ചെന്നൈ: തമിഴ്നാട്ടിലെ എണ്ണൂരില്‍ നിര്‍മ്മാണത്തിലിരുന്ന താപ വൈദ്യുത നിലയത്തിലെ കെട്ടിടം തകര്‍ന്നു വീണ് ഒമ്പത് തൊഴിലാളികള്‍ മരിച്ചു. നിരവധി പേര്‍ക്ക് പരിക്കേറ്റു. സ്റ്റീല്‍ കമാനം സ്ഥാപിക്കുന്നതിനിടെ വൈകിട്ട് 5.30-ഓടെയാണ് അപകടം നടന്നത്. 30 അടി ഉയരത്തില്‍ നിന്ന് വീണ കമാനത്തിന്റെ അടിയില്‍ തൊഴിലാളികള്‍ കുടുങ്ങുകയായിരുന്നു.

അപകടത്തില്‍പ്പെട്ടവരെല്ലാം അസമില്‍ നിന്നുള്ള തൊഴിലാളികളാണ്. അപകടസമയത്ത് സ്ഥലത്തുണ്ടായിരുന്ന 10 പേരില്‍ 9 പേര്‍ മരിക്കുകയും ഒരാള്‍ക്ക് ഗുരുതരമായി പരിക്കേല്‍ക്കുകയും ചെയ്തു. മറ്റ് ചിലര്‍ക്കും പരിക്കേറ്റു. പരിക്കേറ്റവരെ ചെന്നൈയിലെ സ്റ്റാന്‍ലി സര്‍ക്കാര്‍ ആശുപത്രിയില്‍ പ്രവേശിപ്പിച്ചു. അപകടത്തെക്കുറിച്ച് ആവഡി പൊലീസ് അന്വേഷണം ആരംഭിച്ചു.