ന്യൂയോര്‍ക്ക്: ഗാസ സിറ്റിയിലെ ഇസ്രായില്‍ ആക്രമണത്തെ യുഎന്‍ സെക്രട്ടറി ജനറല്‍ അന്റോണിയോ ഗുട്ടെറസ് അപലപിച്ചു. എന്നാല്‍ ഇസ്രായേല്‍ ചെയ്യുന്നത് വംശഹത്യയാണോ എന്ന് നിര്‍ണ്ണയിക്കേണ്ടത് അന്താരാഷ്ട്ര കോടതികളാണെന്നും അദ്ദേഹം വ്യക്തമാക്കി.

യുഎന്‍ ആസ്ഥാനത്ത് മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി പറയവെ, വംശഹത്യ സംബന്ധിച്ച് നിയമപരമായ തീരുമാനമെടുക്കേണ്ടത് തന്റെ ജോലിയല്ലെന്ന് അന്റോണിയോ ഗുട്ടെറസ് പറഞ്ഞു. യുഎന്‍ മനുഷ്യാവകാശ കൗണ്‍സില്‍ നിയോഗിച്ച വിദഗ്ദ്ധ സംഘം ഗാസയില്‍ ഇസ്രായേല്‍ വംശഹത്യ നടത്തുന്നുണ്ടെന്ന് കണ്ടെത്തിയതിനെ തുടര്‍ന്നായിരുന്നു അദ്ദേഹത്തിന്റെ പ്രതികരണം.

2023 ഒക്ടോബറില്‍ സൈനിക നടപടികള്‍ ആരംഭിച്ചതിന് ശേഷം ഫലസ്തീന്‍ പ്രദേശത്ത് ഇസ്രായേലിന്റെ പെരുമാറ്റം വംശഹത്യക്ക് തുല്യമാണെന്ന് പറയാന്‍ യുഎന്‍ ഏജന്‍സികള്‍, ആഗോള സ്ഥാപനങ്ങള്‍, സര്‍ക്കാരുകള്‍ എന്നിവക്ക് മേല്‍ വര്‍ദ്ധിച്ചുവരുന്ന സമ്മര്‍ദ്ദം നേരിടുന്നുണ്ട്.

'അയല്‍പക്കങ്ങളുടെ വലിയ നാശമാണ് നമ്മള്‍ കാണുന്നത്, ഇപ്പോള്‍ ഗാസ സിറ്റിയുടെ വ്യാപകമായ നാശം, ഞാന്‍ സെക്രട്ടറി ജനറലായതിന് ശേഷം ഒരു സംഘര്‍ഷത്തിലും ഞാന്‍ കാണാത്ത തരത്തിലുള്ള വലിയ തോതിലുള്ള സാധാരണക്കാരുടെ കൊലപാതകമാണ് നമ്മള്‍ കാണുന്നത്,' അന്റോണിയോ ഗുട്ടെറസ് പറഞ്ഞു.

ഗാസയില്‍ ഇസ്രായേല്‍ വംശഹത്യ നടത്തുന്നുണ്ടോ എന്ന ചോദ്യത്തിന് ഗുട്ടെറസ് ഇങ്ങനെ മറുപടി പറഞ്ഞു: 'ഞാന്‍ വീണ്ടും വീണ്ടും പറഞ്ഞതുപോലെ, ഈ സാഹചര്യത്തിലും സമാനമായ മറ്റ് സാഹചര്യങ്ങളിലും, വംശഹത്യ സംബന്ധിച്ച് നിയമപരമായ തീരുമാനമെടുക്കേണ്ടത് സെക്രട്ടറി ജനറലിന്റെ ചുമതലയല്ല.'

'അത് ഉചിതമായ നീതിന്യായ സ്ഥാപനങ്ങളുടെ, അതായത് അന്താരാഷ്ട്ര നീതിന്യായ കോടതിയുടെ അധികാരപരിധിയില്‍ വരുന്നതാണ്.' എന്നാലും ഗാസയില്‍ നടക്കുന്നത് 'ഭീകരമാണ്' എന്നും ഗുട്ടെറസ് പറഞ്ഞു.

ഫലസ്തീന്‍ ജനത ഭീകരമായ അവസ്ഥയാണ് അനുഭവിക്കുന്നത്, പട്ടിണി, ഒരു തരത്തിലുള്ള സഹായവും ലഭിക്കാത്ത അവസ്ഥ, തുടര്‍ച്ചയായ പലായനം, ഏത് നിമിഷവും ജീവന്‍ നഷ്ടപ്പെടുമെന്ന ഭീഷണി. ഇത് ധാര്‍മ്മികമായും രാഷ്ട്രീയമായും നിയമപരമായും അസഹനീയമായ ഒന്നാണ് എന്നതാണ് സത്യം.'

കഴിഞ്ഞ ചൊവ്വാഴ്ച പുറത്തിറക്കിയ, അധിനിവേശ പലസ്തീന്‍ പ്രദേശങ്ങളെയും ഇസ്രായേലിനെയും കുറിച്ചുള്ള അന്വേഷണ കമ്മീഷന്റെ 72 പേജുള്ള റിപ്പോര്‍ട്ടിനോടുള്ള പ്രതികരണമായാണ് ഗുട്ടെറസിന്റെ ഈ അഭിപ്രായങ്ങള്‍ വന്നത്.

2023 ഒക്ടോബര്‍ മുതല്‍ ഇസ്രായേല്‍ ഗാസയിലെ ഫലസ്തീന്‍കാര്‍ക്കെതിരെ വംശഹത്യ നടത്തുകയും അത് തുടരുകയും ചെയ്യുന്നുണ്ടെന്ന് മാത്രമല്ല, അതിന് പ്രേരിപ്പിച്ചത് ഇസ്രായേല്‍ ഭരണകൂടത്തിലെ ഏറ്റവും ഉയര്‍ന്ന രാഷ്ട്രീയ-സൈനിക നേതാക്കളാണെന്നും റിപ്പോര്‍ട്ട് കണ്ടെത്തി.