ജിദ്ദ: വ്യാജ ഓട്ടോ പാര്‍ട്സുകള്‍ കൈവശം വെക്കുകയും വില്‍ക്കുകയും ചെയ്ത കേസില്‍ ഓട്ടോ പാര്‍ട്സ് കമ്പനി ഡയറക്ടര്‍ക്ക് വാണിജ്യ മന്ത്രാലയം പിഴ ശിക്ഷ വിധിച്ചു. വാണിജ്യ വഞ്ചനയ്ക്കും വാണിജ്യ ഡാറ്റാ നിയമം ലംഘിച്ചതിനുമാണ് കോടതി ഇവരെ ശിക്ഷിച്ചത്.

ജിദ്ദ കോര്‍ട്ട് ഓഫ് അപ്പീല്‍ വിധി ശരിവെച്ചു. ഇതനുസരിച്ച് സ്ഥാപനത്തിനും ഡയറക്ടര്‍ക്കും ചേര്‍ന്ന് 20,000 റിയാല്‍ പിഴ ചുമത്തി. നിയമം ലംഘിച്ച സ്ഥാപനം ഒരാഴ്ചത്തേക്ക് അടച്ചുപൂട്ടാനും, ഈ വിധി പൂര്‍ണമായി പ്രതികളുടെ ചിലവില്‍ പ്രസിദ്ധീകരിക്കാനും ഉത്തരവിട്ടു.

വാണിജ്യ വഞ്ചന ചെറുക്കുന്നതിനും നിയമലംഘകര്‍ക്കെതിരെ ശിക്ഷ നടപ്പിലാക്കുന്നതിനും പ്രതിജ്ഞാബദ്ധരാണെന്ന് വാണിജ്യ മന്ത്രാലയം വ്യക്തമാക്കി. നിയമപ്രകാരം മൂന്ന് വര്‍ഷം വരെ തടവ്, ഒരു ദശലക്ഷം റിയാല്‍ വരെ പിഴ, അല്ലെങ്കില്‍ ഇവ രണ്ടും എന്നിവ ശിക്ഷയായി ലഭിക്കാവുന്നതാണ്.