ന്യൂഡല്‍ഹി: ചില ഇന്ത്യന്‍ എണ്ണ ശുദ്ധീകരണശാലകള്‍ റഷ്യന്‍ എണ്ണയുടെ ഇറക്കുമതി ഘട്ടം ഘട്ടമായി കുറയ്ക്കാന്‍ ഒരുങ്ങുന്നതായി റോയിട്ടേഴ്സ് വാര്‍ത്താ ഏജന്‍സി റിപ്പോര്‍ട്ട് ചെയ്തു. ഈ വിഷയത്തില്‍, ഇന്ത്യന്‍ ഉപഭോക്താക്കളുടെ താല്‍പ്പര്യങ്ങള്‍ സംരക്ഷിക്കുന്നതിനാണ് ഏറ്റവും മുന്‍ഗണനയെന്ന് വിദേശകാര്യ മന്ത്രാലയം വ്യാഴാഴ്ച വ്യക്തമാക്കി.
'ഇന്ത്യ എണ്ണയുടെയും പ്രകൃതിവാതകത്തിന്റെയും പ്രധാന ഇറക്കുമതി രാജ്യമാണ്. ഊര്‍ജ്ജ രംഗത്തെ നിലവിലെ സാഹചര്യത്തില്‍, ഇന്ത്യന്‍ ഉപഭോക്താക്കളുടെ താല്‍പ്പര്യങ്ങള്‍ സംരക്ഷിക്കുക എന്നത് ഞങ്ങളുടെ സ്ഥിരമായ മുന്‍ഗണനയാണ്. ഞങ്ങളുടെ ഇറക്കുമതി നയങ്ങള്‍ ഈ ലക്ഷ്യത്തെ മാത്രം അടിസ്ഥാനമാക്കിയുള്ളതാണ്,' വിദേശകാര്യ മന്ത്രാലയം പ്രസ്താവനയില്‍ പറഞ്ഞു.
യു.എസ് പ്രസിഡന്റ് ഡൊണാള്‍ഡ് ട്രംപിന്റെ പരാമര്‍ശത്തിന് പിന്നാലെയാണ് ഈ നീക്കം. റഷ്യയില്‍ നിന്നുള്ള എണ്ണ വാങ്ങല്‍ നിര്‍ത്താമെന്ന് പ്രധാനമന്ത്രി നരേന്ദ്ര മോദി തനിക്ക് ഉറപ്പു നല്‍കിയതായി ട്രംപ് പറഞ്ഞിരുന്നു. വാഷിംഗ്ടണും ന്യൂഡല്‍ഹിയും തമ്മിലുള്ള നയതന്ത്ര-വ്യാപാര തര്‍ക്കങ്ങളുടെ കേന്ദ്രബിന്ദുവായി ഈ വിഷയം മാറിയിരുന്നു.
യുക്രെയ്ന്‍ അധിനിവേശത്തെ തുടര്‍ന്ന് കുറഞ്ഞ വിലയില്‍ റഷ്യന്‍ എണ്ണ ലഭ്യമായതോടെ ഇന്ത്യ റഷ്യയുടെ പ്രധാന എണ്ണ ഉപഭോക്താക്കളില്‍ ഒരാളായി മാറിയിരുന്നു. എന്നാല്‍, അടുത്തിടെ റഷ്യന്‍ എണ്ണയ്ക്ക് ലഭിക്കുന്ന വിലക്കുറവില്‍ കുറവ് വന്നതും യു.എസിന്റെ ഭാഗത്തുനിന്നുള്ള സമ്മര്‍ദ്ദവുമാണ് നിലവിലെ മാറ്റങ്ങള്‍ക്ക് പിന്നിലെന്നാണ് സൂചന. ഉപഭോക്താക്കള്‍ക്ക് കുറഞ്ഞ വിലയില്‍ എണ്ണ ലഭ്യമാക്കുക എന്ന നയത്തില്‍ ഇന്ത്യ ഉറച്ചുനില്‍ക്കുമ്പോള്‍ തന്നെ, അന്താരാഷ്ട്ര നയതന്ത്രബന്ധങ്ങളും പുതിയ എണ്ണ ഇടപാടുകളില്‍ ഒരു ഘടകമായി മാറുന്നുണ്ട്.
Related News
