ദുബായ്: ഈ വര്‍ഷം ഹൈസ്‌കൂള്‍ തലത്തില്‍ മികച്ച വിജയം നേടിയ പ്രവാസികളടക്കമുള്ള വിദ്യാര്‍ഥികളെ നേരിട്ട് അഭിനന്ദിച്ച് ദുബായ് കിരീടാവകാശി ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം. ദുബായ് ടോപ് അച്ചീവേഴ്സ് റെക്കഗ്‌നിഷന്‍ ആന്‍ഡ് സപ്പോര്‍ട്ട് പ്രോഗ്രാമിന്റെ ഭാഗമായി തിരഞ്ഞെടുക്കപ്പെട്ട 40 വിദ്യാര്‍ഥികള്‍ക്കാണ് ഷെയ്ഖ് ഹംദാന്‍ വ്യക്തിഗത അഭിനന്ദന സന്ദേശങ്ങള്‍ നേരിട്ട് അയച്ചത്.
ദുബായിലെ പൊതു-സ്വകാര്യ സ്‌കൂളുകളില്‍ നിന്ന് യുഎഇ വിദ്യാഭ്യാസ മന്ത്രാലയം, യുഎസ്, യുകെ, ഇന്റര്‍നാഷനല്‍ ബാക്കലറിയേറ്റ് (ഐബി) തുടങ്ങിയ വിവിധ സിലബസുകളില്‍ ഉന്നത വിജയം നേടിയ സ്വദേശി, വിദേശി വിദ്യാര്‍ഥികളെയാണ് ആദരിച്ചത്. തങ്ങളുടെ നേട്ടങ്ങളില്‍ അഭിമാനം പ്രകടിപ്പിച്ച ഷെയ്ഖ് ഹംദാന്‍, ഈ വിജയം ദുബായിക്ക് അഭിമാനമാണെന്ന് സന്ദേശത്തില്‍ കുറിച്ചു. ഭാവിയില്‍ ദുബായിയുടെ വികസനത്തിന് ഈ വിദ്യാര്‍ഥികള്‍ നല്‍കുന്ന സംഭാവനകളെക്കുറിച്ച് അദ്ദേഹം പ്രതീക്ഷ പങ്കുവച്ചു. വിദ്യാര്‍ഥികളുടെ വിജയത്തിന് പിന്നിലെ ശക്തി അവരുടെ കുടുംബങ്ങളുടെ പിന്തുണയാണെന്നും, കുട്ടികളുടെ നേട്ടം മാതാപിതാക്കളുടെ അര്‍പ്പണബോധത്തിന്റെ ഫലമാണെന്നും അദ്ദേഹം പറഞ്ഞു.
മികച്ച അക്കാദമിക് പ്രകടനം നടത്തുന്ന വിദ്യാര്‍ഥികളെ പ്രോത്സാഹിപ്പിക്കുക, അവരുടെ കഴിവുകള്‍ വികസിപ്പിക്കുക, ഭാവിയിലേക്കുള്ള സാധ്യതകള്‍ തുറന്നുനല്‍കുക എന്നിവയാണ് ദുബായ് ഭരണാധികാരി ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ ദീര്‍ഘവീക്ഷണത്തില്‍ അധിഷ്ഠിതമായ് ദുബായ് ടോപ് അച്ചീവേഴ്സ് പ്രോഗ്രാമിന്റെ ലക്ഷ്യം. അഭിനന്ദനത്തിന് അര്‍ഹരായ പ്രവാസി വിദ്യാര്‍ഥികള്‍ക്ക് ദുബായിലെ രാജ്യാന്തര സര്‍വകലാശാലകളില്‍ പ്രവേശനം നേടുന്നതിന് വലിയ ഫീസ് ഇളവുകള്‍ ലഭിക്കും. ഇവര്‍ക്കും കുടുംബങ്ങള്‍ക്കും ഗോള്‍ഡന്‍ വിസ ലഭിക്കുന്നതിന് മുന്‍ഗണനയും നല്‍കും. എമിറാത്തി വിദ്യാര്‍ഥികള്‍ക്ക് പ്രാദേശിക, രാജ്യാന്തര സര്‍വകലാശാലകളില്‍ ഉന്നത വിദ്യാഭ്യാസം നേടുന്നതിന് സ്‌കോളര്‍ഷിപ്പുകള്‍ ലഭ്യമാക്കും.
Related News
