തായിഫ്: 'മരണക്കളി'യെന്ന പേരില്‍ മാധ്യമങ്ങളില്‍ അറിയപ്പെട്ട തായ്ഫ് അമ്യൂസ്മെന്റ് പാര്‍ക്കിലെ റൈഡ് തകര്‍ന്നുവീണ സംഭവത്തില്‍ ഗുരുതരമായി പരിക്കേറ്റ വാദ ബിന്‍ത് അസീസ് അല്‍-ഫഹ്‌മി നിര്യാതയായി. വാദയെ വിദഗ്ധ ചികിത്സക്കായി റിയാദിലേക്ക് മാറ്റിയിരുന്നു.
കഴിഞ്ഞയാഴ്ചയാണ് തായിഫിലെ കിംഗ് അബ്ദുല്‍ അസീസ് സ്‌പെഷ്യലിസ്റ്റ് ഹോസ്പിറ്റലില്‍നിന്ന് നാഷണല്‍ ഗാര്‍ഡിന് കീഴിലുള്ള റിയാദിലെ കിംഗ് അബ്ദുല്‍ അസീസ് മെഡിക്കല്‍ സിറ്റിയിലേക്ക് എയര്‍ ആംബുലന്‍സ് വഴി മാറ്റിയത്. അതേ അപകടത്തില്‍ പരിക്കേറ്റ വാദയുടെ സഹോദരി ഹനാനെ നേരത്തെ തന്നെ പ്രിന്‍സ് സുല്‍ത്താന്‍ ബിന്‍ അബ്ദുല്‍ അസീസ് മെഡിക്കല്‍ സിറ്റിയിലേക്ക് മാറ്റിയിരുന്നു, അവര്‍ ഇപ്പോഴും ആശുപത്രിയില്‍ തുടരുകയാണ്.
മൃതദേഹം തായിഫില്‍ സംസ്‌കരിക്കുമെന്ന് വാദയുടെ സഹോദരന്‍ പറഞ്ഞു.
അമ്യൂസ്മെന്റ് പാര്‍ക്കിലെ റൈഡ് തകര്‍ന്നുവീണ് പരിക്കേറ്റവരില്‍ അധികവും പെണ്‍കുട്ടികളായിരുന്നു. അപകടത്തെത്തുടര്‍ന്ന് പാര്‍ക്കില്‍ പരിഭ്രാന്തി പടര്‍ന്നു, പരിക്കേറ്റവരെ കിംഗ് അബ്ദുല്‍ അസീസ് സ്‌പെഷ്യലിസ്റ്റ് ഹോസ്പിറ്റലിലേക്കും കിംഗ് ഫൈസല്‍ മെഡിക്കല്‍ കോംപ്ലക്‌സിലേക്കും കൊണ്ടുപോയി.
സംഭവസ്ഥലം ഉടന്‍ അടച്ചുപൂട്ടിയെന്നും ദാരുണമായ അപകടത്തിന് പിന്നിലെ കാരണം കണ്ടെത്താന്‍ അന്വേഷണം ആരംഭിച്ചതായും റിപ്പോര്‍ട്ടുകള്‍ സൂചിപ്പിക്കുന്നു. വിനോദ കേന്ദ്രങ്ങളില്‍ കര്‍ശനമായ സുരക്ഷാ മാനദണ്ഡങ്ങള്‍ ഏര്‍പ്പെടുത്തണമെന്ന വ്യാപകമായ ആവശ്യം ഇതോടെ ഉയര്‍ന്നിരുന്നു.
Related News
