.jpg)
വാഷിങ്ടണ്‍: വിദേശ പ്രൊഫഷണലുകള്‍ക്ക് അമേരിക്കയില്‍ സ്ഥിരതാമസം നേടുന്നതിനുള്ള പ്രധാന നടപടിയായ പെര്‍മനന്റ് ലേബര്‍ സര്‍ട്ടിഫിക്കേഷന്‍ പ്രോഗ്രാമില്‍നിന്ന് (പി.ഇ.ആര്‍.എം) എട്ട് പ്രമുഖ സാങ്കേതിക കമ്പനികളെ സസ്‌പെന്‍ഡ് ചെയ്ത് ഡോണള്‍ഡ് ട്രംപ് ഭരണകൂടം. ഇന്ത്യന്‍ ഐ.ടി. മേഖലയിലെ കോഗ്‌നിസന്റ്, ഇന്‍ഫോസിസ്, ടാറ്റ കണ്‍സള്‍ട്ടന്‍സി സര്‍വീസസ് (ടി.സി.എസ്.), വിപ്രോ, എച്ച്.സി.എല്‍. ടെക്‌നോളജീസ്, ഫ്രഞ്ച് കമ്പനിയായ ക്യാപ്‌ജെമിനി എന്നിവയ്‌ക്കൊപ്പം മൈക്രോസോഫ്റ്റ്, അഡോബി എന്നിവയുമാണ് നടപടി നേരിടുന്നത്.
അമേരിക്കന്‍ തൊഴിലാളികളുടെ തൊഴില്‍ അവസരങ്ങള്‍ വിദേശ ജീവനക്കാരുടെ നിയമനം മൂലം കുറയുന്നുവെന്ന ആരോപണമാണ് നടപടിക്ക് പിന്നിലെന്ന് യു.എസ്. തൊഴില്‍ സെക്രട്ടറി കീത്ത് സോണ്ടര്‍ലിങ് വ്യക്തമാക്കി. വിദേശ തൊഴിലാളികളെ കുറഞ്ഞ വേതനത്തില്‍ നിയമിക്കുന്നതും വിസാ നടപടികളില്‍ ക്രമക്കേട് നടത്തുന്നതും സംബന്ധിച്ച് അന്വേഷണം നടക്കുന്നുണ്ടെന്നും അധികൃതര്‍ വ്യക്തമാക്കി.
വിദേശ ജീവനക്കാര്‍ക്കായി പുതിയ പി.ഇ.ആര്‍.എം അപേക്ഷകള്‍ സമര്‍പ്പിക്കാനോ നിലവില്‍ നടപടിയിലുള്ള അപേക്ഷകള്‍ പ്രോസസ് ചെയ്യാനോ ഈ കമ്പനികള്‍ക്ക് കഴിയില്ലെന്നാണ് യു.എസ്. തൊഴില്‍ വകുപ്പിന്റെ പ്രഖ്യാപനം. പി.ഇ.ആര്‍.എം സര്‍ട്ടിഫിക്കേഷന്‍ സാധാരണയായി തൊഴില്‍ അടിസ്ഥാനത്തിലുള്ള ഗ്രീന്‍ കാര്‍ഡ് നടപടിയിലെ പ്രധാന ഘട്ടമാണ്. അതിനാല്‍, നടപടികള്‍ ആരംഭിക്കാനിരിക്കുന്നതോ സര്‍ട്ടിഫിക്കേഷന്‍ കാത്തിരിക്കുന്നതോ ആയ ജീവനക്കാരുടെ സ്ഥിരതാമസ അപേക്ഷകള്‍ വൈകാം.
ഇന്ത്യന്‍ പ്രൊഫഷണലുകളെ സംബന്ധിച്ചിടത്തോളം ഇതിന് പ്രത്യേക പ്രാധാന്യമുണ്ട്. അമേരിക്കയില്‍ ഗ്രീന്‍ കാര്‍ഡ് ലഭിക്കുന്നതിനുള്ള കാത്തിരിപ്പ് ഇന്ത്യക്കാര്‍ക്ക് ഇതിനകം ദീര്‍ഘമാണ്. പി.ഇ.ആര്‍.എം നടപടികള്‍ തടസ്സപ്പെടുന്നത് സ്ഥിരതാമസത്തിലേക്കുള്ള യാത്ര കൂടുതല്‍ സങ്കീര്‍ണമാക്കാം. ചില എച്ച്-1ബി വിസക്കാര്‍ക്ക്, വിസയുടെ സാധാരണ ആറുവര്‍ഷ കാലാവധി അവസാനിക്കാനിരിക്കെ, ഗ്രീന്‍ കാര്‍ഡ് നടപടികളുടെ സമയക്രമം നിര്‍ണായകവുമാണ്.
വിസാ ചട്ടങ്ങള്‍ പാലിക്കുന്നുണ്ടെന്നും എച്ച്-1ബി അപേക്ഷകളില്‍ വലിയൊരു പങ്കും നിലവിലുള്ള ജീവനക്കാരുടെ വിസാ കാലാവധി നീട്ടുന്നതിനോ പദവി മാറ്റുന്നതിനോ വേണ്ടിയാണെന്നും
മൈക്രോസോഫ്റ്റ്, പ്രതികരിച്ചു. ഇന്ത്യന്‍ ഐ.ടി. കമ്പനികള്‍ എച്ച്-1ബി വിസകളിലുള്ള ആശ്രിതത്വം കുറയ്ക്കുകയും അമേരിക്കയില്‍ പ്രാദേശിക നിയമനം വര്‍ധിപ്പിക്കുകയും ചെയ്തിട്ടുണ്ടെന്നാണ് വ്യവസായ സംഘടനയായ നാസ്‌കോമിന്റെ നിലപാട്.
അമേരിക്കന്‍ തൊഴിലാളികള്‍ക്ക് മുന്‍ഗണന നല്‍കണമെന്ന ട്രംപ് ഭരണകൂടത്തിന്റെ നയത്തിന്റെ ഭാഗമാണ് ഈ നടപടി. എന്നാല്‍, ഗ്രീന്‍ കാര്‍ഡ് നടപടികള്‍ തടസ്സപ്പെടുന്നത് ഇന്ത്യന്‍ ജീവനക്കാരുടെ കരിയര്‍ ആസൂത്രണത്തെയും അമേരിക്കയിലെ ദീര്‍ഘകാല തൊഴില്‍ സാധ്യതകളെയും ബാധിക്കുമോയെന്നതാണ് പ്രധാന ആശങ്ക.
.jpg)
Related News
