തെല്‍ അവീവ്: ഇസ്രായേലിലെ ജറുസലേമില്‍ ആളിപ്പടര്‍ന്ന കാട്ടുതീ ഇനിയും അണക്കാനായിട്ടില്ല. അണക്കാനുള്ള ശ്രമങ്ങള്‍ തുടരുകയാണ്. 24 മണിക്കൂറിനുള്ളില്‍ ആയിരക്കണക്കിന് ആളുകളെയാണ് ഒഴിപ്പിച്ചത്. ഇസ്രായേലില്‍ റിപ്പോര്‍ട്ട് ചെയ്യപ്പെട്ടതില്‍ ഏറ്റവും വലിയ കാട്ടുതീയാണ് ജറുസലേമിന്റെ പ്രാന്തപ്രദേശങ്ങളില്‍ പടര്‍ന്നു പിടിച്ചിരിക്കുന്നത്. ഏകദേശം 3,000 ഏക്കര്‍ ഭൂമി കത്തിനശിച്ചതായി മാധ്യമങ്ങള്‍ റിപ്പോര്‍ട്ടു ചെയ്യുന്നു.

കാട്ടുതീ പടരുന്ന സാഹചര്യത്തില്‍ പ്രധാന ഹൈവേകള്‍ അടച്ചിരിക്കുകയാണ്. രാജ്യത്ത് ഇതുവരെ ഉണ്ടായിട്ടുള്ളതില്‍ വെച്ച് ഏറ്റവും വലിയ തീപിടുത്തമായിരിക്കാം ഇതെന്നും നിയന്ത്രിക്കാന്‍ കഴിയുന്നില്ലെന്നും ജറുസലേം ഫയര്‍ ആന്‍ഡ് റെസ്‌ക്യൂ സര്‍വീസിന്റെ ജില്ല കമാന്‍ഡറായ ഷ്മുലിക് ഫ്രീഡ്മാന്‍ പറഞ്ഞു. ഇറ്റലിയും ക്രൊയേഷ്യയും മൂന്ന് അഗ്‌നിശമന വിമാനങ്ങള്‍ സഹായത്തിനായി അയക്കുമെന്ന് പ്രതീക്ഷിക്കുന്നതായി പ്രധാനമന്ത്രി ബെഞ്ചമിന്‍ നെതന്യാഹു പറഞ്ഞു. പ്രധാനമന്ത്രി ബെഞ്ചമിന്‍ നെതന്യാഹു ദേശീയ അടിയന്തരാവസ്ഥ പ്രഖ്യാപിച്ചിരിക്കുകയാണ്.

ബുധനാഴ്ച രാവിലെയാണ് ജറുസലേം കുന്നുകളില്‍ ആദ്യമായി തീപിടിത്തം കണ്ടെത്തിയത്. അഞ്ചോളം സ്ഥലങ്ങളിലാണ് തീപിടിത്തമുണ്ടായത്. എന്നാല്‍ ഉഷ്ണതരംഗത്തില്‍ കാട്ടുതീ അതിവേഗം വ്യാപിക്കുകയായിരുന്നു.