ദുബായ്- ഇന്ത്യ-ബംഗ്ലാദേശ് ഏഷ്യാ കപ്പ് സൂപ്പര്‍ ഫോര്‍ പോരാട്ടത്തിന് ശേഷം കളിക്കാര്‍ പരമ്പരാഗതമായി കൈ കൊടുക്കുമോ ഇല്ലയോ എന്നതിനെക്കുറിച്ച് സമൂഹമാധ്യമങ്ങളില്‍ വലിയ ചര്‍ച്ച നടന്നിരുന്നു. മത്സരത്തിന് ശേഷം കൈ കൊടുക്കാന്‍ കളിക്കാര്‍ വിസമ്മതിക്കുമോ എന്ന ആകാംക്ഷയായിരുന്നു എല്ലാവര്‍ക്കും.

എന്നാല്‍, മാധ്യമ റിപ്പോര്‍ട്ടറായ പ്രത്യുഷ് രാജ് ഗ്രൗണ്ടില്‍നിന്ന് പകര്‍ത്തിയ ഒരു ചിത്രം ഈ അഭ്യൂഹങ്ങള്‍ക്ക് വിരാമമിട്ടു. ഇന്ത്യ 41 റണ്‍സിന് വിജയിച്ചതിന് ശേഷം ഇരു ടീമിലെയും കളിക്കാര്‍ കൈ കൊടുത്തുകൊണ്ട് സ്‌പോര്‍ട്ടിങ് സ്പിരിറ്റ് ഉയര്‍ത്തിപ്പിടിച്ചു.

നേരത്തെ പാകിസ്ഥാന്‍ താരം സല്‍മാന്‍ ആഗായുമായി ഇന്ത്യയുടെ നായകന്‍ സൂര്യകുമാര്‍ യാദവ് രണ്ട് തവണ കൈ കൊടുക്കാതെ ഒഴിഞ്ഞുമാറിയതാണ് ഈ ചര്‍ച്ചകള്‍ക്ക് കാരണം. ഗ്രൂപ്പ് ഘട്ടത്തിലും സൂപ്പര്‍ ഫോര്‍ മത്സരത്തിലും സൂര്യ കൈ കൊടുക്കാതെ കളി നിയന്ത്രിക്കുന്നവരുമായി മാത്രം സൗഹൃദം പങ്കിട്ടിരുന്നു. എന്നാല്‍, ദുബായില്‍ നടന്ന മത്സരത്തില്‍ ടോസിടുമ്പോള്‍ സൂര്യയും ബംഗ്ലാദേശിന്റെ നായകന്‍ ജാക്കര്‍ അലിയും ഹസ്തദാനം ചെയ്തു. മത്സരം അവസാനിച്ചതിന് ശേഷവും ഇരു ടീമുകളും പ്രോട്ടോക്കോള്‍ പാലിച്ചു.

ഇരു ടീമുകള്‍ക്കുമിടയില്‍ ശത്രുതയല്ല, മറിച്ച് മത്സരബുദ്ധിയുള്ള ക്രിക്കറ്റ് മാത്രമാണ് ഉള്ളതെന്ന് പരസ്പര ബഹുമാനം പ്രകടമാക്കുന്ന ഈ ചിത്രങ്ങള്‍ ഓര്‍മ്മിപ്പിക്കുന്നു.

മത്സരത്തില്‍, അഭിഷേക് ശര്‍മ്മയുടെ തകര്‍പ്പന്‍ പ്രകടനമാണ് ഇന്ത്യയെ ഫൈനലിലേക്ക് നയിച്ചത്. 37 പന്തില്‍ 75 റണ്‍സെടുത്ത അഭിഷേക് ആറു ഫോറുകളും അഞ്ചു സിക്‌സറുകളും പറത്തി. ഹാര്‍ദിക് പാണ്ഡ്യ (38), ശുഭ്മാന്‍ ഗില്‍ (29) എന്നിവരുടെ പിന്തുണയോടെ ഇന്ത്യ 168/6 എന്ന സ്‌കോറിലെത്തി.

ബംഗ്ലാദേശിന് വേണ്ടി സൈഫ് ഹസന്‍ (69) മാത്രമാണ് പൊരുതി നിന്നത്. കുല്‍ദീപ് യാദവ് (3/18), വരുണ്‍ ചക്രവര്‍ത്തി (2/29) എന്നിവര്‍ ബംഗ്ലാദേശ് ബാറ്റ്‌സ്മാന്‍മാരെ കുഴപ്പത്തിലാക്കി. ജസ്പ്രീത് ബുംറയും (2/18) തിളങ്ങി. 19.3 ഓവറില്‍ 127 റണ്‍സിന് ബംഗ്ലാദേശ് ഓള്‍ ഔട്ടായി.

ഈ വിജയത്തോടെ ഇന്ത്യ ഏഷ്യാ കപ്പ് ഫൈനലില്‍ പ്രവേശിക്കുന്ന ആദ്യ ടീമായി. വ്യാഴാഴ്ച നടക്കുന്ന ബംഗ്ലാദേശ്-പാകിസ്ഥാന്‍ പോരാട്ടം ഫൈനലിലെ ഇന്ത്യയുടെ എതിരാളിയെ തീരുമാനിക്കും. മൂന്നാമത്തെ ഇന്ത്യപാകിസ്ഥാന്‍ പോരാട്ടത്തിനാണ് സാധ്യത.