ബെംഗളൂരു: ദസറ, നവരാത്രി ആഘോഷങ്ങളോടനുബന്ധിച്ചുള്ള യാത്രാത്തിരക്ക് നിയന്ത്രിക്കാന്‍ ബംഗളൂരു കന്റോണ്‍മെന്റിനും തിരുവനന്തപുരം നോര്‍ത്ത് സ്‌റ്റേഷനും ഇടയില്‍ പ്രത്യേക എക്‌സ്പ്രസ് ട്രെയിന്‍ സര്‍വീസ് നടത്തുമെന്ന് ദക്ഷിണ പശ്ചിമ റെയില്‍വേ അറിയിച്ചു. ഇരുദിശകളിലേക്കും ഓരോ സര്‍വീസ് വീതമാണ് അനുവദിച്ചിരിക്കുന്നത്.
06575 നമ്പര്‍ ബെംഗളൂരു കന്റോണ്‍മെന്റ്-തിരുവനന്തപുരം നോര്‍ത്ത് എക്‌സ്പ്രസ് സ്‌പെഷ്യല്‍ ഒക്ടോബര്‍ 16 വെള്ളിയാഴ്ച വൈകിട്ട് 4.40ന് ബംഗളൂരുവില്‍നിന്ന് പുറപ്പെടും. ശനിയാഴ്ച രാവിലെ 10.30ന് തിരുവനന്തപുരം നോര്‍ത്തില്‍ എത്തിച്ചേരും.
06576 നമ്പര്‍ മടക്ക ട്രെയിന്‍ ഒക്ടോബര്‍ 17 ശനിയാഴ്ച ഉച്ചയ്ക്ക് 12.40ന് തിരുവനന്തപുരം നോര്‍ത്തില്‍നിന്ന് പുറപ്പെട്ട് ഒക്ടോബര്‍ 18 ഞായറാഴ്ച രാവിലെ ആറിന് ബംഗളൂരു കന്റോണ്‍മെന്റില്‍ എത്തും.
വൈറ്റ്ഫീല്‍ഡ്, ബംഗാര്‍പേട്ട്, കുപ്പം, സേലം, ഈറോഡ്, തിരുപ്പൂര്‍, പോഡന്നൂര്‍, പാലക്കാട്, തൃശൂര്‍, ആലുവ, എറണാകുളം ടൗണ്‍, കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂര്‍, മാവേലിക്കര, കായംകുളം, കരുനാഗപ്പള്ളി, ശാസ്താംകോട്ട, കൊല്ലം, വര്‍ക്കല ശിവഗിരി എന്നിവിടങ്ങളിലാണ് സ്‌റ്റോപ്പുകള്‍ അനുവദിച്ചിരിക്കുന്നത്.
നാല് എസി ത്രീടയര്‍ കോച്ചുകള്‍, ആറ് സ്ലീപ്പര്‍ കോച്ചുകള്‍, എട്ട് ജനറല്‍ സെക്കന്‍ഡ് ക്ലാസ് കോച്ചുകള്‍, രണ്ട് ലഗേജ് കം ബ്രേക്ക് വാന്‍-ജനറേറ്റര്‍ കാര്‍ കോച്ചുകള്‍ എന്നിവയുള്‍പ്പെടെ 20 കോച്ചുകളാണ് ട്രെയിനിലുണ്ടാകുക.
ദസറ-നവരാത്രി അവധിക്കാലത്ത് ബെംഗളൂരുവില്‍നിന്ന് കേരളത്തിലേക്ക് യാത്ര ചെയ്യുന്നവര്‍ക്ക് അധിക യാത്രാസൗകര്യം ഒരുക്കുകയാണ് പ്രത്യേക സര്‍വീസിന്റെ ലക്ഷ്യം.