ജിദ്ദ- ഡിജിറ്റല്‍ ബാങ്കുകള്‍ക്ക് ലൈസന്‍സ് ലഭിച്ചതിന് പിന്നാലെ, ഈ ബാങ്കുകളിലേക്ക് പണം കൈമാറ്റം ചെയ്യുന്നതിന് സൗദി ബാങ്കുകള്‍ ഫീസ് ഈടാക്കിത്തുടങ്ങി. ഇ-വാലറ്റുകളിലേക്ക് പണം റീചാര്‍ജ് ചെയ്യുന്നതിന് പകരം, ബാങ്ക് അക്കൗണ്ടുകളിലേക്ക് പണം ട്രാന്‍സ്ഫര്‍ ചെയ്യുന്നതിനുള്ള നിബന്ധനകള്‍ ബാധകമാക്കിയാണ് ഈ നീക്കം.

ഈ ബാങ്കുകളില്‍ ഏറ്റവും മുന്നില്‍ അല്‍-റജ്ഹി ബാങ്കാണ്. മുറാബഹ കാര്‍ഡുകള്‍ ഉപയോഗിച്ച് STC, D360 ബാങ്കുകളിലേക്ക് പണം റീചാര്‍ജ് ചെയ്യുന്നതിന് 3% ഫീസോ അല്ലെങ്കില്‍ പരമാവധി 75 റിയാലോ ഇവര്‍ ഈടാക്കുന്നുണ്ട്. അതേസമയം, അല്‍-അവ്വല്‍ ബാങ്ക് അഡ്വാന്‍സ് കാര്‍ഡിന് 3% ഫീസ് ഏര്‍പ്പെടുത്തിയിട്ടുണ്ട്, പരമാവധി 75 റിയാലാണ് ഇതിന്റെ നിരക്ക്. എന്നാല്‍, മാസ്റ്റര്‍കാര്‍ഡ് വിഭാഗത്തിന് ഫീസ് ഈടാക്കുന്നില്ല. അറബ് ബാങ്കും 3% ഫീസ് ഈടാക്കുന്നു, പരമാവധി 86 റിയാലാണ് ഈ ബാങ്കിലെ നിരക്ക്.

അതേസമയം, മറ്റു ചില ബാങ്കുകള്‍, അതായത് അല്‍-അഹ് ലി, അല്‍-ബിലാദ്, അല്‍-അവ്വല്‍, അല്‍-ജസീറ, ഫ്രാന്‍സി, അല്‍-ഇന്‍മ, റിയാദ്, ഇന്‍വെസ്റ്റ്മെന്റ് ബാങ്ക് എന്നിവ ഈ സേവനം സൗജന്യമായി തുടരുന്നു.

സൗദി സെന്‍ട്രല്‍ ബാങ്ക് ഈ വര്‍ഷം ആദ്യം പുറത്തിറക്കിയ ക്രെഡിറ്റ് കാര്‍ഡ് നിയമങ്ങളാണ് ഈ മാറ്റങ്ങള്‍ക്ക് കാരണം. ഇ-വാലറ്റ് റീചാര്‍ജുകള്‍ക്കും ബാങ്ക് അക്കൗണ്ടുകളിലേക്കുള്ള ട്രാന്‍സ്ഫറുകള്‍ക്കും വ്യത്യസ്ത മാനദണ്ഡങ്ങള്‍ നിശ്ചയിച്ചുകൊണ്ടുള്ളതായിരുന്നു പുതിയ നിയമങ്ങള്‍. ഇ-വാലറ്റ് റീചാര്‍ജുകള്‍ക്ക് ഫീസ് ഈടാക്കാന്‍ പാടില്ലെന്നും, എന്നാല്‍ ബാങ്ക് അക്കൗണ്ട് ട്രാന്‍സ്ഫറുകള്‍ക്ക് നികുതി ഒഴികെ 3% വരെ ഫീസ് ഈടാക്കാമെന്നും ഈ നിയമങ്ങളില്‍ വ്യവസ്ഥ ചെയ്യുന്നു.

ഈ വ്യത്യാസം ബാങ്കുകള്‍ക്ക് വ്യത്യസ്തമായ നയം നടപ്പാക്കാന്‍ അവസരം നല്‍കി. ഇത് ഉപഭോക്താക്കളെ നേരിട്ട് ബാധിക്കുകയും ചെയ്തു. സേവനം സൗജന്യമായി നിലനിര്‍ത്തിയ ബാങ്കുകളും ഫീസ് ഈടാക്കിയ ബാങ്കുകളും തമ്മില്‍ വിപണിയില്‍ വലിയ വ്യത്യാസത്തിന് ഇത് കാരണമായി.

നിലവിലെ സാഹചര്യം സൗദി ബാങ്കിംഗ് മേഖലയിലെ മാറ്റത്തെയാണ് സൂചിപ്പിക്കുന്നത്. ഡിജിറ്റല്‍ പേയ്മെന്റുകള്‍ക്ക് വലിയ വേഗം കൈവരിക്കുന്ന സമയത്ത്, പുതിയ ഫീസുകള്‍ ഡിജിറ്റല്‍ ബാങ്കുകളുടെ വളര്‍ച്ചയെ എങ്ങനെ ബാധിക്കുമെന്ന ചോദ്യമുയരുന്നുണ്ട്. മത്സരം വര്‍ദ്ധിപ്പിക്കുന്നതിന് ഈ മേഖല പൂര്‍ണമായി ഫീസ് ഏര്‍പ്പെടുത്തുമോ അതോ ഫീസ് ഇളവ് നല്‍കുന്ന പഴയ രീതിയിലേക്ക് മടങ്ങുമോ എന്ന് കാത്തിരുന്ന് കാണേണ്ടിയിരിക്കുന്നു.