കൊച്ചി: സി.പി.എം ഉദയംപേരൂര്‍ നോര്‍ത്ത് ലോക്കല്‍ കമ്മിറ്റി മുന്‍ സെക്രട്ടറി ടി.എസ്. പങ്കജാക്ഷനെ പാര്‍ട്ടി ഓഫീസിനുള്ളില്‍ മരിച്ച നിലയില്‍ കണ്ടെത്തി. ഉദയംപേരൂര്‍ നടക്കാവ് ലോക്കല്‍ കമ്മിറ്റി ഓഫീസിലെ വായനശാല മുറിയില്‍ തൂങ്ങിമരിച്ച നിലയിലാണ് മൃതദേഹം കണ്ടത്.

രാവിലെ ആറു മണിയോടെ പത്രമിടാന്‍ എത്തിയ ആളാണ് മൃതദേഹം കണ്ട് മറ്റുള്ളവരെ വിവരമറിയിച്ചത്. തുടര്‍ന്ന് പോലീസില്‍ വിവരമറിയിക്കുകയായിരുന്നു. ഫോറന്‍സിക് പരിശോധനയ്ക്ക് ശേഷം തുടര്‍നടപടികള്‍ സ്വീകരിക്കുമെന്ന് പോലീസ് അറിയിച്ചു.

കടബാധ്യത മൂലമുള്ള കടുത്ത മനോവിഷമമാണ് മരണകാരണമെന്നാണ് പോലീസിന്റെ പ്രാഥമിക നിഗമനം. പങ്കജാക്ഷനും ഭാര്യ ഭാസുരദേവിയും സി.പി.എമ്മിന്റെ സജീവ പ്രവര്‍ത്തകരാണ്. ഇന്ത്യന്‍ ഓയില്‍ കോര്‍പ്പറേഷനിലെ (ഐ.ഒ.സി.) ജീവനക്കാരനായിരുന്ന പങ്കജാക്ഷന്‍ ഏതാനും വര്‍ഷം മുമ്പാണ് ഇവിടെനിന്ന് വിരമിച്ചത്. ഐ.ഒ.സി.യിലെ യൂണിയന്‍ ഭാരവാഹിയായും അദ്ദേഹം പ്രവര്‍ത്തിച്ചിട്ടുണ്ട്.