ദുബായ്: മദ്യപിച്ച് വാഹനമോടിച്ച് അപകടം വരുത്തിയ യുവാവിന് ദുബായ് ക്രിമിനല്‍ കോടതി 25,000 ദിര്‍ഹം പിഴ ചുമത്തുകയും മൂന്നു മാസത്തേക്ക് ഇയാളുടെ ലൈസന്‍സ് റദ്ദാക്കുകയും ചെയ്തു. യു.എ.ഇയില്‍ ജോലി നോക്കുന്ന ഏഷ്യന്‍ വംശജനാണ് ശിക്ഷ ലഭിച്ചത്.

അനുവദനീയമല്ലാത്ത സ്ഥലത്ത് വെച്ച് മദ്യം കഴിക്കുക, മദ്യപിച്ച് വാഹനമോടിക്കുക, പൊതുമുതല്‍ നശിപ്പിക്കുക തുടങ്ങി മൂന്നു കുറ്റങ്ങളാണ് ഇയാള്‍ക്കെതിരെ പ്രോസിക്യൂഷന്‍ ചുമത്തിയത്. മദ്യലഹരിയില്‍ നിയന്ത്രണം നഷ്ടപ്പെട്ട വാഹനം റോഡിലെ ഇരുമ്പ് ബാരിക്കേടില്‍ ഇടിച്ചാണ് നിന്നത്. അറസ്റ്റിലായ പ്രതിയുടെ കുറ്റസമ്മതവും അന്വേഷണ ഉദ്യോഗസ്ഥരുടെ റിപോര്‍ട്ടും പരിഗണിച്ചാണ് പ്രതിക്കെതിരെ കോടതി നടപടി സ്വീകരിച്ചത്. കേസിന്റെ സാഹചര്യങ്ങളും പ്രതി കുറ്റസമ്മതം നടത്തിയതും കണക്കിലെടുത്ത് ജഡ്ജിമാര്‍ ശിക്ഷയില്‍ ഇളവ് നല്‍കുകയായിരുന്നു.