വാഷിങ്ടണ്‍: സമാധാനത്തിനുള്ള നൊബേല്‍ സമ്മാനം ലഭിക്കാത്തതില്‍ അതൃപ്തി പരസ്യമാക്കി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. 2026ലെ സമാധാന നൊബേല്‍ ദക്ഷിണാഫ്രിക്കന്‍ നിയമവിദഗ്ധയും മുന്‍ അന്താരാഷ്ട്ര ക്രിമിനല്‍ കോടതി (ഐ.സി.സി.) ജഡ്ജിയുമായ നവി പിള്ളയ്ക്ക് ലഭിച്ചതിന് പിന്നാലെയാണ് ട്രംപ് നൊബേല്‍ സമിതിയെയും നോര്‍വേയെയും വിമര്‍ശിച്ചത്. പുരസ്‌കാര തീരുമാനം നാണക്കേടും അപമാനവുമാണെന്നും അത് നോര്‍വേയുടെ പേരില്‍ മായാത്ത കളങ്കമായി അവശേഷിക്കുമെന്നും അദ്ദേഹം പറഞ്ഞു.
നവി പിള്ളയെക്കുറിച്ച് കേട്ടിട്ടില്ലെന്നും ആര്‍ക്കും അവരെ അറിയില്ലെന്നും ന്യൂയോര്‍ക്കിലെ സിറാക്കൂസില്‍ നടന്ന പ്രചാരണ പരിപാടിയില്‍ ട്രംപ് പരിഹസിച്ചു. അന്താരാഷ്ട്ര നിയമവും നീതിയും ശക്തിപ്പെടുത്തുന്നതിനുള്ള പ്രവര്‍ത്തനങ്ങള്‍ പരിഗണിച്ചാണ് പിള്ളയ്ക്ക് പുരസ്‌കാരം നല്‍കിയതെന്ന് നൊബേല്‍ സമിതി വ്യക്തമാക്കിയിരുന്നു.
നൊബേല്‍ പ്രഖ്യാപനത്തിന് പിന്നാലെ അന്താരാഷ്ട്ര ക്രിമിനല്‍ കോടതിക്കെതിരെ അമേരിക്ക കൂടുതല്‍ കടുത്ത ഉപരോധങ്ങളും പ്രഖ്യാപിച്ചു. കോടതിയുമായുള്ള ഇടപാടുകള്‍ തടയുകയും അമേരിക്കന്‍ അധികാരപരിധിയിലുള്ള അതിന്റെ സ്വത്തുക്കളും സാമ്പത്തിക താല്‍പര്യങ്ങളും മരവിപ്പിക്കുകയും ചെയ്യുന്നതാണ് നടപടികളിലെ പ്രധാന ഭാഗങ്ങള്‍. കോടതിക്ക് സേവനങ്ങള്‍ നല്‍കുന്ന സ്ഥാപനങ്ങള്‍ക്കും ഇതിന്റെ പ്രത്യാഘാതമുണ്ടാകാം.
അമേരിക്കയുടെ നടപടിയെ ജി-7 കൂട്ടായ്മയിലെ മറ്റ് രാജ്യങ്ങള്‍ ശക്തമായി അപലപിച്ചു. കോടതിയുടെ സ്വതന്ത്രവും നിഷ്പക്ഷവുമായ പ്രവര്‍ത്തനവും വിശ്വാസ്യതയും തുടരാന്‍ അചഞ്ചലമായ പിന്തുണയുണ്ടാവുമെന്ന് കാനഡ, ഡെന്മാര്‍ക്ക്, ജര്‍മനി, ഫ്രാന്‍സ്, ഇറ്റലി, ജപ്പാന്‍, നെതര്‍ലാന്റ്‌സ് തുടങ്ങിയ രാജ്യങ്ങളിലെ വിദേശകാര്യ മന്ത്രിമാര്‍ സംയുക്ത പ്രസ്താവനയില്‍ പ്രഖ്യാപിച്ചു.
അമേരിക്കന്‍ സൈനികരുമായി ബന്ധപ്പെട്ട അഫ്ഗാനിസ്ഥാനിലെ അന്വേഷണവും ഗാസയിലെ യുദ്ധവുമായി ബന്ധപ്പെട്ട് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെതിരെയും മുന്‍ പ്രതിരോധമന്ത്രി യോവ് ഗാലന്റിനെതിരെയും ഐ.സി.സി. പുറപ്പെടുവിച്ച അറസ്റ്റ് വാറന്റുമാണ് വാഷിങ്ടണ്‍ നടപടികള്‍ക്ക് ചൂണ്ടിക്കാട്ടുന്ന പ്രധാന കാരണങ്ങള്‍. അമേരിക്കയും ഇസ്രായേലും ഐ.സി.സി. സ്ഥാപക ഉടമ്പടിയായ റോം ചട്ടത്തിലെ അംഗങ്ങളല്ല. എന്നാല്‍ അംഗരാജ്യങ്ങളുടെ പ്രദേശങ്ങളില്‍ നടന്നതായി ആരോപിക്കപ്പെടുന്ന കുറ്റകൃത്യങ്ങളില്‍ കോടതി അധികാരപരിധി ഉന്നയിക്കുന്നുണ്ട്.
അമേരിക്കയുടെ നടപടിയെ ഐ.സി.സി. ശക്തമായി വിമര്‍ശിച്ചു. അന്താരാഷ്ട്ര നിയമവാഴ്ചയെയും സ്വതന്ത്ര നീതിന്യായ സ്ഥാപനത്തിന്റെ പ്രവര്‍ത്തനത്തെയും ദുര്‍ബലപ്പെടുത്താനുള്ള ശ്രമമാണിതെന്ന് കോടതിയുടെ ഡെപ്യൂട്ടി പ്രോസിക്യൂട്ടര്‍ നസഹത് ഷമീം ഖാന്‍ പ്രതികരിച്ചു. ഉപരോധങ്ങള്‍ക്കിടയിലും അന്വേഷണം, വിചാരണ, പ്രോസിക്യൂഷന്‍ നടപടികള്‍ തുടരുമെന്നും കോടതി വ്യക്തമാക്കി. അംഗരാജ്യങ്ങള്‍ കോടതിയുടെ പ്രവര്‍ത്തനം നിലനിര്‍ത്താന്‍ പിന്തുണ നല്‍കണമെന്നും ഐ.സി.സി. ആവശ്യപ്പെട്ടു.
യുദ്ധക്കുറ്റങ്ങള്‍, മനുഷ്യരാശിക്കെതിരായ കുറ്റകൃത്യങ്ങള്‍, വംശഹത്യ തുടങ്ങിയവയില്‍ ഉത്തരവാദിത്തം ഉറപ്പാക്കുകയാണ് ഐ.സി.സി.യുടെ പ്രധാന ദൗത്യം.
.jpg)
Related News
