തിരുവനന്തപുരം: കേരളവും ആഫ്രിക്കയുമായുളള പ്രവാസ ചരിത്രത്തെ കുറിച്ച് പഠിക്കാന്‍ നോര്‍ക്ക റൂട്‌സും, കേരള ചരിത്ര ഗവേഷണ കൗണ്‍സിലും തമ്മില്‍ ധാരണ പത്രം ഒപ്പുവച്ചു. മൂന്നാം ലോക കേരള സഭയില്‍ ഉയര്‍ന്ന നിര്‍ദ്ദേശത്തിന്റെ അടിസ്ഥാനത്തിലാണ് ചരിത്ര പഠനത്തിന് തുടക്കം കുറിക്കുന്നത്. കേരളവും ആഫ്രിക്കയുമായുളള ബന്ധത്തിന് കടല്‍യാത്രകളുടെ ചരിത്രത്തോളം ആഴമുണ്ടെങ്കിലും വേണ്ടത്ര പഠനമോ പ്രമാണീകരണമോ, അടയാളപ്പെടുത്തലുകളോ സാധ്യമായിട്ടില്ല. ഈ വിടവു നികത്തുകയാണ് മൈഗ്രേഷന്‍ പ്രൊഫൈല്‍ ഓഫ് കെരളൈറ്റ്‌സ് ഇന്‍ ആഫ്രിക്ക (Migration Profile of Keralites in Africa) എന്ന പ്രൊജക്റ്റിലൂടെ ലക്ഷ്യമിടുന്നത്.
നോര്‍ക്ക റൂട്‌സിന്റെ അക്കാദമിക രംഗത്തേക്കുള്ള ആദ്യ ചുവടുവെയ്പു കൂടിയാണ് ഈ പഠനം. നോര്‍ക്ക റൂട്ട്‌സ് ആസ്ഥാനമായ നോര്‍ക്ക സെന്ററില്‍ റസിഡന്റ് വൈസ് ചെയര്‍മാന്‍ പി. ശ്രീരാമകൃഷ്ണന്റെ സാന്നിധ്യത്തില്‍ നടന്ന ചടങ്ങില്‍ കേരള ചരിത്ര ഗവേഷണ കൗണ്‍സില്‍ ചെയര്‍പേഴ്‌സണ്‍ പ്രൊഫസര്‍ കെ എന്‍ ഗണേഷ്, നോര്‍ക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസര്‍ അജിത് കോളശ്ശേരി എന്നിവര്‍ തമ്മിലാണ് ധാരണാ പത്രം കൈമാറിയത്. ചടങ്ങില്‍ നോര്‍ക്ക റൂട്‌സ് ജനറല്‍ മാനേജര്‍ ഉല്ലാസ് കൃഷ്ണന്‍, കേരള ചരിത്ര ഗവേഷണ കൗണ്‍സിലില്‍ നിന്നും ഡയറക്ടര്‍ പ്രൊഫസ്സര്‍ ദിനേശന്‍ വടക്കിനിയില്‍, പ്രൊജക്റ്റ് പ്രിന്‍സിപ്പല്‍ ഇന്‍വെസ്റ്റിഗേറ്റര്‍ സോമി സോളമന്‍, ഫിനാന്‍സ് ഓഫീസര്‍ അലക്‌സ് എന്നിവര്‍ സന്നിഹിതരായിരുന്നു. കേരളത്തിന്റെ വര്‍ത്തമാനകാലത്തും ഭാവിയിലും പ്രവാസത്തില്‍ ആഫ്രിക്ക സാധ്യതയായി തെളിയുമ്പോള്‍ പഠനത്തിനും പ്രാധാന്യമേറുന്നു.
Related News
