ജിസാന്‍: ജിസാന്‍ പ്രവിശ്യക്ക് കീഴിലുള്ള ഫിഫ മുനിസിപ്പാലിറ്റി പരിധിയില്‍ അടുത്തിടെയുണ്ടായ ശക്തമായ മഴയില്‍ തകര്‍ന്ന റോഡുകള്‍ വൃത്തിയാക്കാനും പാറക്കെട്ടുകള്‍ നീക്കം ചെയ്യാനുമുള്ള പ്രവര്‍ത്തനങ്ങള്‍ തുടരുന്നു. കാലാവസ്ഥാ വ്യതിയാനങ്ങളെ നേരിടാന്‍ തയാറാക്കിയ അടിയന്തര പദ്ധതിയുടെ ഭാഗമായി മുനിസിപ്പാലിറ്റി മേയര്‍ എന്‍ജിനീയര്‍ അഹമ്മദ് ബിന്‍ മുഹമ്മദ് അല്‍-അഹ്വസ് പ്രവര്‍ത്തനങ്ങള്‍ക്ക് മേല്‍നോട്ടം വഹിക്കുന്നു.
മുനിസിപ്പാലിറ്റിയുടെ എമര്‍ജന്‍സി ആന്‍ഡ് ക്രൈസിസ് മാനേജ്മെന്റ് ടീമാണ് ഈ പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്. മുനിസിപ്പല്‍ സപ്പോര്‍ട്ട് ഡിപ്പാര്‍ട്ട്മെന്റില്‍ നിന്നുള്ള സാങ്കേതിക ഉപകരണങ്ങളും ജീവനക്കാരും ടീമിന് പിന്തുണ നല്‍കുന്നുണ്ട്. ദുര്‍ഘടമായ ഭൂപ്രദേശങ്ങളിലും മോശം കാലാവസ്ഥയിലും സംഘം മുഴുവന്‍ സമയവും പ്രവര്‍ത്തിക്കുന്നു.
മഴക്കെടുതികള്‍ പരിഹരിക്കുന്നതിനായി തങ്ങളുടെ സംഘങ്ങള്‍ നിരീക്ഷണം തുടരുമെന്ന് മുനിസിപ്പാലിറ്റി അറിയിച്ചു. ദുരിതബാധിത പ്രദേശങ്ങളെക്കുറിച്ച് വിവരങ്ങള്‍ നല്‍കി സഹകരിച്ച പൗരന്മാരെ മുനിസിപ്പാലിറ്റി അഭിനന്ദിച്ചു.
പാറയിടിച്ചിലുണ്ടായ സ്ഥലങ്ങളില്‍ നിന്ന് മാറിനില്‍ക്കാനും അധികൃതര്‍ നല്‍കുന്ന സുരക്ഷാ നിര്‍ദ്ദേശങ്ങള്‍ പാലിക്കാനും ഫിഫ മുനിസിപ്പാലിറ്റി എല്ലാവരോടും ആവശ്യപ്പെട്ടു. അടിയന്തര മുനിസിപ്പല്‍ സേവനങ്ങള്‍ കാര്യക്ഷമതയോടെ തുടര്‍ന്നും നല്‍കാന്‍ തങ്ങള്‍ പൂര്‍ണമായും തയാറാണെന്നും മുനിസിപ്പാലിറ്റി ഉറപ്പുനല്‍കി.
Related News
