ജിദ്ദ: കെ.എം.സി.സി ജിദ്ദ സെന്‍ട്രല്‍ കമ്മിറ്റി സംഘടിപ്പിക്കുന്ന 'ഇ. അഹമ്മദ് സാഹിബ് മെമ്മോറിയല്‍ സൂപ്പര്‍ 7' ഫുട്ബാള്‍ ടൂര്‍ണമെന്റിന് ഇന്ന് തുടക്കമാവും. ജിദ്ദ മഹ്ജര്‍ എംപറര്‍ സ്റ്റേഡിയത്തില്‍ വൈകീട്ട് അഞ്ച് മണിക്ക് മാര്‍ച്ച് പാസ്‌റ്റോടെയാണ് മത്സരങ്ങള്‍ ആരംഭിക്കുക. മുസ്‌ലിംലീഗ് നേതാവ് ഇ.ടി. മുഹമ്മദ് ബഷീര്‍ എം.പി ടൂര്‍ണമെന്റ് ഉദ്ഘാടനം ചെയ്യും. കെ.പി.സി.സി സെക്രട്ടറി അഡ്വ. ബി.ആര്‍.എം ഷഫീര്‍ മുഖ്യാതിഥിയാകും.
ജീവകാരുണ്യ, സാമൂഹിക, സാംസ്‌കാരിക, വിദ്യാഭ്യാസ പ്രവര്‍ത്തനങ്ങളോടൊപ്പം പ്രവാസി യുവാക്കള്‍ക്കിടയില്‍ സ്‌പോര്‍ട്‌സ്മാന്‍ഷിപ്, ടീം വര്‍ക്ക്, കമ്യൂണിറ്റി ഇടപെടല്‍ തുടങ്ങിയവ പ്രോത്സാഹിപ്പിക്കുക, പ്രവാസികളുടെ മാനസിക സംഘര്‍ഷങ്ങള്‍ ലഘൂകരിച്ച് ഉല്ലസിക്കാന്‍ അവസരമൊരുക്കുക, സംഘടന പ്രവര്‍ത്തകരെ പ്രവര്‍ത്തനക്ഷമമാക്കുക തുടങ്ങിയ ലക്ഷ്യത്തോടെയാണ് വിവിധ കലാ, കായിക മത്സരങ്ങള്‍ സംഘടിപ്പിക്കുന്നതെന്ന് ഭാരവാഹികള്‍ വാര്‍ത്തസമ്മേളനത്തില്‍ അറിയിച്ചു.
ദീര്‍ഘകാലം വിദേശകാര്യ സഹമന്ത്രിയും നിരവധി തവണ ഐക്യരാഷ്ട്ര സഭയില്‍ രാജ്യത്തിനുവേണ്ടി ശബ്ദിച്ച മുസ്‌ലിംലീഗ് അഖിലേന്ത്യ പ്രസിഡന്റായിരുന്ന ഇ. അഹമ്മദിന്റെ നാമധേയത്തിലാണ് ഫുട്ബാള്‍ ടൂര്‍ണമെന്റ്. പ്രവാസി ഇന്ത്യക്കാരുമായി അടുത്തിടപഴകി എപ്പോഴും പ്രവാസി പ്രശ്നങ്ങള്‍ കേള്‍ക്കാനും വേണ്ട സഹായങ്ങള്‍ ചെയ്ത് കൂടെ നിന്ന മഹാനായ നേതാവിന്റെ സ്മരണയില്‍ 'ഇ. അഹമ്മദ് സാഹിബ് സൂപ്പര്‍ 7' എന്ന പേരില്‍ സംഘടിപ്പിക്കുന്ന ഫുട്ബാള്‍ ടൂര്‍ണമെന്റ് ജിദ്ദ പ്രവാസി സമൂഹം ഏറ്റെടുക്കുമെന്നുതന്നെയാണ് പ്രതീക്ഷയെന്നും ഭാരവാഹികള്‍ പറഞ്ഞു.
.jpg)
Related News
