ജിദ്ദ- ഗാസയിലെ പട്ടിണി അവസാനിപ്പിക്കാനും ഫലസ്തീന്‍ ജനതയ്‌ക്കെതിരെ ഇസ്രായേല്‍ നടത്തുന്ന വംശഹത്യയും ക്രൂരതകളും അവസാനിപ്പിക്കാനും അന്താരാഷ്ട്ര സമൂഹം, പ്രത്യേകിച്ച് യു.എന്‍. രക്ഷാസമിതിയിലെ സ്ഥിരാംഗങ്ങള്‍, അടിയന്തരമായി ഇടപെടണമെന്ന് സൗദി അറേബ്യ വീണ്ടും ആവശ്യപ്പെട്ടു. ജിദ്ദയില്‍ ചൊവ്വാഴ്ച ചേര്‍ന്ന മന്ത്രിസഭാ യോഗത്തില്‍ സല്‍മാന്‍ രാജാവ് അധ്യക്ഷത വഹിച്ചു.
ഫലസ്തീന്‍ ജനതക്കെതിരായ ഇസ്രായേലിന്റെ തുടര്‍ച്ചയായ അതിക്രമങ്ങളെക്കുറിച്ചും വംശഹത്യ അവസാനിപ്പിക്കുന്നതിനുള്ള നടപടികളെക്കുറിച്ചും ചര്‍ച്ച ചെയ്യാന്‍ തിങ്കളാഴ്ച ജിദ്ദയില്‍ ചേര്‍ന്ന ഓര്‍ഗനൈസേഷന്‍ ഓഫ് ഇസ്ലാമിക് കോപ്പറേഷന്റെ വിദേശകാര്യ മന്ത്രിമാരുടെ അടിയന്തര യോഗത്തിന്റെ തീരുമാനങ്ങളെ മന്ത്രിസഭ പിന്തുണച്ചു.
ഇസ്രായേലിന്റെ തുടര്‍ച്ചയായ അതിക്രമങ്ങള്‍ അന്താരാഷ്ട്ര നിയമങ്ങളെ ദുര്‍ബലപ്പെടുത്തുകയും, സംഘര്‍ഷങ്ങള്‍ക്കും അശാന്തിക്കും വഴിവെക്കുകയും, പ്രാദേശികവും ആഗോളവുമായ സമാധാനത്തിനും സുരക്ഷയ്ക്കും ഭീഷണിയാകുകയും ചെയ്യുമെന്ന് മന്ത്രിസഭ ഊന്നിപ്പറഞ്ഞു. സിറിയന്‍ അതിര്‍ത്തിയിലേക്കുള്ള ഇസ്രായേലിന്റെ കടന്നുകയറ്റത്തെയും ആഭ്യന്തര കാര്യങ്ങളിലുള്ള ഇടപെടലുകളെയും കൗണ്‍സില്‍ ശക്തമായി അപലപിച്ചു. സുരക്ഷയും സ്ഥിരതയും കൈവരിക്കാനും, സമാധാനം നിലനിര്‍ത്താനും, രാജ്യത്തിന്റെയും സ്ഥാപനങ്ങളുടെയും പരമാധികാരം സംരക്ഷിക്കാനും സിറിയന്‍ സര്‍ക്കാര്‍ സ്വീകരിക്കുന്ന നടപടികള്‍ക്ക് സൗദി അറേബ്യ പൂര്‍ണ്ണ പിന്തുണ നല്‍കുമെന്നും കൗണ്‍സില്‍ വ്യക്തമാക്കി. സിറിയയെ വിഭജിക്കാനുള്ള നീക്കങ്ങളെ മന്ത്രിസഭ തള്ളിപ്പറഞ്ഞു.
Related News
