ദോഹ: പകല്‍ സമയങ്ങളിലെ കൊടും ചൂടും രാത്രിയിലെ ഈര്‍പ്പവും തുടരുന്നതിനു പിന്നാലെ വ്യാഴാഴ്ച (ഇന്ന്) വൈകിട്ട് ചിലയിടങ്ങളില്‍ മഴ പെയ്യാന്‍ സാധ്യതയുണ്ടെന്ന് ഖത്തര്‍ കാലാവസ്ഥാ വകുപ്പ്. പലയിടങ്ങളിലും ചൂടും ഈര്‍പ്പവും ശക്തി പ്രാപിച്ചിട്ടുണ്ട്. ചിലയിടങ്ങളില്‍ മേഘങ്ങള്‍ രൂപപ്പെട്ടിട്ടുണ്ട്. അതുകൊണ്ടുതന്നെ വ്യാഴാഴ്ച വൈകിട്ട് സാമാന്യം ഭേദപ്പെട്ട മഴയ്ക്കുള്ള സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു. ഇക്കഴിഞ്ഞ ഞായറാഴ്ച യുഎഇ, ഒമാന്‍, സൗദി അറേബ്യ എന്നിവിടങ്ങളില്‍ കനത്ത മഴ പെയ്തിരുന്നു.

ഇന്ന് രാവിലെ ഖത്തറില്‍ കനത്ത മൂടല്‍ മഞ്ഞാണ് അനുഭവപ്പെട്ടത്. പകല്‍ സമയം ചൂട് വളരെ കൂടും. അതിന്നനുസൃതമായി രാത്രിയില്‍ ഈര്‍പ്പവും വര്‍ധിക്കും. തീരദേശത്ത് തെക്കുകിഴക്ക് മുതല്‍ വടക്കുകിഴക്ക് വരെ മണിക്കൂറില്‍ അഞ്ചു മുതല്‍ 15 നോട്ടിക്കല്‍ മൈല്‍ വേഗതയില്‍ കാറ്റ് വീശാന്‍ സാധ്യതയുണ്ട്. പകല്‍ സമയങ്ങളിലാകട്ടെ കാറ്റിന്റെ വേഗത മണിക്കൂറില്‍ 25 നോട്ടിക്കല്‍ മൈല്‍ വരെയാകും. തിരമാലകള്‍ ഒന്ന് മുതല്‍ മൂന്നടി വരെ വരെ ഉയര്‍ന്നേക്കുമെന്നും മുന്നറിയിപ്പുണ്ട്. ദൃശ്യപരതയും ദൂരക്കാഴ്ചയും കുറയുന്നതിനാല്‍ വാഹനങ്ങള്‍ ഓടിക്കുന്നവര്‍ നല്ല ജാഗ്രത പുലര്‍ത്തണം.

ഖത്തറിന്റെ മിക്ക ഭാഗങ്ങളിലും താപനില 43.33 ഡിഗ്രി സെല്‍ഷ്യസ് വരെ ഉയരും. ദോഹ- 43.33, അല്‍ വക്ര- 41.32, അല്‍ ഖോര്‍- 41.32, അല്‍ റുവൈസ്- 39.33, അബു സാമ്ര- 43.31, ദുഖ്ഹാന്‍- 40.31, മെസൈദ്- 43.32 എന്നിങ്ങനെയാണ് പ്രതീക്ഷിത താപനില.