റിയാദ്: എൻ.ആർ.കെ ഫോറവും മൂൺ ഗ്ലൈഡ് എന്റർടൈൻമെന്റും സംയുക്തമായി സംഘടിപ്പിക്കുന്ന ‘ആരവം’ മെഗാ ലൈവ് മ്യൂസിക് ഷോ ഇനിയൊരു അറിയിപ്പുണ്ടാകുന്നതുവരെ മാറ്റിവെച്ചു. പ്രമുഖ മലയാളി റാപ്പർ വേടൻ ഉൾപ്പെടെയുള്ള കലാകാരന്മാർ പങ്കെടുക്കുന്ന പരിപാടി ഒക്ടോബർ 16 വെള്ളിയാഴ്ച റിയാദിലെ ദിറാബ് പാർക്കിൽ നടത്താനായിരുന്നു നിശ്ചയിച്ചിരുന്നത്. നിലവിലെ പ്രാദേശിക സാഹചര്യങ്ങളും കാണികൾ, കലാകാരന്മാർ, ജീവനക്കാർ എന്നിവരുടെ സുരക്ഷയും പരിഗണിച്ച് സൗദി ജനറൽ എന്റർടൈൻമെന്റ് അതോറിറ്റിയുടെ നിർദേശപ്രകാരമാണ് തീരുമാനം.

പുതിയ തീയതി നിശ്ചയിക്കുന്നതിന് വേദിയുടെ അധികൃതരുമായും ബന്ധപ്പെട്ട കക്ഷികളുമായും ഏകോപനം നടത്താനും പെർമിറ്റ് ഭേദഗതിക്കുള്ള അപേക്ഷ സമർപ്പിക്കാനും അതോറിറ്റി സംഘാടകരോട് നിർദേശിച്ചിട്ടുണ്ട്. ഔദ്യോഗിക അനുമതി ലഭിച്ചശേഷം മാത്രമേ പുതുക്കിയ തീയതി പ്രഖ്യാപിക്കാവൂ എന്നും അറിയിപ്പിൽ വ്യക്തമാക്കുന്നു.

വേടനു പുറമെ ആര്യ ദയാൽ, ദയാന, യോഗി ശേഖർ, H3M, DJ സിബിൻ, V-Freek തുടങ്ങിയ കലാകാരന്മാർ പങ്കെടുക്കുന്ന പരിപാടിക്കായി ഏകദേശം 20,000 പേരെ ഉൾക്കൊള്ളാവുന്ന വേദിയാണ് ഒരുക്കാൻ തീരുമാനിച്ചിരുന്നത്.

നേരത്തെ ഒക്ടോബർ രണ്ടിന് നടത്താനിരുന്ന ഷോ സാങ്കേതിക കാരണങ്ങളും ദിറാബ് മേഖലയിലെ ഹൈവേ നവീകരണവുമായി ബന്ധപ്പെട്ട സാഹചര്യങ്ങളും മൂലം ഒക്ടോബർ 16-ലേക്ക് മാറ്റിയിരുന്നു. അതോറിറ്റിയുടെ പുതിയ നിർദേശത്തെത്തുടർന്നാണ് വീണ്ടും മാറ്റിവെച്ചത്.

ടിക്കറ്റ് എടുത്തവർ തുടർനിർദേശങ്ങൾക്കായി സംഘാടകരുടെ ഔദ്യോഗിക അറിയിപ്പുകൾ ശ്രദ്ധിക്കണമെന്ന് എൻ.ആർ.കെ ഫോറവും മൂൺ ഗ്ലൈഡ് എന്റർടൈൻമെന്റും അഭ്യർഥിച്ചു. തീയതി മാറ്റം മൂലമുള്ള അസൗകര്യത്തിൽ ഖേദം പ്രകടിപ്പിച്ച സംഘാടകർ, സുരക്ഷയ്ക്ക് മുൻഗണന നൽകി പരിപാടി മികച്ച രീതിയിൽ നടത്താൻ എല്ലാവരുടെയും സഹകരണം തേടി.