വടകര: വടകര എം.പി ഷാഫി പറമ്പിലിനെതിരെ നടന്ന ആക്രമണ ശ്രമത്തിലും അസഭ്യവിളികളിലും ശക്തമായ പ്രതിഷേധവുമായി റിയാദ് ഒഐസിസി രംഗത്തെത്തി. പ്രദേശത്ത് നടന്ന ചടങ്ങില്‍ നിന്ന് മടങ്ങുന്നതിനിടെ ഡിവൈഎഫ്‌ഐ പ്രവര്‍ത്തകര്‍ എം.പിയെ തടഞ്ഞു നിര്‍ത്തുകയും അസഭ്യം വിളിക്കുകയും ചെയ്ത സംഭവമാണ് വിവാദമായത്.
ജനാധിപത്യ രീതികള്‍ക്ക് വിരുദ്ധമായും, തെരഞ്ഞെടുക്കപ്പെട്ട ജനപ്രതിനിധിയുടെ മാന്യതയെ അപമാനിക്കാനുദ്ദേശിച്ചും നടത്തിയ ഇത്തരം പ്രവര്‍ത്തികള്‍ ഇടതുപക്ഷത്തിന്റെ രാഷ്ട്രീയ വൈരാഗ്യത്തിന്റെ തെളിവ് മാത്രമാണ് എന്ന് റിയാദ് ഒഐസിസി പ്രസ്താവനയില്‍ ആരോപിച്ചു. വടകരയില്‍ ഇടതുപക്ഷം നേരിട്ട പരാജയം ഇപ്പോഴും അവര്‍ക്ക് സഹിക്കാനാകാത്തതുകൊണ്ടാണ് ജനപ്രതിനിധിയുടെ പ്രവര്‍ത്തനങ്ങളില്‍ തടസ്സം സൃഷ്ടിക്കുന്നത്.
വികസനവും ജനപ്രശ്‌നങ്ങളും മുന്‍നിര്‍ത്തി പ്രവര്‍ത്തിക്കുന്ന എം.പിയെ കായികമായി തടഞ്ഞ നടപടി ജനാധിപത്യ മൂല്യങ്ങള്‍ക്കെതിരായ ഗുരുതരമായ ആക്രമണമാണ്. ഇത്തരത്തിലുള്ള പ്രവണതകള്‍ക്കെതിരെ പൊതു സമൂഹം ഒന്നിച്ചു നിലകൊള്ളണം. ജനങ്ങളുടെ വിശ്വാസത്തെ അപമാനിക്കാന്‍ ഇത്തരം ആളുകളെ യാതൊരു കാരണവശാലും അനുവദിക്കുകയില്ലെന്നും റിയാദ് ഒഐസിസി പ്രസ്താവനയില്‍ വ്യക്തമാക്കി.
അതേസമയം, പ്രതിഷേധക്കാരോട് നേരിട്ട് പ്രതികരിച്ച ഷാഫി പറമ്പില്‍ തന്റെ ഉറച്ച നിലപാടാണ് വ്യക്തമാക്കിയതെന്ന് റിയാദ് ഒഐസിസി വിലയിരുത്തി. സംഭവത്തില്‍ ജനങ്ങള്‍ക്കും സാമൂഹിക സംഘടനകള്‍ക്കും ഇടയില്‍ ശക്തമായ പ്രതിഷേധം ഉയര്‍ന്നിട്ടുണ്ട്. സോഷ്യല്‍ മീഡിയയിലും സംഭവത്തിനെതിരെ വ്യാപകമായ പ്രതികരണങ്ങള്‍ തുടരുകയാണ്.
Related News
