അല്‍ ഖോബാര്‍ : 95 ാമത് ദേശീയ ദിനാഘോഷ വേളയില്‍ സൗദി അറേബ്യയെ ലോകത്തിന്റെ നെറുകയിലെത്തിച്ച് ലുലു. അല്‍ ഖോബര്‍ ന്യൂ കോര്‍ണീഷിന് ഗിന്നസ് നേട്ടം സമ്മാനിച്ചാണ് ലുലു ഹൈപ്പര്‍മാര്‍ക്കറ്റിന്റെ ഈ വേറിട്ട ആദരം. അല്‍ ഖോബര്‍ ന്യൂ കോര്‍ണീഷില്‍ സൗദി ദേശീയ ദിനാഘോഷങ്ങളുടെ ഭാഗമായി തീര്‍ത്ത ഏറ്റവും വലിയ ഷാറ്റേര്‍ഡ് ഗ്ലാസ് ആര്‍ട്ടാണ് ഗിന്നസ് ലോക റെക്കോര്‍ഡില്‍ ഇടം പിടിച്ചത്.
ദേശീയ ദിനാഘോഷത്തോടനുബന്ധിച്ച് പുറത്തിറക്കിയ ഔദ്യോഗിക ചിഹ്നം ആലേഖനം ചെയ്ത കലാസൃഷ്ടി ഖോബര്‍ മുനിസിപ്പാലിറ്റിയുടെയും യൂണിലിവറിന്റെയും (കംഫര്‍ട്ട് ) സഹകരണത്തോടെയാണ് തയ്യാറാക്കിയത്. രാജ്യത്തിന്റെ അഭിമാനവും പാരമ്പര്യവും ഐക്യവും അടയാളപ്പെടുത്തുന്ന ഗ്ലാസ് ആര്‍ട്ട് ഖോബര്‍ മുനിസിപ്പാലിറ്റിക്ക് സമ്മാനിച്ചു. ഇതോടെ കിഴക്കന്‍ പ്രവിശ്യയെ ചരിത്ര പ്രസക്തിയോടെ അടയാളപ്പെടുത്തുന്ന അഭിമാന ചിഹ്നമായി കൂടി ഗ്ലാസ് ആര്‍ട്ട് മാറി.
നൂതനവും വേറിട്ടതുമായ ഷാറ്റേര്‍ഡ് ഗ്ലാസ് പെയിന്റിംഗ് സൃഷ്ടികളിലൂടെ പ്രശസ്തനായ സൗദി ദൃശ്യ കലാകാരന്‍ അസീല്‍ അല്‍-മുഗ്‌ളൗത്താണ് ഈ അതുല്യ കലാസൃഷ്ടിക്ക് രൂപം നല്‍കിയത്. എഞ്ചിനീയറിംഗ് വൈദഗ്ധ്യവും കലയും സംയോജിപ്പിച്ച് ഗ്ലാസ് ആര്‍ട്ടിലൂടെ മനോഹര കലാസൃഷ്ടികളൊരുക്കുന്നതില്‍ സൗദിയിലും അറബ് ലോകത്തുടനീളവും അംഗീകരിക്കപ്പെട്ട കലാകാരന്‍ കൂടിയാണ് അസീല്‍.
അല്‍ ഖോബര്‍ ന്യൂ കോര്‍ണിഷില്‍ നടന്ന ചടങ്ങില്‍ അല്‍ഖോബര്‍ മുനിസിപ്പാലിറ്റി ബിസിനസ് ഡെവലപ്‌മെന്റ് മാനേജര്‍ നെയ്ഫ് അല്‍-സുവെയ്, മീഡിയ ആന്‍ഡ് കോര്‍പറേറ്റ് കമ്മ്യൂണിക്കേഷന്‍സ് മാനേജര്‍ സുല്‍ത്താന്‍ അല്‍-ഒതെയ്ബി, ലുലു സൗദി ഹൈപ്പര്‍മാര്‍ക്കറ്റ് സ് ഡയറക്ടര്‍ മുഹമ്മദ് ഹാരിസ്, ഈസ്റ്റേണ്‍ പ്രൊവിന്‍സ് റീജണല്‍ ഡയറക്ടര്‍ ഷംനാസ് പള്ളിക്കണ്ടി, എക്‌സിക്യൂട്ടീവ് മാനേജര്‍ എഞ്ചിനീയര്‍ മുഹമ്മദ് അഹമ്മദ് അബ്ദുള്‍ ജലീല്‍ ബുബുഷെയ്ത് തുടങ്ങി വിശിഷ്ടാതിഥികളും, മുതിര്‍ന്ന ഉദ്യോഗസ്ഥരും സന്നിഹിതരായിരുന്നു.
ദേശീയ ദിനാഘോഷ വേളയില്‍ സൗദിയുടെ അഭിമാനവും പാരമ്പര്യവും ഉയര്‍ത്തിപ്പിടിക്കുന്ന അഭിമാനകരമായ കലാസൃഷ്ടിയൊരുക്കിയതിനും ഗിന്നസ് സമ്മാനിച്ചതിനും ലുലുവിനെ അഭിനന്ദിക്കുന്നതായി അല്‍ഖോബര്‍ മുനിസിപ്പാലിറ്റി ബിസിനസ് ഡെവലപ്‌മെന്റ് മാനേജര്‍ നെയ്ഫ് അല്‍-സുവെയ് പറഞ്ഞു. ലോകത്തെ ഏറ്റവും വലിയ ഗ്ലാസ് ആര്‍ട്ടിലൂടെ സൗദി ദേശീയ ദിനാഘോഷം ഗംഭീരമാക്കാന്‍ കഴിഞ്ഞതില്‍ അഭിമാനമെന്ന് ലുലു സൗദി ഹൈപ്പര്‍മാര്‍ക്കറ്റ് സ് ഡയറക്ടര്‍ മുഹമ്മദ് ഹാരിസ് വ്യക്തമാക്കി. സൗദിയിലെ ജനങ്ങളോടുളള ആത്മാര്‍ത്ഥമായ ആദരമാണ് ഈ കലാസൃഷ്ടി. അകമഴിഞ്ഞ പിന്തുണ നല്‍കിയ ഖോബര്‍ മുനിസിപ്പാലിറ്റി, യൂണിലിവര്‍, ജനറല്‍ എന്റര്‍ടെയ്ന്‍മെന്റ് അതോറിറ്റി, കലാകാരന്‍ അസീല്‍ അല്‍-മുഗ്‌ളൗത്ത് എന്നിവര്‍ക്ക് നന്ദിയെന്നും അദ്ദേഹം കൂട്ടിച്ചേര്‍ത്തു.
Related News
