റിയാദ്: ഇന്ത്യന്‍ വിദേശകാര്യ മന്ത്രാലയത്തിന് കീഴിലെ പാസ്പോര്‍ട്ട്, വിസ കോണ്‍സുലര്‍ സെക്രട്ടറി അരുണ്‍ കുമാര്‍ ചാറ്റര്‍ജി റിയാദിലെത്തി ജിസിസി അസിസ്റ്റന്റ് സെക്രട്ടറി ഡോ. അബ്ദുല്‍ അസീസ് അല്‍ശുവൈഗുമായി കൂടിക്കാഴ്ച നടത്തി. 2024 - 2028 വര്‍ഷത്തേക്കുള്ള ഇന്ത്യ ജിസിസി ജോയിന്റ് ആക്ഷന്‍ പ്ലാനിനെ കുറിച്ച് ചര്‍ച്ച നടന്നു. ഇന്ത്യയും ജിസിസി രാജ്യങ്ങളും തമ്മില്‍ വാണിജ്യം, നിക്ഷേപം, സുരക്ഷ, കൃഷി, ഭക്ഷ്യ സുരക്ഷ, ഗതാഗതം, ഊര്‍ജം, ആരോഗ്യം, വിദ്യാഭ്യാസം എന്നീ മേഖലകളിലെ സഹകരണം കൂടുതല്‍ സജീവമാക്കും. ജിസിസി ജനറല്‍ കോഓഡിനേറ്റര്‍ ഡോ. റജാ അല്‍മര്‍സൂഖിയുമായും അദ്ദേഹം കൂടിക്കാഴ്ച നടത്തി. അഡീഷനല്‍ സെക്രട്ടറി (ഗള്‍ഫ്) അസീം ആര്‍ മഹാജനും ചാറ്റര്‍ജിക്കൊപ്പമുണ്ടായിരുന്നു.
ഇന്ത്യന്‍ എംബസിയും ഇന്ത്യന്‍ സമൂഹ പ്രതിനിധികളും സംഘടിപ്പിച്ച പ്രത്യേക സ്വീകരണത്തിലും സെക്രട്ടറി (സിപിവി & ഒഐഎ) പങ്കെടുത്തു. അംബാസഡര്‍ ഡോ: സുഹൈല്‍ അജാസ് ഖാന്‍ അധ്യക്ഷത വഹിച്ചു.
ചടങ്ങില്‍ സംസാരിച്ച സെക്രട്ടറി, സൗദി അറേബ്യയുമായുള്ള ഇന്ത്യയുടെ ഉഭയകക്ഷി ബന്ധം ശക്തിപ്പെടുത്തുന്നതില്‍ ഇന്ത്യന്‍ സമൂഹം നല്‍കിയ വിലപ്പെട്ട സംഭാവനകളെ പ്രശംസിച്ചു. സൗദി അറേബ്യയുടെ സാമ്പത്തിക വികസനത്തില്‍ അവര്‍ വഹിച്ച പ്രധാന പങ്കിനെയും അദ്ദേഹം അഭിനന്ദിച്ചു. ഇന്ത്യന്‍ പ്രവാസികളുടെ ക്ഷേമത്തിനായി സൗദി അറേബ്യയുടെ നേതൃത്വത്തിന് അദ്ദേഹം നന്ദി പറഞ്ഞു.
