ജിദ്ദ: അവധി കഴിഞ്ഞ് സൗദി അറേബ്യയിലേക്ക് മടങ്ങുന്നതിനിടെ ജിദ്ദ വിമാനത്താവളത്തില്‍ വെച്ച് കാണാതായ മലയാളി നഴ്സ് ഫിലോമിന (32) പൊലീസ് കസ്റ്റഡിയില്‍. വയനാട് സുല്‍ത്താന്‍ ബത്തേരിക്കടുത്ത് അയ്യന്‍കൊല്ലി ആനന്ദ് നിവാസ് രവി-ശെല്‍വി ദമ്പതികളുടെ മകളായ ഫിലോമിന, റിയാദിലെ കിങ് ഫഹദ് ആശുപത്രിയിലെ നഴ്സാണ്. വാര്‍ഷികാവധി കഴിഞ്ഞ് ഈ മാസം 10-നാണ് ബംഗളൂരു വഴി ഇവര്‍ ജിദ്ദയിലേക്ക് യാത്ര തിരിച്ചത്.
ജിദ്ദയില്‍ വിമാനമിറങ്ങിയ ഉടന്‍ രാത്രി എട്ടരയോടെ ഫിലോമിന പിതാവ് രവിക്കും ഭര്‍ത്താവ് ജോണിനും ഒരു ശബ്ദസന്ദേശം അയച്ചിരുന്നു. വിമാനത്താവളത്തില്‍ ഉദ്യോഗസ്ഥര്‍ തന്നെ തടഞ്ഞുവെച്ചിരിക്കുകയാണെന്നും ലഗേജ് കൊണ്ടുപോയെന്നും ഫോണ്‍ ആവശ്യപ്പെട്ടുവെന്നുമായിരുന്നു സന്ദേശം. ഇതിനുശേഷം ഇവരെക്കുറിച്ച് യാതൊരു വിവരവും ലഭിച്ചിരുന്നില്ല. തുടര്‍ന്ന് റിയാദിലെ ആശുപത്രി അധികൃതരുമായി ബന്ധപ്പെട്ടെങ്കിലും ഫിലോമിന അവിടെ എത്തിയിട്ടില്ലെന്ന് വ്യക്തമായതോടെ കുടുംബം ആശങ്കയിലാവുകയും പരാതിപ്പെടുകയുമായിരുന്നു.
ഡ്രഗ് ട്രാഫിക്കിങ് കേസിലാണ് ഫിലോമിനയെ കസ്റ്റഡിയിലെടുത്തിരിക്കുന്നതെന്നാണ് ലഭ്യമായ വിവരം. സൗദിയില്‍ നിരോധിക്കപ്പെട്ട ഏതെങ്കിലും മരുന്ന് കൈവശം വെച്ചതാകാം കസ്റ്റഡിയിലെടുക്കാന്‍ കാരണമെന്നാണ് നിഗമനം. ഇന്ത്യയില്‍ സാധാരണയായി ഉപയോഗിക്കുന്ന പല മരുന്നുകളും സൗദിയില്‍ കര്‍ശനമായി നിരോധിക്കപ്പെട്ടവയാണ്. ഇത് അറിയാതെ യാത്രക്കാര്‍ ഇവ കൈവശം വെച്ച് എത്താറുള്ളത് ഇത്തരം നടപടികള്‍ക്ക് കാരണമാകാറുണ്ട്.
സംഭവത്തില്‍ അന്വേഷണം പുരോഗമിക്കുകയാണെന്നും അന്വേഷണം പൂര്‍ത്തിയായാല്‍ തുടര്‍നടപടികള്‍ സ്വീകരിക്കുമെന്നും ഇന്ത്യന്‍ കോണ്‍സുലേറ്റ് അറിയിച്ചു. ഫിലോമിന നിരപരാധിയാണെങ്കില്‍ ഉടന്‍ തന്നെ വിട്ടയക്കുമെന്നാണ് പ്രതീക്ഷിക്കുന്നത്. തിരോധാനവുമായി ബന്ധപ്പെട്ട് ഇന്ത്യന്‍ എംബസിയുടെയും ജിദ്ദ കോണ്‍സുലേറ്റിന്റെയും സാമൂഹ്യ പ്രവര്‍ത്തകരുടെയും നേതൃത്വത്തില്‍ തുടര്‍നടപടികള്‍ സജീവമായി നടക്കുന്നുണ്ട്.
Related News
