മസ്‌കത്ത്: തൊഴില്‍ പെര്‍മിറ്റ് പുതുക്കിയ ശേഷം തൊഴില്‍ കരാര്‍ രജിസ്റ്റര്‍ ചെയ്യാത്ത സാഹചര്യങ്ങളില്‍ വിദേശ തൊഴിലാളികള്‍ക്ക് സ്ഥാപനം മാറാന്‍ അവസരം നല്‍കി ഒമാന്‍ തൊഴില്‍ മന്ത്രാലയം. പ്രവാസികള്‍ക്ക് വലിയ ആശ്വാസം നല്‍കുന്നതാണ് മന്ത്രാലയത്തിന്റെ ഈ സുപ്രധാന നീക്കം. വിദേശ തൊഴിലാളികളുടെ വര്‍ക്ക് പെര്‍മിറ്റ് തൊഴില്‍ കരാര്‍ (Labour Contract) സിസ്റ്റത്തില്‍ രജിസ്റ്റര്‍ ചെയ്യാതെ പുതുക്കുകയാണെങ്കില്‍, ആ തൊഴിലാളികള്‍ക്ക് മറ്റൊരു തൊഴിലുടമയിലേക്ക് (കഫീല്‍) മാറാനുള്ള അവകാശം ലഭിക്കും.
അവസരം എപ്പോള്‍: വര്‍ക്ക് പെര്‍മിറ്റ് പുതുക്കിയ തീയതി മുതല്‍ ഒരു മാസത്തിനകം നിലവിലെ തൊഴിലുടമ കരാര്‍ ഫയല്‍ ചെയ്തില്ലെങ്കില്‍ തൊഴിലാളിക്ക് ഈ ആനുകൂല്യം പ്രയോജനപ്പെടുത്താം. വര്‍ക്ക് പെര്‍മിറ്റ് സജീവമാണെങ്കിലും, അതനുസരിച്ചുള്ള തൊഴില്‍ കരാര്‍ സിസ്റ്റത്തില്‍ രജിസ്റ്റര്‍ ചെയ്തില്ലെങ്കില്‍ നിയമം ബാധകമാകും.
തൊഴിലുടമകള്‍ക്ക് മുന്നറിയിപ്പ്
കരാര്‍ രജിസ്റ്റര്‍ ചെയ്യാതെ വര്‍ക്ക് പെര്‍മിറ്റ് പുതുക്കുന്നതിനെതിരെ എല്ലാ തൊഴിലുടമകള്‍ക്കും മന്ത്രാലയം മുന്നറിയിപ്പ് നല്‍കിയിട്ടുണ്ട്. തൊഴിലാളിയുടെ അവകാശങ്ങള്‍ സംരക്ഷിക്കുന്നതിനും തൊഴില്‍ ബന്ധങ്ങള്‍ നിയമപരമായി ക്രമീകരിക്കുന്നതിനും വേണ്ടിയാണ് പുതിയ പരിഷ്‌കരണം. തൊഴിലുടമകള്‍ ഈ നിര്‍ദ്ദേശങ്ങള്‍ കര്‍ശനമായി പാലിക്കണമെന്ന് മന്ത്രാലയം ചൂണ്ടിക്കാട്ടി. ഈ ഭേദഗതി തൊഴില്‍ മേഖലയില്‍ കൂടുതല്‍ സുതാര്യത ഉറപ്പാക്കുമെന്നാണ് പ്രതീക്ഷിക്കുന്നത്.
Related News
