ദഹ്റാന്‍ -അറബ് ലോകത്തെ പ്രശസ്ത ഗായിക അഹ്ലാം സൗദി ദേശീയ ദിനാഘോഷത്തോട് അനുബന്ധിച്ച് സംഗീത പരിപാടി അവതരിപ്പിച്ചു. 'നമ്മുടെ അഭിമാനം നമ്മുടെ സ്വഭാവം' എന്ന പ്രമേയത്തില്‍ ദഹ്റാന്‍ എക്സ്പോ തിയേറ്ററില്‍ നടന്ന പരിപാടിയില്‍ നൂറുകണക്കിന് ആളുകളാണ് പങ്കെടുത്തത്. ജനറല്‍ എന്റര്‍ടൈന്‍മെന്റ് അതോറിറ്റിയുടെ നേതൃത്വത്തില്‍ നടന്ന ഈ പരിപാടി സൗദിയിലെ കലാപരമായ മുന്നേറ്റത്തിനും ദേശീയ സ്വത്വം ആഘോഷിക്കുന്നതിനും കൂടുതല്‍ ഊര്‍ജ്ജം പകര്‍ന്നു.
സംഗീതജ്ഞന്‍ മെദ്ഹത് ഖാമിസിന്റെ നേതൃത്വത്തില്‍ നാല് മണിക്കൂര്‍ നീണ്ടുനിന്ന പരിപാടിയില്‍ അഹ്ലാം മുപ്പതിലധികം ഗാനങ്ങള്‍ ആലപിച്ചു. സ്വന്തം ഗാനങ്ങള്‍ക്കൊപ്പം 'തോഷുഹ് ബില്‍ ഖുദാര്‍', 'അംജദ്ന' തുടങ്ങിയ ക്ലാസിക് ദേശഭക്തി ഗാനങ്ങളും അവര്‍ ആലപിച്ചു. ദേശഭക്തി ഗാനങ്ങള്‍ സദസ്സില്‍ ആവേശം നിറച്ചു. നിറഞ്ഞ സദസ്സ് ഗായികയോടൊപ്പം പാടി ദേശീയതയുടെ അഭിമാന നിമിഷങ്ങള്‍ ആഘോഷിച്ചു.
പരിപാടി കാണാന്‍ വലിയ ജനക്കൂട്ടമാണ് എത്തിയത്. ടിക്കറ്റുകള്‍ വിതരണം ആരംഭിച്ചയുടന്‍ വിറ്റുതീര്‍ന്നതിനാല്‍ കൂടുതല്‍ സീറ്റുകള്‍ ക്രമീകരിക്കേണ്ടി വന്നു. സൗദിയിലെ ആരാധകര്‍ക്കിടയില്‍ അഹ്ലാമിനുള്ള സ്വീകാര്യതയാണ് ഇത് കാണിക്കുന്നത്. സംഗീതവും ദേശീയതയും ഒരുമിച്ച് ചേര്‍ന്ന ഈ ദിനം അവിസ്മരണീയമായ അനുഭവമായി മാറി.
Related News
