ന്യൂഡല്‍ഹി- പാകിസ്ഥാന്‍ സൈനിക മേധാവി ജനറല്‍ അസിം മുനീറിനെ ഫീല്‍ഡ് മാര്‍ഷല്‍ പദവിയിലേക്ക് ഉയര്‍ത്തിയതായി ജിയോ ന്യൂസ് റിപ്പോര്‍ട്ട് ചെയ്തു. പ്രധാനമന്ത്രി ഷെഹ്ബാസ് ഷെരീഫിന്റെ അധ്യക്ഷതയില്‍ ചേര്‍ന്ന മന്ത്രിസഭാ യോഗത്തിലാണ് ഈ തീരുമാനം.
പ്രധാനമന്ത്രിയുടെ ഓഫീസില്‍നിന്ന് പുറത്തിറക്കിയ പ്രസ്താവന പ്രകാരം, പ്രധാനമന്ത്രി ഷെഹ്ബാസ് പ്രസിഡന്റ് ആസിഫ് അലി സര്‍ദാരിയുമായി കൂടിക്കാഴ്ച നടത്തുകയും ഈ തീരുമാനത്തില്‍ അദ്ദേഹത്തെ വിശ്വാസത്തിലെടുക്കുകയും ചെയ്തതായി പാകിസ്ഥാന്‍ മാധ്യമമായ ഡോണ്‍ റിപ്പോര്‍ട്ട് ചെയ്തു.
പാകിസ്ഥാന്‍ സൈന്യത്തിലെ ഏറ്റവും ഉയര്‍ന്ന പദവിയാണ് ഫീല്‍ഡ് മാര്‍ഷല്‍. സൈന്യത്തിന്റെ മൊത്തത്തിലുള്ള കമാന്‍ഡ്, നിയന്ത്രണം, ഭരണനിര്‍വഹണം എന്നിവയുടെ ചുമതല ഈ പദവിക്കാണ്. ദേശീയ സുരക്ഷയുമായി ബന്ധപ്പെട്ട എല്ലാ കാര്യങ്ങളിലും പ്രധാനമന്ത്രിക്കും പാകിസ്ഥാന്‍ പ്രസിഡന്റിനും പ്രധാന സൈനിക ഉപദേഷ്ടാവും ഫീല്‍ഡ് മാര്‍ഷലാണ്.
മുനീറിന് മുന്‍പ്, മുന്‍ പാകിസ്ഥാന്‍ പ്രസിഡന്റ് ജനറല്‍ അയൂബ് ഖാന്‍ 1959-ല്‍ സ്വയം ഫീല്‍ഡ് മാര്‍ഷലായി ഉയര്‍ത്തിയിരുന്നു.
ഇന്ത്യന്‍ സായുധ സേന പാകിസ്ഥാനിലെയും പാക് അധിനിവേശ കാശ്മീരിലെയും ഒമ്പത് ഭീകര കേന്ദ്രങ്ങളില്‍ 'ഓപ്പറേഷന്‍ സിന്ദൂര്‍' എന്ന പേരില്‍ കൃത്യമായ ആക്രമണങ്ങള്‍ നടത്തിയതിന് പിന്നാലെയാണ് ഈ പ്രഖ്യാപനം വരുന്നത്. ഇതിനെത്തുടര്‍ന്ന്, നിയന്ത്രണ രേഖയിലും അന്താരാഷ്ട്ര അതിര്‍ത്തികളിലും ഡ്രോണ്‍, മിസൈല്‍ ആക്രമണങ്ങള്‍ നടത്താനുള്ള പാകിസ്ഥാന്റെ ശ്രമം ഇന്ത്യന്‍ സായുധ സേന തടഞ്ഞിരുന്നു.
നിയന്ത്രണ രേഖയില്‍ ദിവസങ്ങളോളം നീണ്ട ഏറ്റുമുട്ടലിന് ശേഷം മെയ് 10-ന് ഇരുരാജ്യങ്ങളും വെടിനിര്‍ത്തലിന് സമ്മതിച്ചു. സൈനിക നടപടികള്‍ നിര്‍ത്തലാക്കുമെങ്കിലും ഇസ്ലാമാബാദുമായി നയതന്ത്ര ചര്‍ച്ചകള്‍ ഉണ്ടാകില്ലെന്ന് ഇന്ത്യ വ്യക്തമാക്കിയിട്ടുണ്ട്.
.jpg)
Related News
