ദുബായ്: യുഎഇ ഉള്‍പ്പടെയുളള വിദേശ രാജ്യങ്ങളില്‍ നിന്ന് സിബിഎസ്ഇ പത്താം ക്ലാസ്, പ്ലസ് ടു പൊതുപരീക്ഷയെഴുതുന്ന വിദ്യാര്‍ഥികളുടെ റജിസ്ട്രേഷന് അപാര്‍ ഐഡി (ഓട്ടോമേറ്റഡ് പെര്‍മനന്റ് അക്കാദമിക് അക്കൗണ്ട് രജിസ്ട്രി) ആവശ്യമില്ല. ഇത് സംബന്ധിച്ച സര്‍ക്കുലര്‍ ഇന്ത്യയിലെ സെന്‍ട്രല്‍ ബോര്‍ഡ് ഓഫ് സെക്കന്‍ഡറി എജ്യുക്കേഷന്‍ വെബ്‌സൈറ്റില്‍ പ്രസിദ്ധീകരിച്ചു. വിദേശ രാജ്യങ്ങളിലെ സ്‌കൂളുകള്‍ക്ക് ഇത് സംബന്ധിച്ച സര്‍ക്കുലര്‍ ലഭിച്ചതായും വിവിധ സ്‌കൂള്‍ അധികൃതര്‍ സ്ഥിരീകരിച്ചു. ഇന്നു മുതലാണ് സിബിഎസ്ഇ പ്ലസ് ടു ബോര്‍ഡ് പരീക്ഷയുടെ എല്‍ ഒ സി (ലിസ്റ്റ് ഓഫ് കാന്‍ഡിഡേറ്റ്‌സ്) രജിസ്‌ട്രേഷന്‍ ആരംഭിക്കുന്നത്.
അതത് രാജ്യങ്ങളിലെ നിയമങ്ങളും ഭരണപരമായ കാരണങ്ങളും മുന്‍നിര്‍ത്തി വിദേശത്തുളള സിബിഎസ്ഇ സ്‌കൂളുകളെ അപാര്‍ ഐഡി റജിസ്‌ട്രേഷനില്‍ നിന്ന് ഒഴിവാക്കിയിട്ടുണ്ടെന്ന് സര്‍ക്കുലറില്‍ സിബിഎസ്ഇ വ്യക്തമാക്കുന്നു. ഇന്ത്യയിലെ സ്‌കൂളുകളിലെ വിദ്യാര്‍ഥികള്‍ക്ക് പ്രാഥമിക തിരിച്ചറിയില്‍ രേഖയായി അപാര്‍ ഐഡി നടപ്പിലാക്കുന്നത് സംബന്ധിച്ച് ജനുവരി 24 നാണ് സിബിഎസ്ഇ സര്‍ക്കുലര്‍ ഇറക്കിയത്. ഇതോടെ ഇന്ത്യക്ക് പുറത്തുളള സ്‌കൂളുകളിലും ഇത് ബാധകമാകുമോയെന്നുളള ആശങ്ക വിദ്യാര്‍ഥികളും മാതാപിതാക്കളും പങ്കുവച്ചിരുന്നു. അപാര്‍ ഐഡിക്ക് ഇന്ത്യയില്‍ പോകേണ്ടി വന്നേക്കുമെന്നതിനാലാണ് ആശ ഉയര്‍ന്നിരുന്നത്. എന്തായാലും വിദേശ രാജ്യങ്ങളില്‍ പത്താം ക്ലാസ്, പ്ലസ് ടു ബോര്‍ഡ് പരീക്ഷയ്ക്ക് തയാറെടുക്കുന്ന വിദ്യാര്‍ഥികളുടെ എല്‍ഒസി (ലിസ്റ്റ് ഓഫ് കാന്‍ഡിഡേറ്റ്‌സ്) റജിസ്ട്രേഷന് അപാര്‍ ഐഡി ആവശ്യമില്ലെന്ന സിബിഎസ്ഇയുടെ പുതിയ സര്‍ക്കുലര്‍ സ്‌കൂളുകള്‍ക്കും ഒപ്പം മാതാപിതാക്കള്‍ക്കും വിദ്യാര്‍ഥികള്‍ക്കും ആശ്വാസമായി. സെപ്റ്റംബര്‍ 30 വരെയാണ് എല്‍ഒസി റജിസ്ട്രേഷന്.
Related News
