ലണ്ടന്‍: ബള്‍ഗേറിയന്‍ തീരത്ത് ഡ്രോണ്‍ ആക്രമണത്തെ തുടര്‍ന്ന് മുങ്ങിയ ചരക്കുകപ്പലില്‍ പതിനാല് സിറിയന്‍ പൗരന്മാരും ഉള്‍പ്പെട്ടിരുന്നതായി സിറിയന്‍ സെയ്ലേഴ്സ് യൂണിയന്‍ അറിയിച്ചു. കാണാതായവര്‍ക്കായുള്ള തെരച്ചില്‍ തുടരുകയാണ്. ചൊവ്വാഴ്ച പുലര്‍ച്ചെയായിരുന്നു ആക്രമണം.
ബള്‍ഗേറിയന്‍ ഗ്രാമമായ ക്രാപെറ്റ്സിന് 15 നോട്ടിക്കല്‍ മൈല്‍ കിഴക്കായി കരിങ്കടലിലാണ് ഗിനിയ-ബിസൗ പതാകയേന്തിയ 'എച്ച്എസ് ഡിഗ്‌നിറ്റി' എന്ന കപ്പല്‍ മുങ്ങിയത്. കപ്പലില്‍ ഒരു ഏരിയല്‍ ഡ്രോണും രണ്ട് ആളില്ലാ ജലപേടകങ്ങളും ഇടിച്ചതായി സിറിയന്‍ ടെലിവിഷനോട് യൂണിയന്‍ വ്യക്തമാക്കി. അഞ്ച് ജീവനക്കാരെ രക്ഷപ്പെടുത്തി. ശേഷിക്കുന്ന 11 പേര്‍ക്കായി ആറ് കപ്പലുകളും രണ്ട് ഹെലികോപ്റ്ററുകളും തെരച്ചില്‍ നടത്തിവരുന്നു.
സമാനമായ മറ്റൊരു സംഭവത്തില്‍, ബള്‍ഗേറിയന്‍ തീരദേശ നഗരമായ ബ്യാലയ്ക്ക് സമീപം ഉക്രേനിയന്‍ ഉടമസ്ഥതയിലുള്ള മാള്‍ട്ടീസ് പതാകയേന്തിയ 'ചെല്‍സി 3' എന്ന കപ്പലിന് നേരെ മൂന്ന് ഡ്രോണുകള്‍ ആക്രമണം നടത്തി. ബള്‍ഗേറിയന്‍ അതിര്‍ത്തി രക്ഷാസേന കപ്പലിലെ 15 ജീവനക്കാരെയും (ഏഴ് ഉക്രേനിയക്കാരും എട്ട് അസര്‍ബൈജാനികളും) രക്ഷപ്പെടുത്തി വര്‍ണ തുറമുഖത്ത് എത്തിച്ചു. പരിക്കേറ്റ ചിലര്‍ക്ക് വൈദ്യസഹായം നല്‍കിയതായി അധികൃതര്‍ അറിയിച്ചു.
ഒക്ടോബര്‍ 6-ന് ബള്‍ഗേറിയയുടെ പ്രത്യേക സാമ്പത്തിക സമുദ്രമേഖലയില്‍ രണ്ട് വാണിജ്യ കപ്പലുകള്‍ക്ക് നേരെ ഡ്രോണ്‍ ആക്രമണം നടന്നിരുന്നു. ടോഗോ പതാകയേന്തിയ 'ആല്‍ഫ വതന്‍' മുങ്ങുകയും പലാവു പതാകയേന്തിയ 'എബല്‍' കപ്പലിന് തീപിടിക്കുകയും ചെയ്തിരുന്നു. 'എബല്‍' കപ്പലിലുണ്ടായിരുന്ന 18 ജീവനക്കാരെയും രക്ഷപ്പെടുത്തി.
ഈ ആക്രമണങ്ങളെ തുടര്‍ന്ന് ബള്‍ഗേറിയന്‍ അധികൃതര്‍ റഷ്യന്‍ അംബാസഡറെ വിളിച്ചുവരുത്തിയിരുന്നു. എന്നാല്‍ ആക്രമണത്തിന് പിന്നില്‍ ആരാണെന്ന് വ്യക്തമായ തെളിവുകളില്ലെന്ന് ബള്‍ഗേറിയന്‍ പ്രധാനമന്ത്രി റുമെന്‍ റദേവ് പറഞ്ഞു. സംഭവങ്ങളെക്കുറിച്ച് അറിവില്ലെന്നാണ് മോസ്‌കോയുടെ നിലപാട്.
Related News
