ദോഹ: മനുഷ്യക്കടത്ത് തടയുന്നതിനായി ഗള്‍ഫ് രാജ്യങ്ങളിലെ ഉദ്യോഗസ്ഥര്‍ക്ക് പ്രാദേശിക പരിശീലന പരിപാടി ഖത്തറില്‍ സംഘടിപ്പിച്ചു. തൊഴില്‍ മന്ത്രാലയത്തിലെ മനുഷ്യക്കടത്ത് വിരുദ്ധ ദേശീയ കമ്മിറ്റിയുടെ നേതൃത്വത്തില്‍ വിദേശകാര്യ മന്ത്രാലയത്തിലെ മനുഷ്യാവകാശ വിഭാഗം, അന്താരാഷ്ട്ര തൊഴില്‍ സംഘടന (ILO), അന്താരാഷ്ട്ര കുടിയേറ്റ സംഘടന (IOM) എന്നിവയുടെ സഹകരണത്തോടെയായിരുന്നു പരിപാടി. ഒക്ടോബര്‍ 12 മുതല്‍ 16 വരെ ദോഹയില്‍ നടക്കുന്ന ഈ പരിശീലനത്തില്‍ ഖത്തറിനൊപ്പം മറ്റ് ജിസിസി അംഗരാജ്യങ്ങളിലെ പ്രതിനിധികളും പങ്കെടുക്കുന്നു. മനുഷ്യക്കടത്തിനെതിരായ പ്രതിരോധം, സംരക്ഷണം, നിയമനടപടി, ഇരകള്‍ക്ക് പിന്തുണയും പുനരധിവാസവും തുടങ്ങിയ വിഷയങ്ങളിലാണ് പരിശീലനം.

ഖത്തറിന്റെ 2024-2026 ദേശീയ മനുഷ്യക്കടത്ത് വിരുദ്ധ പദ്ധതിയുടെ ഭാഗമായാണ്പരിപാടി സംഘടിപ്പിക്കുന്നത്. രാജ്യത്തെ വിവിധ സ്ഥാപനങ്ങളുടെയും സിവില്‍ സമൂഹ സംഘടനകളുടെയും ഏകോപനവും പ്രാദേശിക-അന്താരാഷ്ട്ര പങ്കാളിത്തവും ശക്തിപ്പെടുത്തുകയാണ് ഈ പദ്ധതിയിലൂടെ ലക്ഷ്യമിടുന്നത്. നിയമപരമായ സംവിധാനങ്ങള്‍, ആധുനിക അന്വേഷണ രീതികള്‍, ഇരകളെ തിരിച്ചറിയല്‍, പ്രതിരോധ മാര്‍ഗങ്ങള്‍ തുടങ്ങിയ വിഷയങ്ങളില്‍ ആഴത്തിലുള്ള സെഷനുകള്‍ വിദഗ്ധര്‍ കൈകാര്യം ചെയ്തു.

ഖത്തര്‍ സംഘടിപ്പിച്ച ഈ പരിശീലനം മനുഷ്യാവകാശ സംരക്ഷണത്തിലേക്കുള്ള രാജ്യത്തിന്റെ ഉറച്ച പ്രതിബദ്ധതയെ വീണ്ടും തെളിയിക്കുന്നു. മനുഷ്യക്കടത്ത് എന്നത് മനുഷ്യാഭിമാനത്തിനെതിരായ ഏറ്റവും ഗുരുതരമായ കുറ്റങ്ങളിലൊന്നാണെന്നും അതിനെ നേരിടാന്‍ ദേശീയ, പ്രാദേശിക, ആഗോളതലങ്ങളില്‍ ഏകോപിതമായ പ്രവര്‍ത്തനങ്ങള്‍ അനിവാര്യമാണെന്നും പരിപാടിയില്‍ പങ്കെടുത്തവര്‍ അഭിപ്രായപ്പെട്ടു.