ദുബായ്: കേള്‍വി പരിമിതരായ യാത്രക്കാരെ സഹായിക്കുന്നതിനായി ദുബായ് അന്താരാഷ്ട്ര വിമാനത്താവളത്തില്‍ 520 ഹിയറിങ് ലൂപ്പുകള്‍ സ്ഥാപിച്ചു.
മൂന്ന് ടെര്‍മിനലുകളിലെ ചെക്ക് ഇന്‍ കൗണ്ടറുകള്‍, ഇമിഗ്രേഷന്‍ ഡെസ്‌കുകള്‍, ബോര്‍ഡിങ് ഗേറ്റുകള്‍, ഇന്‍ഫര്‍മേഷന്‍ ഡെസ്‌കുകള്‍ എന്നിവിടങ്ങളിലാണ് പുതുതായി ഹിയറിങ് ലൂപ്പുകള്‍ സ്ഥാപിച്ചതെന്ന് എയര്‍പോര്‍ട്ട് അതോറിറ്റി അറിയിച്ചു.
കേള്‍വിപരിമിതരുടെ ഹിയറിങ് എയ്ഡുകളില്‍ 'ടി' (ടെലികോയില്‍) സെറ്റിങ്‌സ് ആക്ടിവേറ്റ് ചെയ്താല്‍ ഹിയറിങ് ലൂപ്പുകള്‍ വഴിയുള്ള സേവനം ലഭിക്കും. ഇതിനായി ഉപകരണങ്ങള്‍ തമ്മില്‍ പ്രത്യേകം പെയറിങ് നടത്തേണ്ടതില്ല. നിശ്ചയദാര്‍ഢ്യവിഭാഗം യാത്രക്കാര്‍ക്ക് ഹിയറിങ് ലൂപ്പുകള്‍ ഉപയോഗിക്കാനുള്ള പിന്തുണ നല്‍കുന്നതിനായി ഉദ്യോഗസ്ഥര്‍ക്ക് പ്രത്യേക പരിശീലനവും നല്‍കിയിട്ടുണ്ട്.
കേള്‍വി പരിമിതര്‍ക്ക് ചുറ്റുമുള്ള ശബ്ദങ്ങളുടെ ശല്യമില്ലാതെ ഹിയറിങ് എയ്ഡിലൂടെ നിര്‍ദേശങ്ങള്‍ വ്യക്തമായി കേള്‍ക്കാന്‍ സഹായിക്കുന്ന സംവിധാനമാണ് ഹിയറിങ് ലൂപ്പുകള്‍.
സാധാരണ ഹിയറിങ് എയ്ഡുകളില്‍ നിന്ന് വ്യത്യസ്തമായി അല്‍പം ദൂരെ നിന്ന് ശബ്ദം കേള്‍ക്കാന്‍ ഹിയറിങ് ലൂപ്പുകള്‍ സഹായിക്കും. എമിറേറ്റിലെ പൊതുസ്ഥലങ്ങളിലും ഗതാഗത സൗകര്യങ്ങളിലും എല്ലാ വിഭാഗം യാത്രക്കാര്‍ക്കും പ്രവേശനം സാധ്യമാക്കാന്‍ ലക്ഷ്യമിട്ടുള്ള ദുബായിയുടെ യൂനിവേഴ്സല്‍ ഡിസൈന്‍ കോഡ് അനുസരിച്ചാണ് പുതിയ സംവിധാനം ഒരുക്കിയതെന്ന് എയര്‍പോര്‍ട്ട് അതോറിറ്റി വ്യക്തമാക്കി.
Related News
