കോഴിക്കോട്- മലയാളത്തിന്റെ പ്രിയകഥാകാരന് എസ്.കെ. പൊറ്റക്കാട്ടിന്റെ തൂലികയില് പിറന്ന 'ഒരു തെരുവിന്റെ കഥ'യുടെ ആത്മാവ് കുടികൊള്ളുന്ന മിഠായിത്തെരുവില് സാഹിത്യസ്മരണയുടെ പുതുവഴിയേ വിരിഞ്ഞു മറ്റൊരു കഥ. കാലത്തെ അതിജീവിച്ചു മിഠായിത്തെരുവില് തലയുയര്ത്തി നില്ക്കുന്ന എസ്.കെ.യുടെ ശില്പത്തിന് ചാരെ ഒരു തെരുവില് നിന്ന് മറ്റൊരു തെരുവിലേക്കുള്ള അക്ഷരദൂരം കുറിച്ചുകൊണ്ട് സാദിഖ് കാവിലിന്റെ 'മംഗളൂരു' എന്ന നോവല് പ്രകാശനം ചെയ്തു. എസ്.കെയുടെ മകളും എഴുത്തുകാരിയുമായ സുമിത്ര ജയപ്രകാശ് മുതിര്ന്ന മാധ്യമപ്രവര്ത്തകന് പി.പി. ശശീന്ദ്രന് ആദ്യപ്രതി നല്കിയാണ് പ്രകാശനം നിര്വഹിച്ചത്. മനോരമ ബുക്സ് ആണ് മംഗളൂരുവിലെ തെരുവോരങ്ങളുടെ കഥ പറയുന്ന ഈ നോവലിന്റെ പ്രസാധകര്.
അനുഭവങ്ങളുടെ പൊള്ളലില്ലാതെ ആര്ക്കും ഒരു തെരുവിന്റെ കഥയെഴുതാനാവില്ലെന്ന് സുമിത്ര ജയപ്രകാശ് പറഞ്ഞു. അച്ഛന്റെ നോവലിലെ ഓരോ കഥാപാത്രവും മാംസവും രക്തവുമുള്ള മനുഷ്യരായിരുന്നുവെന്ന് അവര് സ്മരിച്ചു. അച്ഛന് കേന്ദ്ര സാഹിത്യ അക്കാദമി പുരസ്കാരം ലഭിച്ച ശേഷമുള്ള ഒരു വേദിയില് ഒരാള് ഒരു പൂച്ചട്ടി കൊണ്ടുവച്ച് നിശബ്ദം നടന്നുപോയി. വീട്ടിലെത്തിയപ്പോഴാണ് അച്ഛന് പറഞ്ഞത്, അത് നോവലിലെ 'ഓമല്ജി' എന്ന കഥാപാത്രമാണെന്ന്. അതുപോലെ വിഷകന്യകയിലെ കഥാപാത്രങ്ങളും വയനാടിന്റെ മണ്ണില് ജീവിച്ചിരുന്നവരാണെന്ന് അന്ന് വയനാട്ടില് നിന്നെത്തിയ കന്യാസ്ത്രീകള് സാക്ഷ്യപ്പെടുത്തിയിട്ടുണ്ട്.
മംഗളൂരുവിലെ തെരുവുകളെ സാദിഖ് കാവില് എങ്ങനെ ആവാഹിച്ചുവെന്ന് ഈ നോവല് പറഞ്ഞുതരുമെന്നും സുമിത്ര ജയപ്രകാശ് പറഞ്ഞു. മലയാള സാഹിത്യത്തിലെ നാഴികക്കല്ലായ ഒരു തെരുവിന്റെ കഥയുണ്ടായ മണ്ണില് വച്ചുതന്നെ മറ്റൊരു തെരുവിന്റെ കഥ പ്രകാശനം ചെയ്യുന്നത് രണ്ട് കാലഘട്ടങ്ങളെ തമ്മില് ബന്ധിപ്പിക്കുന്ന അപൂര്വ്വ നിമിഷമായി മാറിയെന്ന് പി.പി.ശശീന്ദ്രന് പറഞ്ഞു. അക്ഷരസ്നേഹികളുടെ സാന്നിധ്യത്തില് മിഠായിത്തെരുവിന്റെ വൈകുന്നേരത്തിന് സാഹിത്യത്തിന്റെ ഹൃദ്യമായ ഗന്ധമാണ് അനുഭവപ്പെട്ടതെന്ന് ചടങ്ങില് അധ്യക്ഷത വഹിച്ച കവി മുരളി മംഗലത്ത് പറഞ്ഞു. മാധ്യമപ്രവര്ത്തകന് എം.ഫിറോസ് ഖാന് മുഖ്യാതിഥിയായിരുന്നു. മഹേഷ് പൗലോസ്, മുസ്തഫ ഒലിവ്, ബോബന് ശ്രീധരന്, പ്രശോഭ് രവി, സ്മിത വിനോദ്, ഇസ മറിയം കാവില് തുടങ്ങിയവര് പ്രസംഗിച്ചു.മനോരമ പത്രം ഏജന്സി, മനോരമ ബ്യൂറോ, ഓണ്ലൈന് വഴി മംഗളൂരു സ്വന്തമാക്കാം.
ചിത്രം-സാദിഖ് കാവിലിന്റെ മംഗളൂരു എന്ന നോവല് സുമിത്ര ജയപ്രകാശ് പൊറ്റക്കാട്ട് പി.പി.ശശീന്ദ്രന് കോപ്പി നല്കി പ്രകാശനം ചെയ്യുന്നു.
