ജിദ്ദ- സി.പി.എമ്മിനെ പ്രീതിപ്പെടുത്തുന്നതിന് വേണ്ടിയാണ് മുന്‍ മന്ത്രി ഡോ. കെ.ടി ജലീല്‍ മുസ്ലിം ലീഗിനെയും അതിന്റെ നേതാക്കളെയും അടിക്കടി വിമര്‍ശിക്കുന്നതെന്ന് ജിദ്ദ കെ.എം.സി.സി ജനറല്‍ സെക്രട്ടറി വി.പി മുസ്തഫ, ആക്ടിംഗ് പ്രസിഡന്റ് സി.കെ.എ റസാഖ് മാസ്റ്റര്‍ എന്നിവര്‍ അഭിപ്രായപ്പെട്ടു. മന്ത്രിയായിരിക്കെ തന്റെ പദവി ദുരുപയോഗം ചെയ്ത് ബന്ധുവിന് നിയമനം നല്‍കിയ ആളാണ് ജലീല്‍. കോടതിയുടെ ശക്തമായ ഇടപെടലിനെ തുടര്‍ന്ന് അദ്ദേഹത്തിന് പദവി രാജിവെക്കേണ്ടി വന്നു. ഇതിന്റെ വിരോധവും പരിഭവങ്ങളുമാണ് ലീഗിനെതിരെ ജലീല്‍ പ്രകടിപ്പിക്കുന്നതെന്നും കെ.എം.സി.സി നേതാക്കള്‍ അഭിപ്രായപ്പെട്ടു.
തന്റെ ബന്ധുവായ കെ ടി അദീബിനെ കേരള സംസ്ഥാന ന്യൂനപക്ഷ വികസന ധനകാര്യ കോര്‍പ്പറേഷന്റെ (കെഎസ്എംഡിഎഫ്സി) ജനറല്‍ മാനേജരായി നിയമിക്കാന്‍ ഔദ്യോഗിക അധികാരങ്ങള്‍ ദുരുപയോഗം ചെയ്ത കെ.ടി. ജലീല്‍ 2019 ല്‍, കേരള ലോകായുക്ത സ്വജനപക്ഷപാതത്തിന് കുറ്റക്കാരനാണെന്ന് കണ്ടെത്തിയതിനെത്തുടര്‍ന്നാണ് മന്ത്രിപദവി ഒഴിഞ്ഞത്. മന്ത്രിസഭയില്‍നിന്ന് രാജിവെക്കേണ്ടിവന്നതിനു ശേഷം പാര്‍ട്ടിയില്‍നിന്ന് നേരിടുന്ന അവഗണന മറച്ചു വെക്കാനും, ലീഗിനെയും, മത നേതാക്കളെയും കുറ്റം പറഞ്ഞു പാര്‍ട്ടിയെ പ്രീതിപ്പെടുത്തി അടുത്ത തവണയും സീറ്റ് ഉറപ്പിക്കാനുമുള്ള തന്ത്രം മെനയുകയാണ് ജലീല്‍.
തന്റെ പാര്‍ട്ടിക്ക് കീഴിലെ കോപ്പറേറ്റീവ് ബാങ്കു കൊള്ളയെ കണ്ടില്ലെന്ന് നടിക്കുകയാണ് ജലീല്‍. ഈ കൊള്ളയില്‍ ജലീലിനും പങ്കുണ്ടോ എന്ന് സംശയിക്കേണ്ടിയിരിക്കുന്നു. മുസ്ലിം സമൂഹത്തെയും മത നേതാക്കളെയും സംഘ് പരിവാറിന് ഒറ്റിക്കൊടുക്കുന്ന പണിയാണ് ജലീല്‍ ചെയ്യുന്നതെന്നും കെ.എം.സി.സി നേതാക്കള്‍ പ്രസ്താവനയില്‍ പറഞ്ഞു.
Related News
