ന്യൂദല്‍ഹി: ഹരിയാനയിലെ ഹത്‌നികുണ്ഡ് ബാരേജില്‍ നിന്ന് വന്‍തോതില്‍ വെള്ളം തുറന്നുവിട്ടതിനെ തുടര്‍ന്ന് ദല്‍ഹിയില്‍ യമുന നദിയിലെ ജലനിരപ്പ് തുടര്‍ച്ചയായി അപകടരേഖക്ക് മുകളില്‍ ഒഴുകുന്നു. നഗരത്തിലെ ലോഹാ പുല്‍ (പഴയ റെയില്‍വേ പാലം) വഴിയുള്ള ഗതാഗതവും പൊതുജനങ്ങളുടെ സഞ്ചാരവും ചൊവ്വാഴ്ച വൈകുന്നേരം 5 മണി മുതല്‍ നിരോധിക്കാന്‍ അധികൃതര്‍ തീരുമാനിച്ചു.

ചൊവ്വാഴ്ച രാവിലെ പഴയ റെയില്‍വേ പാലത്തിന് സമീപം യമുനയിലെ ജലനിരപ്പ് 205.75 മീറ്ററായി ഉയര്‍ന്നു. ഇത് അപകടരേഖയായ 205.33 മീറ്ററിനും മുകളിലാണ്. ദല്‍ഹിക്ക് നല്‍കിയിട്ടുള്ള മുന്നറിയിപ്പ് നില 204.50 മീറ്ററാണ്. 205.33 മീറ്റര്‍ കടന്നാല്‍ ഇത് അപകടകരമായ നിലയിലെത്തും, ജലനിരപ്പ് 206 മീറ്ററില്‍ എത്തിയാല്‍ ആളുകളെ ഒഴിപ്പിക്കാനുള്ള നടപടികള്‍ ആരംഭിക്കും.

യമുന നദിയിലെ വെള്ളപ്പൊക്ക സാധ്യതകള്‍ നിരീക്ഷിക്കുന്നതിനുള്ള ഒരു പ്രധാന കേന്ദ്രമാണ് പഴയ റെയില്‍വേ പാലം. നദിയിലെ ജലനിരപ്പ് അപകടരേഖക്ക് മുകളില്‍ തുടരുന്നതിനാല്‍ താഴ്ന്ന പ്രദേശങ്ങളിലുള്ളവര്‍ക്ക് ജാഗ്രതാ നിര്‍ദേശം നല്‍കിയിട്ടുണ്ട്.