്‍ നടക്കുന്നതെല്ലാം റെക്കോര്‍ഡ് ചെയ്യുകയും, നിയമസഭാംഗങ്ങള്‍ക്ക് അവര്‍ക്ക് നഷ്ടമാകുന്ന ചര്‍ച്ചകളെക്കുറിച്ചോ സംഭവങ്ങളെക്കുറിച്ചോ വിവരങ്ങള്‍ നല്‍കുകയും ചെയ്യുമെന്ന് രാമ വ്യക്തമാക്കി.

'ഓരോരുത്തരും... പാര്‍ലമെന്റ് സമ്മേളനങ്ങളില്‍ പങ്കെടുക്കുന്നവര്‍ക്ക് ഒരു സഹായിയായി പ്രവര്‍ത്തിക്കും, അവിടെ നടക്കുന്ന എല്ലാ കാര്യങ്ങളുടെയും ഒരു രേഖ സൂക്ഷിക്കുകയും, പാര്‍ലമെന്റ് അംഗങ്ങള്‍ക്ക് നിര്‍ദ്ദേശങ്ങള്‍ നല്‍കുകയും ചെയ്യും. ഈ കുട്ടികള്‍ക്ക് അവരുടെ അമ്മയുടെ അറിവുണ്ടാകും,' രാമ പറഞ്ഞു. 2026 അവസാനത്തോടെ ഈ സംവിധാനം പൂര്‍ണ്ണമായി പ്രവര്‍ത്തനക്ഷമമാകുമെന്നാണ് അദ്ദേഹം പ്രതീക്ഷിക്കുന്നത്.

AI സഹായികള്‍ എങ്ങനെ പ്രവര്‍ത്തിക്കുമെന്നും രാമ വിശദീകരിച്ചു: 'ഉദാഹരണത്തിന്, നിങ്ങള്‍ കാപ്പി കുടിക്കാന്‍ പോയിട്ട് തിരികെ ജോലിക്ക് വരാന്‍ മറന്നാല്‍, നിങ്ങള്‍ ഹാളില്‍ ഇല്ലാതിരുന്നപ്പോള്‍ പറഞ്ഞ കാര്യങ്ങള്‍ എന്തൊക്കെയാണെന്ന് ഈ കുട്ടി പറയും, നിങ്ങള്‍ ആര്‍ക്കെതിരെയാണ് പ്രതിരോധം തീര്‍ക്കേണ്ടതെന്നും പറഞ്ഞുതരും. നിങ്ങള്‍ അടുത്ത തവണ എന്നെ ക്ഷണിക്കുകയാണെങ്കില്‍, ഡിയേലയുടെ കുട്ടികള്‍ക്കായി 83 സ്‌ക്രീനുകള്‍ കൂടി ഇവിടെ ഉണ്ടാകും.'

ഡിയേല ('സൂര്യന്‍' എന്ന് അര്‍ത്ഥം) അല്‍ബേനിയയുടെ പൊതു സംഭരണ സംവിധാനം പൂര്‍ണ്ണമായും സുതാര്യവും അഴിമതിരഹിതവും ആക്കുന്നതിനായി സെപ്റ്റംബറിലാണ് നിയമിക്കപ്പെട്ടത്. ജനുവരിയില്‍ ഇ-അല്‍ബേനിയ പ്ലാറ്റ്ഫോമില്‍ ഒരു വെര്‍ച്വല്‍ അസിസ്റ്റന്റായി ആരംഭിച്ച ഡിയേല പൗരന്മാരെയും ബിസിനസ്സുകളെയും സര്‍ക്കാര്‍ രേഖകള്‍ നേടുന്നതിന് സഹായിച്ചുവരുന്നു. ഈ AI-നിര്‍മ്മിത മന്ത്രിയെ പരമ്പരാഗത അല്‍ബേനിയന്‍ വേഷം ധരിച്ച ഒരു സ്ത്രീയുടെ രൂപത്തിലാണ് കാണിച്ചിരിക്കുന്നത്.

പൊതു ടെന്‍ഡറുകളുമായി ബന്ധപ്പെട്ട എല്ലാ തീരുമാനങ്ങളും എടുക്കുന്ന ചുമതല ഡിയേലയ്ക്ക് നല്‍കിയിട്ടുണ്ട്, ഇത് നടപടിക്രമങ്ങളെ 100 ശതമാനം അഴിമതിരഹിതമാക്കുന്നു. ടെന്‍ഡര്‍ നടപടിക്രമങ്ങള്‍ക്ക് സമര്‍പ്പിക്കുന്ന ഓരോ പൊതു ഫണ്ടും തികച്ചും സുതാര്യമായിരിക്കുമെന്ന് രാമ പറഞ്ഞു. മനുഷ്യനല്ലാത്ത ഒരു സര്‍ക്കാര്‍ മന്ത്രിയെ ഔദ്യോഗികമായി നിയമിക്കുന്ന ലോകത്തിലെ ആദ്യത്തെ രാജ്യമാണ് അല്‍ബേനിയ. ആര്‍ട്ടിഫിഷ്യല്‍ ഇന്റലിജന്‍സിന് വേണ്ടിയുള്ള മന്ത്രി എന്നതിലുപരി, കോഡുകളും പിക്‌സലുകളും മാത്രം ഉള്‍ക്കൊള്ളുന്ന ഒരു AI സ്ഥാപനമാണ് ഡിയേല.