ജിദ്ദ: പ്രവാസികള്‍ക്കായി ജിദ്ദ മല്ലൂസ് ചെസ്സ് ആന്റ് മൈലാഞ്ചി മത്സരങ്ങള്‍ സംഘടിപ്പിക്കുന്നു. അബീര്‍ എക്‌സ്പ്രസ്സിന്റെയും അഹ്ദബ് ഇന്റര്‍നാഷാണല്‍ സ്‌കൂളിന്റെയും സഹകരണത്തോടെയാണ് മത്സരങ്ങള്‍ സംഘടിപ്പിക്കുന്നത്. സമൂഹത്തില്‍ നിലനില്‍ക്കുന്ന ചെറുതും വലതുമായ സാമൂഹ്യപ്രശ്‌നങ്ങളെ ആക്ഷേപഹാസ്യത്തിന്റെ മേമ്പൊടി ചേര്‍ത്ത് ജനങ്ങളിലേക്ക് എത്തിക്കുന്ന കൂട്ടായ്മയായ ജിദ്ദ മല്ലൂസ്, 'ഫൂലും തമീസും' എന്ന ഷോര്‍ട്ട് ഫിലിമിനുശേഷം, സാമൂഹിക ബന്ധങ്ങള്‍ ശക്തിപ്പെടുത്താനും മാനസിക ഉല്ലാസം പ്രോത്സാഹിപ്പിക്കാനും ലക്ഷ്യമിട്ടാണ് ചെസ്സ് മത്സരങ്ങളും മൈലാഞ്ചി മത്സരങ്ങളും സംഘടിപ്പിക്കുന്നത്.

പ്രവാസജീവിതത്തില്‍ കുട്ടികളും മുതിര്‍ന്നവരും നേരിടുന്ന മാനസിക സമ്മര്‍ദങ്ങള്‍ക്ക് ചെറുതല്ലാത്ത ആശ്വാസമായാണ് ചെസ്സ് എന്ന കളിയെ ജിദ്ദ മല്ലൂസ് കാണുന്നത്. ചെസ്സ് ഒരു സാധാരണ കളിയല്ല, മറിച്ച് ഏകാഗ്രതയും ബുദ്ധിവികാസവും വളര്‍ത്തുന്ന മികച്ച വിനോദോപാധിയാണ് എന്ന തിരിച്ചറിവാണ് ഇത്തരം മത്സരങ്ങള്‍ സംഘടിപ്പിക്കാന്‍ പ്രേരണയായത്.

അതോടൊപ്പം, ഫ്‌ലാറ്റുകളിലെ തളച്ചിട്ട ചുറ്റുപാടുകളില്‍ നിന്നുള്ള സര്‍ഗസിദ്ധിയുള്ള വീട്ടമ്മമാര്‍ക്ക് അവരുടെ കലാവിരുത് പ്രകടിപ്പിക്കാനുള്ള വേദി ഒരുക്കുക എന്ന ലക്ഷ്യത്തോടെയാണ് മൈലാഞ്ചി മത്സരം സംഘടിപ്പിക്കുന്നത്.

മത്സരങ്ങള്‍ ജിദ്ദ അഹ്ദാബ് ഇന്റര്‍നാഷണല്‍ സ്‌കൂളില്‍ വെച്ച് ഒക്ടോബര്‍ 16 വ്യാഴാഴ്ച വൈകുന്നേരം 6 മണി മുതല്‍ നടത്തപ്പെടും. ഒക്ടോബര്‍ 17 വെള്ളിയാഴ്ച വൈകുന്നേരം 3 മണിക്ക് ചെസ്സ് ഫൈനല്‍ റൗണ്ടു മത്സരങ്ങളും 4 മണിക്ക് കുടുംബിനികള്‍ക്കും കുട്ടികള്‍ക്കുമുള്ള മൈലാഞ്ചി മത്സരങ്ങളും നടക്കുന്നതായിരിക്കും.
മത്സരങ്ങള്‍ രണ്ട് വിഭാഗങ്ങളായിട്ടാണ് നടത്തപ്പെടുന്നത്.

ജൂനിയര്‍ വിഭാഗം: 18 വയസ്സിന് താഴെയുള്ളവര്‍ക്കും സീനിയര്‍ വിഭാഗം 18 വയസ്സിന് മുകളിലുള്ളവര്‍ക്കുമായിരിക്കും. വിജയികള്‍ക്ക് ആകര്‍ഷകമായ സ്വര്‍ണ്ണ നാണയങ്ങള്‍ സമ്മാനമായി നല്‍കുമെന്നും ബന്ധപ്പെട്ടവര്‍ അറിയിച്ചു.

പ്രവാസി സമൂഹത്തിനായി സാംസ്‌കാരിക മേളകളെയും സാമൂഹിക സന്ദേശങ്ങളെയും കൂട്ടിചേര്‍ത്ത് ആത്മീയതയും സൗഹൃദവും നിറഞ്ഞ ഒരു വേദി ഒരുക്കുകയാണ് ജിദ്ദ മല്ലൂസ്.

ഭാരവാഹികളായ അയ്യൂബ് മുസ്ലിയാരകത്ത്, ഡോ. ഇന്ദു ചന്ദ്രശേഖരന്‍, നാസര്‍ ശാന്തപുരം, നൗഷാദ് ചാത്തല്ലൂര്‍, മത്സരങ്ങളുടെ മുഖ്യ പ്രായോജകരായ അഹ്ദാബ് ഇന്റര്‍ നാഷണല്‍ സകൂള്‍ മാനേജിംഗ് ഡയറക്ടര്‍ സുലൈമാന്‍ ഹാജി, പ്രിന്‍സിപ്പല്‍ അന്‍വര്‍ ഷജ എന്നിവര്‍ പത്രസമ്മേളനത്തില്‍ പങ്കെടുത്തു. മത്സരത്തില്‍ പങ്കെടുക്കുവാന്‍ താല്പര്യമുള്ളവര്‍ക്ക്
0507847327, 0535249251, 0535628140, 0556945747 എന്ന നമ്പറുകളിളും, https://forms.gle/UyNLA4c6wnLP4f6h9 എന്ന ലിങ്ക് ലൂടെയും രജിസ്റ്റര്‍ ചെയ്യാവുന്നതാണ്.