ന്യൂഡല്‍ഹി: യു.പി.ഐ. ഇടപാടുകള്‍ക്ക് മര്‍ച്ചന്റ് ഡിസ്‌കൗണ്ട് റേറ്റ് (എം.ഡി.ആര്‍.) ഏര്‍പ്പെടുത്താനുള്ള കേന്ദ്ര നിര്‍ദേശം ഉടന്‍ നടപ്പാക്കില്ലെന്ന് സൂചന. അടുത്തയാഴ്ച ചട്ടം പ്രാബല്യത്തില്‍ വരേണ്ടതായിരുന്നു. നിര്‍ദേശത്തിനെതിരെ വ്യാപാരി സംഘടനകള്‍ രംഗത്തെത്തിയ സാഹചര്യത്തിലാണ് കേന്ദ്രം തീരുമാനം പുനഃപരിശോധിക്കുന്നത്. പുതിയ നിരക്കുകള്‍ നടപ്പാക്കുന്നത് നീട്ടിവെക്കണമെന്നാവശ്യപ്പെട്ട് ധനമന്ത്രി നിര്‍മല സീതാരാമന് സംഘടനകള്‍ നിവേദനം നല്‍കി. നിര്‍ദേശത്തെക്കുറിച്ച് വ്യാപാരികള്‍ക്കിടയില്‍ ഇപ്പോഴും വ്യക്തതയില്ലെന്നും അതിനാല്‍ ഒക്ടോബര്‍ 15ന് പകരം 2027 ജനുവരി ഒന്നുമുതല്‍ നടപ്പാക്കണമെന്നുമാണ് ആവശ്യം.
ഉത്സവകാലത്ത് ഡിജിറ്റല്‍ പേയ്‌മെന്റുകള്‍ വര്‍ധിക്കുന്ന സാഹചര്യത്തില്‍ പുതിയ നിരക്കുകള്‍ വ്യാപാരികള്‍ക്ക് അധിക സാമ്പത്തിക ബാധ്യതയാകുമെന്ന ആശങ്കയും ഉയരുന്നുണ്ട്. നിര്‍ദിഷ്ട എം.ഡി.ആര്‍. വ്യവസ്ഥകള്‍ വിശദീകരിക്കാന്‍ രാജ്യവ്യാപക ബോധവത്കരണ പരിപാടി നടത്താനും വ്യാപാരി സംഘടനകള്‍ തീരുമാനിച്ചിട്ടുണ്ട്.
യു.പി.ഐ. ഇടപാടുകളില്‍ 2,000 രൂപയ്ക്കു മുകളിലുള്ള തുകയ്ക്ക് 0.4 ശതമാനം എം.ഡി.ആര്‍. ഈടാക്കാനായിരുന്നു നീക്കം. 75,000 രൂപയോ അതില്‍ കൂടുതലോ ഉള്ള ഇടപാടുകള്‍ക്ക് പരമാവധി ചാര്‍ജ് 300 രൂപയായിരിക്കും. 3,000 രൂപയുടെ ഇടപാടിന് വ്യാപാരി 12 രൂപയും 50,000 രൂപയുടെ ഇടപാടിന് 200 രൂപയും നല്‍കേണ്ടിവരും. 75,000 രൂപയ്ക്കും അതിനു മുകളിലുമുള്ള ഇടപാടുകള്‍ക്ക് പരമാവധി 300 രൂപയായിരിക്കും നിരക്ക്.
എല്ലാ യു.പി.ഐ. ഇടപാടുകള്‍ക്കും ഈ ചാര്‍ജ് ബാധകമാകില്ല. വ്യാപാരികളുമായുള്ള യു.പി.ഐ. ഇടപാടുകളില്‍ 95 ശതമാനത്തിലധികവും എം.ഡി.ആര്‍. പരിധിക്ക് പുറത്തായിരിക്കും.
റെയില്‍വേ പേയ്‌മെന്റുകള്‍, ടെലികോം സേവനങ്ങള്‍, ഇന്‍ഷുറന്‍സ്, ഇന്ധനം തുടങ്ങിയ തിരഞ്ഞെടുത്ത വിഭാഗങ്ങളില്‍ 2,000 രൂപയ്ക്കു മുകളിലുള്ള ഇടപാടുകള്‍ക്ക് അഞ്ച് രൂപയുടെ നിശ്ചിത നിരക്കാണ് നിര്‍ദേശിച്ചിരിക്കുന്നത്. മ്യൂച്വല്‍ ഫണ്ടുകള്‍, സെക്യൂരിറ്റികള്‍, ഓഹരി ബ്രോക്കര്‍മാര്‍, ഡീലര്‍മാര്‍ എന്നിവയുമായി ബന്ധപ്പെട്ട മൂലധന വിപണി ഇടപാടുകള്‍ക്ക് 0.02 ശതമാനം നിരക്കും പരമാവധി 300 രൂപയെന്ന പരിധിയും ബാധകമാകും.
വ്യാപാരികളില്‍നിന്നാണ് എം.ഡി.ആര്‍. ഈടാക്കുക. ഉപഭോക്താക്കള്‍ക്ക് സൗജന്യ യു.പി.ഐ. ഉപയോഗത്തിന് പ്രതിമാസ പരിധിയോ ക്വാട്ടയോ ഏര്‍പ്പെടുത്തില്ലെന്നും വ്യക്തമാക്കിയിട്ടുണ്ട്. എം.ഡി.ആര്‍. ചെലവ് ഉപഭോക്താക്കളില്‍നിന്ന് ഈടാക്കാതിരിക്കാന്‍ ബാങ്കുകള്‍ ശ്രദ്ധിക്കണമെന്നും നിര്‍ദേശമുണ്ട്.
എം.ഡി.ആര്‍. വഴി ലഭിക്കുന്ന വരുമാനത്തിന്റെ അഞ്ചു ശതമാനം ചെറുകിട വ്യാപാരികളില്‍ യു.പി.ഐ. സ്വീകാര്യത വര്‍ധിപ്പിക്കുന്നതിനുള്ള പ്രത്യേക ഫണ്ടിലേക്ക് മാറ്റാനും നിര്‍ദേശമുണ്ട്. യു.പി.ഐ. സംവിധാനത്തിന്റെ വിപുലീകരണം, സൈബര്‍ സുരക്ഷ, സാങ്കേതിക നവീകരണം തുടങ്ങിയ മേഖലകള്‍ക്കും ഈ വരുമാനം സഹായകമാകുമെന്നാണ് പ്രതീക്ഷ.
എന്നാല്‍ പുതിയ നിരക്കുകളുടെ പ്രായോഗിക വശങ്ങളെക്കുറിച്ച് വ്യാപാരികള്‍ക്കിടയില്‍ വ്യക്തത വരുന്നതുവരെ നടപ്പാക്കല്‍ നീട്ടണമെന്നാണ് സംഘടനകളുടെ ആവശ്യം.