വത്തിക്കാന്‍ സിറ്റി: കത്തോലിക്കാ സഭയുടെ പരമാധ്യക്ഷന്‍ പോപ്പ് ലിയോ പതിനാലാമന് ശ്വാസകോശ കാന്‍സര്‍ സ്ഥിരീകരിച്ചു. റോമിലെ ജെമെല്ലി ആശുപത്രിയില്‍ നടത്തിയ ശസ്ത്രക്രിയയിലൂടെ വലത് ശ്വാസകോശത്തിന്റെ താഴത്തെ ഭാഗം നീക്കം ചെയ്തതായി വത്തിക്കാന്‍ അറിയിച്ചു. ശസ്ത്രക്രിയ വിജയകരമായിരുന്നെന്നും സങ്കീര്‍ണതകളൊന്നും ഉണ്ടായില്ലെന്നും മെഡിക്കല്‍ ബുള്ളറ്റിനില്‍ വ്യക്തമാക്കി.
71കാരനായ മാര്‍പ്പാപ്പയ്ക്ക് പതിവ് ആരോഗ്യപരിശോധനയ്ക്കിടെയാണ് ശ്വാസകോശത്തില്‍ മുഴ കണ്ടെത്തിയത്. ശസ്ത്രക്രിയയ്ക്കുമുമ്പുള്ള പരിശോധനകളില്‍ കാന്‍സര്‍ സംശയിച്ചിരുന്നെങ്കിലും, ശസ്ത്രക്രിയയ്ക്കിടെ നടത്തിയ പരിശോധനയില്‍ പള്‍മണറി അഡിനോകാര്‍സിനോമ സ്ഥിരീകരിക്കുകയായിരുന്നു. ശ്വാസകോശത്തിലെ കോശങ്ങളില്‍നിന്ന് ആരംഭിക്കുന്ന കാന്‍സറിന്റെ ഒരു സാധാരണ വകഭേദമാണിത്.
ഏകദേശം 90 മിനിറ്റ് നീണ്ട ശസ്ത്രക്രിയയ്ക്കായി മാര്‍പ്പാപ്പ മൂന്നു മണിക്കൂറോളം ഓപ്പറേഷന്‍ തിയറ്ററില്‍ ചെലവഴിച്ചു. കാന്‍സര്‍ ബാധിച്ച കോശങ്ങള്‍ പൂര്‍ണമായി നീക്കം ചെയ്യുകയെന്ന ലക്ഷ്യത്തോടെ വലത് ശ്വാസകോശത്തിന്റെ താഴത്തെ ഭാഗം മുഴുവനായി നീക്കം ചെയ്തതായി ഡോക്ടര്‍മാര്‍ അറിയിച്ചു. ശസ്ത്രക്രിയയ്ക്കുശേഷം അദ്ദേഹം സാധാരണ നിലയില്‍ ഉണരുകയും നിരീക്ഷണത്തിനുശേഷം മുറിയിലേക്ക് മടങ്ങുകയും ചെയ്തു. ഒരാഴ്ചയോളം ആശുപത്രിയില്‍ തുടരേണ്ടിവരുമെന്നാണ് പ്രതീക്ഷ.
കാന്‍സര്‍ ശരീരത്തിന്റെ മറ്റു ഭാഗങ്ങളിലേക്ക് വ്യാപിച്ചിട്ടുണ്ടോയെന്ന് കണ്ടെത്താന്‍ കൂടുതല്‍ പരിശോധനകള്‍ നടത്തിവരികയാണ്. അതിന്റെ ഫലം പുറത്തുവന്നിട്ടില്ല.
ശസ്ത്രക്രിയയ്ക്കുള്ള തീരുമാനം മാര്‍പ്പാപ്പ തന്നെയാണ് ഞായറാഴ്ച സെന്റ് പീറ്റേഴ്‌സ് സ്‌ക്വയറിലെ പ്രാര്‍ഥനയ്ക്കുശേഷം വിശ്വാസികളെ അറിയിച്ചത്. ശ്വാസകോശത്തിലെ മുഴ പ്രാരംഭഘട്ടത്തിലേതായിരുന്നുവെന്നും നീക്കം ചെയ്യുന്നതാണ് ഉചിതമെന്ന് ഡോക്ടര്‍മാര്‍ നിര്‍ദേശിച്ചതായും അദ്ദേഹം പറഞ്ഞിരുന്നു.
ശസ്ത്രക്രിയയ്ക്കായി മാര്‍പ്പാപ്പ ആശുപത്രിയിലെത്തിയപ്പോള്‍ നൂറുകണക്കിന് വിശ്വാസികള്‍ ജെമെല്ലി ആശുപത്രിക്കു മുന്നില്‍ കാത്തുനിന്നു. അദ്ദേഹം കാറില്‍നിന്ന് കൈവീശി അഭിവാദ്യം ചെയ്തു.
ഒക്ടോബര്‍ 20 വരെ മാര്‍പ്പാപ്പയുടെ ഔദ്യോഗിക പരിപാടികള്‍ മാറ്റിവച്ചിട്ടുണ്ട്. നവംബറില്‍ ലാറ്റിനമേരിക്കന്‍ പര്യടനം നേരത്തെ നിശ്ചയിച്ചിരുന്നു.
Related News
