ന്യൂയോര്‍ക്ക്: ഖത്തറിന് നേരെ ഇസ്രയേല്‍ നടത്തിയ ആക്രമണം ചര്‍ച്ച ചെയ്യുന്നതിനായി യുഎന്‍ രക്ഷാസമിതി അടിയന്തര യോഗം ഇന്ന് ചേരും. അള്‍ജീരിയയുടെയും പാകിസ്ഥാന്റെയും അഭ്യര്‍ത്ഥനയെ തുടര്‍ന്നാണ് യോഗം. ഇന്നലെയാണ് ഖത്തറിന്റെ തലസ്ഥാനമായ ദോഹയില്‍ ഇസ്രായേല്‍ ആക്രമണം നടത്തിയത്.
അന്താരാഷ്ട്ര നിയമങ്ങളുടെ നഗ്‌നമായ ലംഘനമാണ് ഇസ്രയേല്‍ നടത്തിയ ആക്രമണമെന്ന് യുഎന്‍ നയതന്ത്ര വൃത്തങ്ങള്‍ അറിയിച്ചു. യോഗത്തില്‍ മുതിര്‍ന്ന യുഎന്‍ സെക്രട്ടേറിയറ്റ് ഉദ്യോഗസ്ഥര്‍ സ്ഥിതിഗതികളെക്കുറിച്ച് വിശദീകരിക്കും.
ഖത്തറിന്റെ പരമാധികാരത്തെയും അഖണ്ഡതയെയും ലംഘിക്കുന്ന നടപടിയാണ് ഇസ്രയേലിന്റെ ഭാഗത്ത് നിന്നുണ്ടായതെന്ന് യുഎന്‍ സെക്രട്ടറി ജനറല്‍ അന്റോണിയോ ഗുട്ടെറസ് കഴിഞ്ഞ ദിവസം വ്യക്തമാക്കിയിരുന്നു. ഇസ്രയേല്‍ ആക്രമണത്തെ അദ്ദേഹം ശക്തമായി അപലപിച്ചു. ഗാസയില്‍ വെടിനിര്‍ത്തല്‍ യാഥാര്‍ത്ഥ്യമാക്കാന്‍ ഖത്തര്‍ വഹിക്കുന്ന നല്ല പങ്കിനെയും അദ്ദേഹം അഭിനന്ദിച്ചു.
Related News
