മുംബൈ/ശ്രീനഗര്: പ്രശസ്ത ബോളിവുഡ് ചിത്രം 'ദംഗലി'ലെ നായികയായിരുന്ന സൈറ വസീം വിവാഹിതയായി. വ്യക്തിജീവിതത്തിലെ സുപ്രധാനമായ ഈ വിവരം സാമൂഹ്യ മാധ്യമമായ ഇന്സ്റ്റാഗ്രാമിലൂടെ സൈറ തന്നെയാണ് ആരാധകരുമായി പങ്കുവെച്ചത്.
ഇസ്ലാമിക വിശ്വാസത്തില് ശ്രദ്ധ കേന്ദ്രീകരിക്കുന്നതിനായി 23-ാം വയസ്സില് സിനിമാ മേഖലയോട് വിട പറഞ്ഞ സൈറ, തന്റെ നിക്കാഹ് ചടങ്ങിലെ ഏതാനും ചിത്രങ്ങളാണ് ഇന്സ്റ്റാഗ്രാമില് പോസ്റ്റ് ചെയ്തത്.
രണ്ട് ചിത്രങ്ങളാണ് സൈറ പങ്കുവെച്ചത്. ഒന്നാമത്തെ ചിത്രത്തില് വിവാഹ ഉടമ്പടിയില് (നിക്കാഹ് നാമ) സൈറ ഒപ്പിടുന്ന ദൃശ്യമാണ്. രണ്ടാമത്തെ ചിത്രത്തില് ഭര്ത്താവിനൊപ്പം നില്ക്കുന്ന സൈറയെ കാണാം.
എന്നാല്, ചിത്രങ്ങളിലൊന്നും തന്നെ സൈറയുടെയോ ഭര്ത്താവിന്റെയോ മുഖം വ്യക്തമല്ല. ഭര്ത്താവിനെക്കുറിച്ചുള്ള മറ്റ് വിവരങ്ങളൊന്നും നടി വെളിപ്പെടുത്തിയിട്ടില്ല. കടും ചുവപ്പ് നിറത്തിലുള്ള വസ്ത്രവും സ്വര്ണ്ണ എംബ്രോയ്ഡറിയുള്ള ദുപ്പട്ടയുമാണ് സൈറ ധരിച്ചിരുന്നത്. വരന് ക്രീം നിറത്തിലുള്ള ഷെര്വാണിയാണ് അണിഞ്ഞത്.
പതിനാറാം വയസ്സില് ആമിര് ഖാന് ചിത്രമായ 'ദംഗലി'ലൂടെയാണ് (2016) സൈറ വസീം ശ്രദ്ധേയയായത്. ഗുസ്തിതാരം ഗീത ഫോഗട്ടിന്റെ ചെറുപ്പകാലം അവതരിപ്പിച്ച സൈറക്ക് ഈ പ്രകടനത്തിന് മികച്ച സഹനടിക്കുള്ള ദേശീയ ചലച്ചിത്ര പുരസ്കാരവും ലഭിച്ചു. പിന്നീട് 'സീക്രട്ട് സൂപ്പര്സ്റ്റാര്' എന്ന ചിത്രത്തിലൂടെയും കയ്യടി നേടി. പ്രിയങ്ക ചോപ്രയ്ക്കൊപ്പം അഭിനയിച്ച 'ദി സ്കൈ ഈസ് പിങ്ക്' ആണ് സൈറ അഭിനയിച്ച അവസാന ചിത്രം.
തന്റെ ജോലി മതവിശ്വാസത്തില്നിന്ന് അകറ്റുന്നുവെന്ന് ചൂണ്ടിക്കാട്ടി 2019-ല് സൈറ അഭിനയം നിര്ത്തി. തുടര്ന്ന്, തന്റെ ആരാധക പേജുകളോടും സോഷ്യല് മീഡിയ അക്കൗണ്ടുകളോടും ചിത്രങ്ങള് നീക്കം ചെയ്യണമെന്ന് സൈറ അഭ്യര്ത്ഥിച്ചിരുന്നു. സിനിമാ ജീവിതത്തില് നിന്ന് മാറി പുതിയൊരധ്യായം തുടങ്ങാന് പോവുകയാണെന്നും സൈറ അന്ന് അറിയിച്ചിരുന്നു.
Related News
