ന്യൂഡല്‍ഹി: ഇന്ത്യയിലെ മുന്‍നിര കാര്‍ നിര്‍മാതാക്കളായ മാരുതി സുസുകി ഇന്ത്യ, ജി.എസ്.ടി നിരക്കുകളില്‍ വന്ന മാറ്റങ്ങളെത്തുടര്‍ന്ന് തങ്ങളുടെ മോഡലുകളുടെ വില ഗണ്യമായി കുറച്ചു. ജി.എസ്.ടി ഇളവുകളുടെ പൂര്‍ണ പ്രയോജനം കമ്പനി ഉപഭോക്താക്കള്‍ക്ക് കൈമാറിയതോടെ, സെപ്റ്റംബര്‍ 22 മുതല്‍ സ്വിഫ്റ്റ്, ഡിസയര്‍, ബലേനോ, ഫ്രോങ്സ്, ബ്രെസ്സ തുടങ്ങിയ ജനപ്രിയ മോഡലുകള്‍ക്ക് 1.29 ലക്ഷം രൂപ വരെ കുറവ് വരുത്തി. പുതുക്കിയ വിലകള്‍ എക്‌സ്-ഷോറൂം അടിസ്ഥാനത്തിലുള്ളതാണ്.

മാരുതിയുടെ അരീന, നെക്‌സ ശൃംഖലകളിലെ എല്ലാ വാഹനങ്ങള്‍ക്കും വിലക്കുറവ് ബാധകമാണ്. അരീന മോഡലുകളായ ആള്‍ട്ടോ കെ10, എസ്-പ്രസ്സോ, വാഗണ്‍ആര്‍, സെലെറിയോ, ഈക്കോ, സ്വിഫ്റ്റ്, ഡിസയര്‍, ബ്രെസ്സ, എര്‍ട്ടിഗ എന്നിവയ്ക്കും നെക്‌സ മോഡലുകളായ ഇഗ്‌നിസ്, ബലേനോ, ഫ്രോങ്സ്, ജിംനി, ഗ്രാന്‍ഡ് വിറ്റാര, എക്‌സ്എല്‍6, ഇന്‍വിക്ടോ എന്നിവയ്ക്കും വില കുറഞ്ഞിട്ടുണ്ട്. രാജ്യത്തുടനീളം 4,000-ത്തിലധികം അരീന ഷോറൂമുകളും 700-ല്‍ അധികം നെക്‌സ ഷോറൂമുകളും മാരുതിക്ക് സ്വന്തമായുണ്ട്.

മോഡല്‍ തിരിച്ചുള്ള വിലക്കുറവ്:

പുതിയ ജിഎസ്ടി 2.0 വ്യവസ്ഥ അനുസരിച്ച് എക്‌സ്-ഷോറൂം വിലയില്‍ വന്ന മാറ്റങ്ങള്‍ താഴെ പറയുന്നവയാണ്:

അരീന മോഡലുകള്‍:

ആള്‍ട്ടോ കെ10: 1,07,600 രൂപ വരെ കുറവ്

എസ്-പ്രസ്സോ: 1,29,600 രൂപ

വാഗണ്‍ആര്‍: 79,600 രൂപ

സെലെറിയോ: 94,100 രൂപ

ഈക്കോ: 68,000 രൂപ

സ്വിഫ്റ്റ്: 84,600 രൂപ

ഡിസയര്‍: 87,700 രൂപ

ബ്രെസ്സ: 1,12,700 രൂപ

എര്‍ട്ടിഗ: 46,400 രൂപ

നെക്‌സ മോഡലുകള്‍:

ഇഗ്‌നിസ്: 71,300 രൂപ

ബലേനോ: 86,100 രൂപ

ഫ്രോങ്സ്: 1,12,600 രൂപ

ജിംനി: 51,900 രൂപ

ഗ്രാന്‍ഡ് വിറ്റാര: 1,07,000 രൂപ

എക്‌സ്എല്‍6: 52,000 രൂപ

ഇന്‍വിക്ടോ: 61,700 രൂപ

ജി.എസ്.ടി നിരക്കുകള്‍ പുനഃക്രമീകരിച്ചതിലൂടെ ഹൈബ്രിഡ്, ഇന്റേണല്‍ കംബഷന്‍ എഞ്ചിന്‍ വാഹനങ്ങള്‍ക്ക് പുതിയ രണ്ട് നികുതി സ്ലാബുകള്‍ നിലവില്‍ വന്നു. കോംപാക്ട് എസ്.യു.വികള്‍, ഹാച്ച്ബാക്കുകള്‍, കോംപാക്ട് സെഡാനുകള്‍ എന്നിവയ്ക്ക് 18 ശതമാനവും വലിയ, ആഡംബര കാറുകള്‍ക്ക് 40 ശതമാനവുമാണ് പുതിയ നിരക്ക്. പുതിയ സംവിധാനത്തില്‍ വാഹനങ്ങള്‍ക്ക് മേലുള്ള കോമ്പന്‍സേഷന്‍ സെസ് പൂര്‍ണമായി ഒഴിവാക്കിയിട്ടുണ്ട്.

നേരത്തെ, ജിഎസ്ടി 1.0 ഘടനയില്‍ ICE, ഹൈബ്രിഡ് വാഹനങ്ങള്‍ക്ക് 28% ജി.എസ്.ടിക്ക് പുറമെ വാഹനത്തിന്റെ നീളം, എഞ്ചിന്‍ ശേഷി, ബോഡി ടൈപ്പ് എന്നിവ അനുസരിച്ച് 1% മുതല്‍ 22% വരെ കോമ്പന്‍സേഷന്‍ സെസ് ഈടാക്കിയിരുന്നു. ഇതുമൂലം ആകെ നികുതിഭാരം 29% മുതല്‍ 50% വരെയായിരുന്നു. കോമ്പന്‍സേഷന്‍ സെസ് ഒഴിവാക്കിയതും ജി.എസ്.ടി സ്ലാബുകള്‍ ലളിതമാക്കിയതും എല്ലാ വിഭാഗം ഉപഭോക്താക്കള്‍ക്കും വലിയ നേട്ടമാണുണ്ടാക്കിയത്. ഇതിന്റെ മുഴുവന്‍ പ്രയോജനവും മാരുതി കമ്പനി ഉപഭോക്താക്കള്‍ക്ക് കൈമാറി.