ബംഗളൂരു: വിമാനം പുറപ്പെടുന്ന സമയം നേരത്തേയാക്കിയ വിവരം യാത്രക്കാരെ അറിയിക്കാതിരുന്നതിനെത്തുടര്‍ന്ന് അന്താരാഷ്ട്ര വിമാനം നഷ്ടപ്പെട്ട സംഭവത്തില്‍ ട്രാവല്‍ ഏജന്‍സി 83,800 രൂപ നഷ്ടപരിഹാരം നല്‍കണമെന്ന് ബംഗളൂരുവിലെ ഉപഭോക്തൃ തര്‍ക്കപരിഹാര കമ്മിഷന്‍ ഉത്തരവിട്ടു. സേവനത്തിലെ വീഴ്ചയും അന്യായമായ ഇടപാടുമാണ് ഏജന്‍സിയുടെ ഭാഗത്തുനിന്നുണ്ടായതെന്ന് കമ്മിഷന്‍ നിരീക്ഷിച്ചു.
2025 ഫെബ്രുവരി 12 മുതല്‍ 19 വരെ നാല് പേര്‍ക്ക് അസര്‍ബൈജാനിലെ ബാക്കുവിലേക്ക് യാത്ര ചെയ്യുന്നതിനായി 3.42 ലക്ഷം രൂപയുടെ ഹോളിഡേ പാക്കേജാണ് പരാതിക്കാരന്‍ ബുക്ക് ചെയ്തത്. ട്രാവല്‍ ഏജന്‍സി നല്‍കിയ യാത്രാവിവരപ്പട്ടികയില്‍ വിമാനം ഫെബ്രുവരി 12ന് ഉച്ചയ്ക്ക് രണ്ടിന് പുറപ്പെടുമെന്നായിരുന്നു രേഖപ്പെടുത്തിയിരുന്നത്.
എന്നാല്‍ യാത്രക്കാര്‍ രാവിലെ 10.30ഓടെ വിമാനത്താവളത്തിലെത്തിയപ്പോഴേക്കും വിമാനം പുറപ്പെട്ടിരുന്നു. പുറപ്പെടുന്ന സമയം രാവിലെ 10.30ലേക്ക് മാറ്റിയതായി വിമാനക്കമ്പനി ജീവനക്കാര്‍ അറിയിക്കുകയായിരുന്നു. സമയമാറ്റത്തെക്കുറിച്ച് ട്രാവല്‍ ഏജന്‍സി അറിയിച്ചില്ലെന്നാണ് പരാതി.
തുടര്‍ന്ന് ഫെബ്രുവരി 13ന് പുലര്‍ച്ചെ മൂന്നിന് പുറപ്പെടുന്ന മറ്റൊരു വിമാനത്തില്‍ യാത്ര ചെയ്യേണ്ടിവന്നു. ടിക്കറ്റ് വീണ്ടും ബുക്ക് ചെയ്യാന്‍ ഏജന്‍സി 61,800 രൂപ അധികമായി ഈടാക്കിയെന്നും ഈ തുക തിരികെ ലഭിച്ചില്ലെന്നും പരാതിക്കാരന്‍ ആരോപിച്ചു. ബംഗളൂരുവില്‍ ഒരു ദിവസം അധികം തങ്ങേണ്ടിവന്നതിനാല്‍ 12,000 രൂപ താമസച്ചെലവും ഉണ്ടായതായി പരാതിയില്‍ പറയുന്നു.
വിമാനത്തിന്റെ സമയമാറ്റത്തെക്കുറിച്ച് വിമാനക്കമ്പനി ട്രാവല്‍ ഏജന്‍സിയെ അറിയിച്ചിരുന്നെങ്കിലും യാത്രക്കാരനെ വിവരം അറിയിക്കുന്നതില്‍ ഏജന്‍സി വീഴ്ച വരുത്തിയതായി കമ്മിഷന്‍ നിരീക്ഷിച്ചു. പരാതിക്കാരന്റെ വാദങ്ങളെ എതിര്‍ക്കാന്‍ ഏജന്‍സി ഹാജരാകാതിരുന്നതും ശ്രദ്ധേയമായി.
61,800 രൂപ റീബുക്കിങ് ചെലവായും 12,000 രൂപ താമസച്ചെലവായും തിരിച്ചുനല്‍കാന്‍ കമ്മിഷന്‍ നിര്‍ദേശിച്ചു. കൂടാതെ നിയമനടപടികള്‍ക്കുള്ള ചെലവായി 10,000 രൂപയും നല്‍കണം. ആകെ 83,800 രൂപയാണ് നഷ്ടപരിഹാരമായി നല്‍കേണ്ടത്.
വിമാനസമയത്തിലെ മാറ്റങ്ങള്‍ യാത്രക്കാരെ സമയബന്ധിതമായി അറിയിക്കേണ്ട ഉത്തരവാദിത്വം ട്രാവല്‍ ഏജന്‍സികള്‍ക്കുണ്ടെന്നതാണ് ഉത്തരവിന്റെ പ്രധാന സന്ദേശം.