ജിദ്ദ- മയക്കുമരുന്നിനും ലഹരികടത്തിനുമെതിരെ വേട്ട ശക്തമാക്കി സൗദി അറേബ്യ. രാജ്യത്തിന്റെ വിവിധ ഭാഗങ്ങളില്‍ രഹസ്യവിവരങ്ങളുടെ അടിസ്ഥാനത്തിലും അല്ലാതെയും നടത്തുന്ന ലഹരി വേട്ടകളില്‍ കോടികളുടെ മയക്കുമരുന്നാണ് പിടിച്ചെടുക്കുന്നത്. എല്ലാ അതിര്‍ത്തി പോസ്റ്റുകളിലും ലഹരികടത്തിനെതിരെ കനത്ത ജാഗ്രതയാണ് സുരക്ഷാ സൈനികര്‍ പുലര്‍ത്തുന്നത്.

ഏറ്റവുമൊടുവിലെ സംഭവത്തില്‍ വന്‍ മയക്കുമരുന്ന് ശൃംഖലയാണ് സുരക്ഷാ സൈനികരുടെ വലയിലായത്. ജനറല്‍ ഡയറക്ടറേറ്റ് ഓഫ് ഡ്രഗ് കണ്‍ട്രോള്‍ നടത്തിയ ഈ നീക്കത്തില്‍ 6,875,000 ആംഫെറ്റമിന്‍ ഗുളികകള്‍ പിടിച്ചെടുത്തു. ജിദ്ദ ഇസ്ലാമിക് തുറമുഖം വഴി ഒരു രാജ്യത്തേക്ക് കടത്താന്‍ ശ്രമിച്ച ഗുളികകളാണ് പിടിച്ചെടുത്തത്. ലെബനന്‍ റിപ്പബ്ലിക്കില്‍ നിന്ന് പെയിന്റ് കണ്ടെയ്‌നറുകളില്‍ ഒളിപ്പിച്ച നിലയിലായിരുന്നു ഇവ.

തുടര്‍ന്ന് ലഭിച്ച വിവരമനുസരിച്ച് ലെബനനിലെ ഏജന്‍സികളുമായി സഹകരിച്ച് നടത്തിയ അന്വേഷണത്തില്‍ ഈ കടത്തുമായി ബന്ധമുള്ളവരെ അറസ്റ്റ് ചെയ്തു. ഇവരില്‍ നിന്ന് 80 ലക്ഷം ആംഫെറ്റമിന്‍ ഗുളികകള്‍ കൂടി പിടിച്ചെടുത്തു. ഇതോടെ ഈ ഓപ്പറേഷനിലൂടെ പിടിച്ചെടുത്ത ആകെ ഗുളികകളുടെ എണ്ണം 1.48 കോടിയായി.

ലഹരി കടത്തിനെതിരെ പൊതുജനങ്ങളുടെ സഹായത്തോടെയാണ് സുരക്ഷാവകുപ്പുകളുടെ പ്രവര്‍ത്തനം. ലഹരിമരുന്ന് കടത്തുമായി ബന്ധപ്പെട്ട് എന്തെങ്കിലും വിവരങ്ങള്‍ ലഭിക്കുന്നവര്‍ 911 (മക്ക, മദീന, റിയാദ്, കിഴക്കന്‍ പ്രവിശ്യകള്‍), 999 (മറ്റെല്ലാ പ്രദേശങ്ങള്‍), അല്ലെങ്കില്‍ ഡയറക്ടറേറ്റ് ഫോര്‍ നാര്‍ക്കോട്ടിക്സ് കണ്‍ട്രോളിന്റെ 995 എന്ന നമ്പറിലോ 995@ഴറിര.ഴീ്.മെ എന്ന ഇമെയില്‍ വിലാസത്തിലോ അറിയിക്കണമെന്ന് ആഭ്യന്തര മന്ത്രാലയത്തിന്റെ സുരക്ഷാ വക്താവ് ബ്രിഗേഡിയര്‍ ജനറല്‍ തലാല്‍ ബിന്‍ അബ്ദുല്‍ മൊഹ്‌സെന്‍ ബിന്‍ ഷല്‍ഹൂബ് പറഞ്ഞു.