കണ്ണൂര്‍: മന്ത്രി എ.കെ.ശശീന്ദ്രന്റെ ബന്ധുവായ ദമ്പതികളെ വീടിനുള്ളില്‍ പൊള്ളലേറ്റു മരിച്ചനിലയില്‍ കണ്ടെത്തി. നഗരത്തിലെ അലവിലിലാണ് സംഭവം. അലവില്‍ ടൗണിനു സമീപം അനന്തന്‍ റോഡില്‍ കല്ലാളത്തില്‍ പ്രേമരാജന്‍ (75), ഭാര്യ ശ്രീലേഖ (69) എന്നിവരെയാണ് മരിച്ച നിലയില്‍ കണ്ടെത്തിയത്. ഭാര്യയെ തലയ്ക്കടിച്ചു കൊലപ്പെടുത്തിയശേഷം ഭര്‍ത്താവ് തീകൊളുത്തി ആത്മഹത്യ ചെയ്തതാകാമെന്നാണു സംശയം. മന്ത്രി എ.കെ.ശശീന്ദ്രന്റെ സഹോദരിയുടെ മകളാണു ശ്രീലേഖ. ഇന്നലെ വൈകിട്ട് ആറോടെ വീട്ടിലെത്തിയ ഡ്രൈവര്‍ സരോഷ് കോളിങ് ബെല്‍ അടിച്ചിട്ടും തുറക്കാത്തതിനെ തുടര്‍ന്ന് അയല്‍വാസികള്‍ക്കൊപ്പം വാതില്‍ പൊളിച്ച് അകത്തുകയറിയപ്പോഴാണു മൃതദേഹങ്ങള്‍ കണ്ടെത്തിയത്. പോസ്റ്റ്‌മോര്‍ട്ടത്തിനു ശേഷമേ മരണകാരണം വ്യക്തമാകൂവെന്നു പൊലീസ് പറഞ്ഞു.
ശ്രീലേഖയുടെ തലയ്ക്ക് അടിയേറ്റ പാടുകളുണ്ട്. ഭാര്യയെ തലയ്ക്കടിച്ച് കൊലപ്പെടുത്തിയ ശേഷം പ്രേമരാജന്‍ ആത്മഹത്യ ചെയ്തതാകാമെന്നാണ് പൊലീസിന്റെ പ്രാഥമിക നിഗമനം. പൊള്ളലേറ്റ നിലയിലായിരുന്നു മൃതദേഹങ്ങള്‍. മുറിയില്‍ മണ്ണെണ്ണ ഗന്ധമുണ്ടായിരുന്നു. കിടക്കയില്‍ ചുറ്റികകൂടി കണ്ടെത്തിയതോടെയാണ് പൊലീസ് ഈ നിഗമനത്തിലെത്തിയത്.
കണ്ണൂരിലെ സാവോയ് ഹോട്ടലിലെ മുന്‍മാനേജരാണ് പ്രേമരാജന്‍. രണ്ടു മക്കളും വിദേശത്തായതിനാല്‍ ദമ്പതികള്‍ മാത്രമാണ് ഇവിടെ താമസിച്ചിരുന്നത്. ഹബഹ്‌റൈനില്‍നിന്നുമെത്തുന്ന മകന്‍ ഷിബിനെ കൂട്ടിക്കൊണ്ടുവരാന്‍ വിമാനത്താവളത്തില്‍ പോകാനിരിക്കുകയായിരുന്നു ദമ്പതികള്‍. ഇതിനായാണ് ഡ്രൈവര്‍ വിട്ടിലെത്തിയത്. മറ്റൊരു മകനായ പ്രബിത്ത് ഓസ്‌ട്രേലിയയിലാണ്. വിമാനത്താവളത്തില്‍ അച്ഛനമ്മമാരെ പ്രതീക്ഷിച്ചെത്തിയ ഷിബിന്‍ കേട്ടത് അവരുടെ ദാരുണാന്ത്യമാണ്. ബഹ്‌റൈനില്‍നിന്ന് വൈകിട്ടാണ് ഷിബിന്‍ കണ്ണൂരില്‍ വിമാനമിറങ്ങിയത്. ഓസ്‌ട്രേലിയയിലുള്ള മൂത്തമകന്‍ പ്രിബിത്ത് നാളെ നാട്ടിലെത്തും. അതിനു ശേഷമായിരിക്കും സംസ്‌കാരം.
സിറ്റി പൊലീസ് കമ്മിഷണര്‍ പി.നിധിന്‍ രാജിന്റെ നേതൃത്വത്തില്‍ പൊലീസും ഫൊറന്‍സിക് സംഘവും വിരലടയാള വിദഗ്ധരും സ്ഥലത്തെത്തി. മൃതദേഹങ്ങള്‍ ജില്ലാ ആശുപത്രി മോര്‍ച്ചറിയിലേക്കു മാറ്റി.
.jpg)
Related News
