ദോഹ: അറബ്, മുസ്ലിം രാജ്യങ്ങളുടെ ഉച്ചകോടി ഞായറാഴ്ച ദോഹയില്‍ നടക്കും. ഇസ്രയേല്‍ ഖത്തറില്‍ ആക്രമണം നടത്തിയ പശ്ചാത്തലത്തിലാണ് യോഗമെന്നത് ശ്രദ്ധേയമാണ്. ഇന്നലെ ചേര്‍ന്ന അടിയന്തര യുഎന്‍ രക്ഷാസമിതിയില്‍ ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുല്‍റഹ്‌മാന്‍ അല്‍ത്താനി പങ്കെടുത്തു.
ബന്ദികളെ മോചിപ്പിക്കുമെന്ന പ്രതീക്ഷയാണ് ഖത്തറിനെ ആക്രമിച്ചതിലൂടെ നെതന്യാഹു തല്ലിക്കെടുത്തിയതെന്നു ഖത്തര്‍ പ്രധാനമന്ത്രി ടിവി അഭിമുഖത്തില്‍ പറഞ്ഞു. ബന്ദികളിലൊരാളുടെ കുടുംബവുമായി ന്യൂയോര്‍ക്കില്‍ താന്‍ നടത്തിയ കൂടിക്കാഴ്ചയില്‍, വെടിനിര്‍ത്തല്‍ ചര്‍ച്ചകളിലാണ് ഏകപ്രതീക്ഷയെന്ന് അവര്‍ പറഞ്ഞതായി അദ്ദേഹം വ്യക്തമാക്കി. ഈ പ്രതീക്ഷയാണ് ഇസ്രയേല്‍ പ്രധാനമന്ത്രി നെതന്യാഹു ഇല്ലാതാക്കിയത്.
നവംബറില്‍ നടക്കുന്ന ദുബായ് എയര്‍ ഷോയില്‍ പങ്കെടുക്കുന്നതില്‍നിന്ന് ഇസ്രയേല്‍ കമ്പനികളെ യുഎഇ വിലക്കി. 5 വര്‍ഷം മുന്‍പാണ് യുഎഇ ഇസ്രയേലുമായി നയതന്ത്രബന്ധം ആരംഭിച്ചത്.
ദോഹയുടെ ആകാശത്തിലൂടെ ബ്രിട്ടിഷ് റോയല്‍ എയര്‍ ഫോഴ്‌സ് (ആര്‍എഎഫ്) വിമാനങ്ങള്‍ പറന്നതും ഇസ്രയേല്‍ ആക്രമണവും തമ്മില്‍ ബന്ധമില്ലെന്ന് ദോഹയിലെ ബ്രിട്ടിഷ് എംബസി വ്യക്തമാക്കി. ഖത്തരി അമീരി വ്യോമസേനയുമായി ചേര്‍ന്നുള്ള സംയുക്ത പരിശീലനത്തിന്റെ ഭാഗമായാണ് ബ്രിട്ടിഷ് സൈനിക വിമാനങ്ങള്‍ സെപ്റ്റംബര്‍ 9ന് ദോഹയുടെ ആകാശത്ത് കൂടി പറന്നത്. ഇസ്രയേല്‍ ആക്രമണം നടന്ന സമയത്ത് ദോഹയുടെ ആകാശത്ത് കൂടി യുകെയുടെ സൈനിക വിമാനങ്ങള്‍ പറന്നത് വ്യാപകമായ ആരോപണങ്ങള്‍ക്ക് ഇടയാക്കിയ സാഹചര്യത്തിലാണ് എംബസിയുടെ വിശദീകരണം.
Related News
