ബെംഗളൂരു: ബെംഗളൂരു റൂറല്‍ ജില്ലയിലെ ഹൊസ്‌കോട്ടെയിലുണ്ടായ അതിദാരുണമായ വാഹനാപകടത്തില്‍ രണ്ട് മലയാളി വിദ്യാര്‍ഥികളുള്‍പ്പെടെ ഏഴ് പേര്‍ മരിച്ചു. വെള്ളിയാഴ്ച പുലര്‍ച്ചെ 5.15-ഓടെ ദൊബ്ബാസ്പേട്ട് - ഹൊസ്‌കോട്ടെ സാറ്റലൈറ്റ് ടൗണ്‍ റിങ് റോഡിലെ സത്യവാര ഗ്രാമത്തിന് സമീപമാണ് അപകടം നടന്നത്.

യെലഹങ്ക ആര്‍.വി. കോളേജിലെ പി.യു. വിദ്യാര്‍ഥികളായ അശ്വിന്‍ നായര്‍ (17), ഏദന്‍ ജോര്‍ജ് (17) എന്നീ മലയാളി വിദ്യാര്‍ഥികളാണ് മരിച്ച മലയാളികള്‍. ഇവരെ കൂടാതെ സഹപാഠികളായ അര്‍ഹാന്‍ ഷെരീഫ് (17), അയാന്‍ അലി (17), ഭരത് (18), ഫര്‍ഹാന്‍ (17) എന്നിവരും, നൈറ്റ് ഷിഫ്റ്റ് കഴിഞ്ഞ് ജോലി കഴിഞ്ഞ് മടങ്ങുകയായിരുന്ന ബൈക്ക് യാത്രക്കാരന്‍ ഗഗന്‍ (26) ഉം ആണ് അപകടത്തില്‍ മരിച്ച മറ്റുള്ളവര്‍.

വിനോദയാത്രയ്ക്ക് പോവുകയായിരുന്ന വിദ്യാര്‍ഥികള്‍ സഞ്ചരിച്ച മഹീന്ദ്ര എക്‌സ്.യു.വി 700 കാര്‍ അമിതവേഗതയിലായിരുന്നുവെന്ന് പോലീസ് പറയുന്നു. സത്യവാരയില്‍ വെച്ച് നിയന്ത്രണം വിട്ട കാര്‍ ആദ്യം മുന്നില്‍ പോവുകയായിരുന്ന ഗഗന്റെ ബൈക്കിനെ ഇടിച്ചുതെറിപ്പിച്ചു. തുടര്‍ന്ന് നിയന്ത്രണം നഷ്ടമായ കാര്‍ മുന്നിലുണ്ടായിരുന്ന കാന്റര്‍ ട്രക്കിന്റെ പിന്നിലേക്ക് അതിശക്തമായി ഇടിച്ചുകയറുകയായിരുന്നു.

ഇടിയുടെ ആഘാതത്തില്‍ ട്രക്കിന്റെ പിന്‍ ആക്‌സില്‍ ഒടിഞ്ഞുമാറുകയും ട്രക്ക് സര്‍വീസ് റോഡിലേക്ക് മറിയുകയും ചെയ്തു. ഈ ആക്‌സിലില്‍ തട്ടി പുറകെ വന്ന മാരുതി ബ്രെസ്സ കാറും അപകടത്തില്‍പ്പെട്ടു. എക്‌സ്.യു.വിയിലുണ്ടായിരുന്ന ആറ് പേരും ബൈക്ക് യാത്രക്കാരനും സംഭവസ്ഥലത്തുതന്നെ മരിച്ചു. രണ്ടാമത്തെ കാറിലുണ്ടായിരുന്ന യാത്രക്കാരും ട്രക്ക് ഡ്രൈവറും പരിക്കുകളോടെ രക്ഷപ്പെട്ടു.

അപകടത്തെത്തുടര്‍ന്ന് സാറ്റലൈറ്റ് ടൗണ്‍ റിങ് റോഡില്‍ ഒരു മണിക്കൂറോളം ഗതാഗതം തടസ്സപ്പെട്ടു. ക്രെയിനുകള്‍ ഉപയോഗിച്ചാണ് തകര്‍ന്ന വാഹനങ്ങള്‍ റോഡില്‍ നിന്ന് മാറ്റിയത്. മൃതദേഹങ്ങള്‍ നിലവില്‍ ഹൊസ്‌കോട്ടെ സര്‍ക്കാര്‍ ആശുപത്രി മോര്‍ച്ചറിയിലേക്ക് മാറ്റിയിരിക്കുകയാണ്. സുലിബെലെ പോലീസ് സ്ഥലത്തെത്തി കേസ് രജിസ്റ്റര്‍ ചെയ്ത് തുടര്‍നടപടികള്‍ സ്വീകരിച്ചു വരുന്നു.