വാഷിംഗ്ടണ്‍: റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ശനിയാഴ്ച ഹൂതി ഭീകരര്‍ നടത്തിയ മാരകമായ മിസൈല്‍ ആക്രമണം ഉള്‍പ്പെടെ സൗദി അറേബ്യയ്ക്ക് നേരെ നടക്കുന്ന തുടര്‍ച്ചയായ ആക്രമണങ്ങളെ യു.എസ് സ്റ്റേറ്റ് സെക്രട്ടറി മാര്‍ക്കോ റൂബിയോ ശക്തമായി അപലപിച്ചു. ഒരു അമേരിക്കന്‍ പൗരന്‍ ഉള്‍പ്പെടെ 12 പേരുടെ ജീവനാണ് ശനിയാഴ്ചത്തെ ആക്രമണത്തില്‍ പൊലിഞ്ഞത്.
'ഒരു യു.എസ് പൗരന്‍ ഉള്‍പ്പെടെ നിരവധി നിരപരാധികളുടെ ജീവനെടുത്ത റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിലെ ആക്രമണം ഉള്‍പ്പെടെ സൗദി അറേബ്യയ്ക്ക് നേരെ ഭീകര സംഘടനയായ ഹൂതികള്‍ നടത്തുന്ന ആക്രമണങ്ങളെ അമേരിക്ക ശക്തമായി അപലപിക്കുന്നു,' റൂബിയോ പ്രസ്താവനയില്‍ പറഞ്ഞു.
'ഏറെ അപലപനീയമായ ഈ ആക്രമണങ്ങള്‍ നിരപരാധികളായ സാധാരണക്കാരുടെ ജീവന് ഭീകരര്‍ നല്‍കുന്ന വിലയില്ലായ്മയാണ് കാണിക്കുന്നത്. ഇത് ഉടനടി അവസാനിപ്പിക്കണം,' അദ്ദേഹം കൂട്ടിച്ചേര്‍ത്തു.
സൗദി അറേബ്യയ്ക്കും അവിടുത്തെ ജനങ്ങള്‍ക്കുമുള്ള പിന്തുണ ആവര്‍ത്തിച്ച റൂബിയോ, ആക്രമണത്തില്‍ കൊല്ലപ്പെട്ടവരുടെ കുടുംബങ്ങളുടെ ദുഃഖത്തില്‍ പങ്കുചേരുന്നതായും അനുശോചനം അറിയിക്കുന്നതായും വ്യക്തമാക്കി.
ശനിയാഴ്ചത്തെ ആക്രമണത്തില്‍ നാല് സൗദി പൗരന്മാരും രണ്ട് ബംഗ്ലാദേശികളും അമേരിക്ക, ഈജിപ്ത്, ജോര്‍ദാന്‍, സിറിയ, ഫലസ്തീന്‍, സുഡാന്‍ എന്നിവിടങ്ങളില്‍ നിന്നുള്ള ഓരോ പൗരന്മാരും ഉള്‍പ്പെടെ 12 പേര്‍ കൊല്ലപ്പെട്ടതായി സൗദി ജനറല്‍ അതോറിറ്റി ഓഫ് സിവിലിയന്‍ ഏവിയേഷന്‍ സ്ഥിരീകരിച്ചിരുന്നു. ആക്രമണത്തില്‍ വിമാനത്താവളത്തിന് കേടുപാടുകള്‍ സംഭവിക്കുകയും ഗുരുതരമായി പരിക്കേറ്റവര്‍ ഉള്‍പ്പെടെ 309 പേര്‍ ചികിത്സയിലാവുകയും ചെയ്തിട്ടുണ്ട്.
റിയാദിലെ വിമാനത്താവളത്തിന് നേരെ ഹൂതികള്‍ നടത്തിയ ഈ ആക്രമണം യുദ്ധക്കുറ്റമാണെന്ന് യെമനിലെ സഖ്യസേന പ്രതികരിച്ചു. അന്താരാഷ്ട്ര മാനുഷിക നിയമങ്ങള്‍ക്ക് അനുസൃതമായി ഇതിന് ശക്തമായ തിരിച്ചടി നല്‍കുമെന്നും സഖ്യസേന വ്യക്തമാക്കി.
.jpg)
Related News
